Samu 78 - The Keyagana NT and 25 OT books

Isaleli vayaʼmogi hosu kavaʼapieʼmo huʼniya gemae

¹ Vayaʼnimogitapae, huʼna, aliʼna lapaya malesuvafeʼmo huvanagi geʼnimo afiyo. Gemo lapa paisuvafeʼmo huvanagi mani gemo alagepa hutapa afiyo.

² Akeyaʼvilaga kavafeʼmo aeʼna kalafefa gemo huteʼna aepaʼamo lapa paiguve.

³ Laginago vayaʼmogi laha paiʼnageta afiʼnona gemo halate lapa paiguve.

⁴ Lagaemo aeta ati okaeta Ala kava neʼmoʼa huʼniya lokiya kavaʼe hapau aiʼnaya kavaʼefeʼmo ava gemo huta mafaʼnetieʼmo hapa paiteta henagaʼamo afole aisaya mafaʼnetieʼmo hapa paigune.

^5-6 Agaemo Isaleli vayaʼaifeʼmo keʼaepa geʼamo hapa paiʼniya agufa gemo huno Yekopu aginago vayaʼaifeʼmo hunoʼaeʼmo, ani kavaʼmo hiyo, huno hapa paiʼniye. Laginago vayaʼaifeʼmo, keʼaepa geʼnimo mafaʼne anagatapimo alita apaya malegeʼapao aliʼa apatesaya mafaʼne anagaʼapimogimo afiteʼapaeʼmo halate mafaʼneʼapieʼmo hapa paiyo, huno hapa paiʼniye.

⁷ Afiteʼapaeʼmo Gotifeʼmo apakesamo afiʼa fatago huteʼa Gotiʼa huʼniya kavafeʼmo apake okanisigeʼa keʼaepa geʼamo akame hugae.

⁸ Apakinago vayaʼmogimo himuʼnamu kavaʼmo huteʼa geʼamo oʼafige Gotifeʼmo apakesamo afiʼa fatago osuge huteʼa ataleʼa uʼnae. Fiku yanageʼa apakaeʼeʼmo ani agufa kavaʼmo hugae.

⁹ Ifalemi nofi vayaʼmogimo atiʼapimo aliteʼa uʼnayaʼmonanafa kame osuʼa ataleʼa aiʼa atagi neʼa eʼnae.

¹⁰ Apakaemo Gotiʼa kotalakemo hu maleʼniya geʼamo akame osuʼa keʼaepa geʼamo ago amagiʼa ataleʼnae.

¹¹ Aune kavaʼmo huʼniya kavafeʼmo ago apake kaniʼniye.

¹² Agaemo afoʼapimogi apaulagaleʼmo Isipi kotega Sovani koteʼmo aune kavaʼmo huʼniye.

¹³ Solovala aniʼmoʼa folagapatiʼmo aino akaka vaelino uno haino anagamo hanete uno lamino afelagamo hanete huʼnigeʼa folagapatiʼmo uʼnae.

¹⁴ Agaemo felugamo hiyapiʼmo uno hogoteteno apavalelino uʼniya kava huno haniʼilagaʼeʼmo ata vaipiʼmo aeno halelinuno hogoteteno apavalelino uʼniye.

¹⁵ Agaemo kaʼme kotegamo aniʼmo ohaneʼniya koteʼmo yafapiʼmo amagino aino apalo atiʼnigeno afepatiʼmo alopa aniʼmo eno haineno asagauno aiʼnigeʼa neʼnae.

¹⁶ Yafapatiʼmo alopa aniʼmo emineʼnigeʼa neʼa maiʼnae.

¹⁷ Huʼniyaʼmonanafa kaʼme kotegamo hogote vekamo anaga vekalegamo magoʼe magoʼe huʼa hosu kavaʼmo huteʼa geʼamo ago amagiʼa ataleʼnae.

¹⁸ Gotifeʼmo, lahauʼniya neʼyaʼmo lamiyo, huʼa amalageka huʼnae.

¹⁹ Apakaemo Gotifeʼmo huʼa faipa huʼa ateteʼapaeʼmo, Gotiʼa kaʼme koteʼmo alopa neʼyaʼmo afaʼa lamigifiye, huʼa huʼnae.

