Samu 77 - The Keyagana NT and 25 OT books

Mago vekamoʼmo kana yaʼmo aliʼnenoʼaeʼmo Gotifeʼmo nunumuʼmo huno keya aeʼniya gemae

¹ Nagaemo lokiya vaiʼna Gotifeʼmo keya aeʼnove. Nunumuʼmo huʼnogeno kagetafo huno afiʼniye.

² Kana yaʼmo nagaeteʼmo afole aiʼniya afinaʼmo Ala kava neʼmo agesuvafeʼmo kahauya huʼnove. Muki haniʼilagamo nunumuʼmo huʼna nayaʼmo aliʼna asagauʼna maime maime uʼna oʼataleʼnove. Nagaemo falu naipamo oʼaliʼnove.

³ Nagaemo nage okaniʼna Gotifeʼmo nagesamo afiʼnogenoʼaeʼmo naipamoʼmo kana huʼniye. Nagesamo afime afime uʼna naipafiʼmo lokiya vaiʼna oʼmaiʼnove.

⁴ Gotiʼa naha oʼmaeʼnigeʼna nahau okaleʼnove. Alopa kana yaʼmo aliʼna maiʼnovaʼmofeʼmo kegemo afaʼa osuguve.

⁵ Nagaemo akeyaʼvilagaeʼmo nagesamo afiʼnove. Gotiʼmo akeyaʼvilaga huʼniya kavafeʼmo nagesamo afiʼnove.

⁶ Haniʼilagamo yokemo huʼnova kavafeʼmo nagesamo afifi huʼna maiʼnove. Naipafiʼmo nagesamo afifi huʼna maiʼnove. Naunenameʼmo kahauya huge huge huʼniye.

⁷ Ala kava neʼmoʼa muki afinaʼaeʼmo akameʼyamo namisifiye. Agaemo magoʼe huno amuse huno olatesifiye.

⁸ Agaemo magoʼe huno nagaefeʼmo hau ayamopafiʼmo ohausifiye. Polomasi geʼamo ago asagauno aiʼnifiye.

⁹ Agaemo nagaefeʼmo hau huno natesiyafeʼmo age kaniʼnifiye. Aipamo neleya kavaʼmoʼmo fikumo hapa neʼmaeya kavateʼmo atafauno ateʼnifiye.

¹⁰ Gotiʼa hemenimo nagaetegamo alu kavaʼmo nehiye. Nagaemo ani kavatefeʼmo naipafiʼmo nagafu nekiye.

¹¹ O Ala kava nene, huʼna, Alopa aliʼyakalefeʼmo nagesamo afiguve. Lokiyakaletiʼmo huʼnana kaune kavafeʼmo nageʼokaniʼna halate nagesamo afiguve.

¹² Nagaemo muki huʼnana kavafeʼmo nagesamo afifi huʼna maiguve. Nagaemo lokiya aliʼyaʼmo aliʼnana kavafeʼmo aeʼna hakalo huʼna hapa paiguve.

¹³ O Gotiyo, huʼna, muki nehana kavakamo aote kavaʼmo haneʼniye. Ina laʼmo ayamufaʼage Gotitigana huno maiʼniye.

¹⁴ Kagaemo noʼagaya kaune kavaʼmo nehane. Kagaemo vayaʼai folagapiʼmo lokiyakamo alika apave liʼnane.

¹⁵ Kagaika lokiyakaletiʼmo vayakamogi apakufamo alika katika apateʼnane. Kagaemo Yekopu aginagoʼe Yosefe aginagoʼeʼmo kalavusifatiʼmo hatu maeka apateʼnane.

¹⁶ O Gotiyo, huʼna, Aniʼe aniʼeʼmo kageteʼapaeʼmo koli huʼnae. Solovala afepilegatiʼmo atete huʼniye.

¹⁷ Ala kava neʼmoʼa koʼmo alino ateʼnigeno emineʼnigenoʼaeʼmo hiyapatiʼmo magoʼe huno lokiya vaino hakalu huʼnigeno hiyapatiʼmo ha le yaʼmoʼa kevegana huno muki haopalegamo aeno halelino uneno huʼniye.

¹⁸ Kagaemo alopa kagemo huʼnanageno hiyapatiʼmo vego vego nehiya yasimo folagapatiʼmo hakalu huʼniye.

¹⁹ Kagaemo solovala aniʼmo folagapiʼmo uʼnane. Kagae kakamo alopa solovala aniʼmo falagapiʼmo haneʼniyaʼmonanafa lagaemo kaiyakamo oʼageʼnone.

²⁰ Sipisipi anagaʼmogi neʼyagaiya vekamo akame nehaya kava huka uka hogotetanageʼa vayakamogi kakame huʼnae. Kagaemo Mosesetetiʼe Elonitetiʼmo vayakamogi alika apavalelika uʼnane.