²⁰ Agaemo yafapiʼmo amagiʼnigeno alopa aniʼmo eminetenoʼaeʼmo ani aniʼmo afaʼa heʼniye. Ani kavaʼmo huʼniyaʼmonanafa neʼyaʼe afumo ameʼaʼeʼmo afaʼa lamigifiye, huʼa huʼnae.

^21-22 Huʼa huʼnayaʼmofeʼmo Ala kava neʼmoʼa afitenoʼaeʼmo lusi kava huno aipamo leno apateʼniye. Yekopu vayaʼmo atamoʼmo emineno leno apasaga liʼniye. Lagufamo alino katino lategaiye, huʼa apakesamo afiʼa fatago osuge aliʼa amufa oʼamige huʼnayaʼmofeʼmo aipamo leno apateʼniye.

^23-24 Apakesamo afiʼa fatago osuʼnayaʼmonanafa kokuʼnafeʼmo aika akaka vao, huno huʼnigeno aino akaka vaeʼnigeno koʼmo aigekana huno mago neʼyaʼmo agiʼamo mana neʼyaʼmo asagauno aiʼnigeʼa aliʼa neʼnae.

²⁵ Gotiʼa enisole vayaʼmogi neʼyaʼmo ma mopafi vayaʼmo apamiʼnigeʼa neʼa apamu huʼnae.

²⁶ Agaemo, yasimo aliyo, huno huʼnigeno yegemo haine neʼeya kotegatiʼmo yasimo aliʼniye. Himamuʼaletiʼmo yasimo aliyo, huno huʼnigeno aluga aluga haopalegatiʼmo yasimo aliʼniye.

²⁷ Yasimoʼmo nama anagaʼmo mumusopakana huno lekana opaisaya agufa nama anagaʼmo apavalelino eʼnigeʼa eʼa kahaepagana huʼa asagauʼa aiʼnae.

²⁸ Maiʼnaya folagapiʼmo asagauʼa aige muki seli noteʼmo asagauʼa aige huʼnae.

²⁹ Agaemo hapauʼniya neʼyaʼmo apamiʼnigeʼa neʼa apamu huʼnae.

^30-31 Neʼyaʼmo afaʼa lamigifiye, huʼa huteʼa amalageka huteʼa apakesamo afiʼa fatago osuʼnayaʼmofeʼmo apamiʼniya neʼyaʼmo neʼa oʼnakaiʼnafa apavayafiʼmo kutala neʼaigenoʼaeʼmo Gotiʼa aipamo leno apateteno Isaleli vayapatiʼmo hogote lokiya vayaʼageʼmo ago apamagiʼnigeʼa faliʼnae.

^32-33 Ani kavaʼmo huʼniyaʼmonanafa agaetegamo magoʼe magoʼe huʼageʼmo hosu kavakeʼmo huʼa maiʼnae. Aune kavaʼmo huʼniyaʼmonanafa apakesamo afiʼa fatago osuʼnayaʼmofeʼmo afa aliʼyaʼmo aliteʼa koli hume hume uʼa faliʼnae.

³⁴ Apamagiʼnigeʼa faliʼnageʼapaeʼmo mago vayaʼamogimo apaipamo aliʼa afe leteʼa Gotiʼmo agesayafeʼmo lokiya vaiʼa kahauya huʼnae.

³⁵ Apakaemo huʼapaeʼmo, Gotiʼa yagaino nelateya vekamo maiʼniye. Lokiya vekamo laha neʼmaeya vekamo maiʼniye, huʼa halate apakesamo afiʼnae.

³⁶ Kanale vekamo maiʼniye, huʼa huʼnayana apaipafatiʼmo apakesamo afiteʼa osuʼnafa apavayaʼaletikeʼmo aigofe gemo huʼnae.

³⁷ Agaetefeʼmo apaipamoʼmo kanale osuʼnigeʼa kotalake geʼamo ago amagiʼa ataleʼnae.

³⁸ Ani kavaʼmo huʼnayaʼmonanafa hau ayamopafiʼmo hauʼniya vekamo maiʼniyaʼmofeʼmo muki vayaʼamo kamitimo oʼapamagiʼnifa hosu kavaʼapigeʼmo alino ataleʼniye. Muki afinaʼmo aipamo leno apatege apatege huno maiʼniyaʼmonanafa aipamo leno apateʼniya kavaʼamo ataleʼniye.

³⁹ Agaemo hunoʼaeʼmo, Vayalafaʼmo maiʼnae. Apavamusamo neʼaiya yaʼmo malage huno hano nehiya kava huʼa maiʼnae, huno agesamo afiʼniye.

⁴⁰ Muki afinaʼmo kaʼme kotegamo maiʼneʼapaeʼmo geʼamo ago amagiʼa ataleʼnagenoʼaeʼmo lusu kava huno aipamoʼmo kana huʼniye.

⁴¹ Apakaemo muki afinaʼmo Gotiʼmo amalageka huge Isaleli vayaʼai aote Gotiʼapimo kaʼaleʼmo ka akanige huʼa maiʼnae.

⁴² Apakaemo himamuʼaletiʼmo huʼniya kavafeʼmo ago apake kanige kame vayaʼai apayapatiʼmo apakufamo alino katino apateʼniya kavafeʼmo ago apake kanige huʼnigeʼa apakesamo oʼafiʼnae.

⁴³ Hogoteno himamuʼaletiʼmo Isipi kotega Sovani koteʼmo huʼniya auna kavafeʼmo apakesamo oʼafiʼnae.

⁴⁴ Agaemo alopa aniʼe aise aniʼeʼmo kola aniʼmo alino hamaleno ateʼnigeʼa Isipi vayaʼmogimo oʼneʼnae.

⁴⁵ Agaemo asole ulu anagaʼmo alino apateʼnigeʼa eʼa hapaege asole eso anagaʼmo alino apateʼnigeʼa eʼa muki mopaʼapileʼmo haneʼniya yaʼmo aliʼa hosu huʼa atege huʼnae.

⁴⁶ Agaemo mago asole kafa anagaʼmo alino apateʼnigeʼa eʼa hoyaʼapifiʼmo haneʼniya neʼyaʼmo nege asole akenu anagaʼmo alino apateʼnigeʼa eʼa hoyaʼapifiʼmo hakale maleʼnaya neʼyaʼmo nege huʼnae.

⁴⁷ Agaemo ko mopa koʼmo alino ataleʼnigeno emineno alagamo neʼaeya nofi hoyaʼapimo amagiʼnigeno falu atiʼniye. Agaemo haniʼilagamo ko mopagana lao yaʼmo alino ataleʼnigeno emineʼnigenoʼaeʼmo alagamo neʼaeya yosa hoyaʼapimo falu teʼniye.

⁴⁸ Agaemo ko mopa koʼmo alino ataleʼnigeno emineno pulumaka anagaʼapimo apamagiʼnigeʼa faliʼnae.

⁴⁹ Gotiʼa aipamo leno apatege hai vaino apatege huteno hanageke yaʼmo apamiʼnigeno apakafu kiʼniye. Ani kava huʼa enisole vayaʼmogimo apamagiʼnageʼa faliʼnae.

⁵⁰ Aipamo leno apatetenoʼaeʼmo apagupi mafaʼnemo afaʼa apakeno oʼapataleʼnifa apamagiʼnigeno kaita hapauʼnigeʼa ago faliʼnae.

⁵¹ Agaemo Isipi kote vayaʼmogi muki yege mafaʼne anagaʼapimo kamitimo apamagiʼnigeʼa ago faliʼnae.

⁵² Apamagiʼniyaʼmonanafa sipisipimo apavaleliʼa neʼvaya kava huno vayaʼamo kaʼme kotegamo apavalelino uʼniye.

⁵³ Alagepa huno yagaino apateʼnigeʼa koli osuʼa afaʼa uʼnayaʼmonanafa solovala aniʼmoʼa kame vayaʼapimo ago aeno apati kaeʼniye.

⁵⁴ Apavalelino uno aote mopaleʼmo himamuʼaletiʼmo aliʼniya aveleʼmo apateʼniye.

⁵⁵ Agaemo alu nofi vaya alu nofi vayaʼmo ago alino hapa faino apataleteno mopaʼapimo alino apamiteno seli noʼapifiʼmo apateʼnigeʼa maiʼnae.

⁵⁶ Ani kavaʼmo huʼniyaʼmonanafa hogote anaga vekamo Gotiʼa amalageka huteʼa himuʼnamu kavaʼmo huteʼa ani kavaʼmo hiyo, huno huʼniya gemo ago amagiʼa ataleʼnae.

⁵⁷ Afoʼapimogi himuʼnamu kavaʼmo huteʼa ataleʼnaya kava huʼa maiʼneʼa kayagiʼniya kevemo hetalageno kahaufilagamo neʼviya kava huʼa ataleʼa hosu kateʼmo uʼnae.

⁵⁸ Apakaemo muki aveʼaleʼmo aigofe gotiʼapimogitefeʼmo mono huʼnagenoʼaeʼmo aipamo leno apateʼniye. Aigofe gotiʼapimo auneʼamo alo hu maleʼneʼa mono huʼnagenoʼaeʼmo hosu aipamo kaliʼniye.

⁵⁹ Gotiʼa apaketenoʼaeʼmo aipamo leno apateteno agaiʼa vayaʼamo akameʼyamo apamiʼniye.

⁶⁰ Agaemo Sailo kotega seli mono nopiʼmo maiʼniyatetiʼmo ataleno uʼniye.

⁶¹ Agaiʼa vayaʼamo hapa oʼmaeno kame vayaʼapimo alino apateʼnigeʼa eʼa kamemo huʼa aeʼa apakaseteʼa kotalakemo hu maleʼniya gemo haneʼniya kesimo kumaya aliniʼa uʼnae. Ani kesimo apakaeʼeʼmo ohaneʼniya kava huno himamuʼaʼe ha le konali yaʼaʼeʼmo apakaeʼeʼmo ohaneʼniye.

⁶² Agaemo agaiʼa vayaʼaifeʼmo aipamo leno apateteno kame vayaʼapimo alino apateʼnigeʼa eʼa naipeletiʼmo apaiʼnae.

⁶³ Kamemo huteʼapaeʼmo neya vayaʼapimo kamitimo apaiʼnageʼa faliʼnageʼapaeʼmo aʼmafaʼne anagaʼapimo veleʼmo oʼmaiʼa afaʼa maiʼnae.

⁶⁴ Kame vayaʼapimogimo mono huʼa neʼapataya vayaʼapimo kamitimo apaiʼnageʼapaeʼmo aʼne anagaʼapimogimo yulagefa oʼaige aviʼyaʼmo osuge huʼnae.

⁶⁵ Ani kavaʼmo huʼa maiʼnagenoʼaeʼmo apaupatiʼmo he netiya kava huno Ala kava neʼmo he tiʼniye. Lokiya vekamoʼmo nofi alagafati aniʼmo netenoʼaeʼmo alopa gefatiʼmo ge nehiya kava huno Ala kava neʼmo malage huno he tiʼniye.

⁶⁶ Malage huno kame vayaʼamo alino hapa faino apataleʼnigeno apavagage huʼnigeʼa ataleʼa uʼnae.

^67-68 Agaemo vayaʼaleʼmo yagaiʼa apatesayafeʼmo Yosefe aginago vayapatiʼe Ifalemi nofi vayapatiʼeʼmo lekana paino oʼapateno apataleno uno Yuta nofi vayapatikeʼmo lekana paino apateteno Saiyoni aveeʼmo hauʼniya avemo lekana paino ateʼniye.

⁶⁹ Agaemo ani aveleʼmo mono noʼamo avegana huno ki maleʼniye. Ma mopamo lokiya vaino haneʼniya kava huno noʼamo lokiya noʼmo ki maleʼniye.

^70-71 Agaemo Yuta nofi vayapatiʼmo Neviniʼmo lekana paino ateteno sipisipileʼmo yagaino maiʼniya kotegatiʼmo avalelinuno Isaleli vayaʼaiteʼmo yagaino apatesiya kini vekamo ateʼniye.

⁷² Ateʼnigeno Neviniʼa aliʼyaʼalefekeʼmo agesamo afiteno alagepa huno yagaino apateʼniye.