Samu 76 - The Keyagana NT and 25 OT books

Gotiʼa kamemo huno aeno aga seʼniya gemae

¹ Yuta vayaʼmogimo Gotiʼa ageʼa alagepa huʼnae. Isaleli vayaʼai apaulagaleʼmo ala agiʼamo aliʼniye.

² Mono noʼamo Yulusalemu toanifiʼmo haneʼniye. Agaemo Saiyoni avefiʼmo muki afinaʼmo maiʼniye.

³ Agaemo ani koteʼmo kame vayaʼai keveʼapigi haleguʼapigi kame hisaya naipeʼapigi huno aeno lo aeʼniye.

⁴ O Gotiyo, huʼna, Ha le konali yakamoʼmo asole avemogi ha le konali yaʼapimo aeka aga seʼnane.

⁵ Kagaemo lokiya ati vayakaʼeʼmo kamemo huka aeka apaka seka muki kame nehaya yaʼapimo apayapatiʼmo aliʼnane. Apakaemo kame hisayafeʼmo lokiyaʼapimo hano huʼnigeʼa ago faliʼnae.

⁶ O Gotiyo, Yekopu Gotiʼamogae, huʼna, Kagaemo apakaefeʼmo ago gemo hapauʼnanageʼapaeʼmo hosi anagaʼe hosileʼmo fai maiʼnaya vayaʼeʼmo mukiʼamo ago faliteʼa mopafiʼmo havaeʼa maiʼnae.

⁷ Vayaʼmogimo kagaefeʼmo koli hiyo. Kaipamo lesigekaeʼmo ina laʼmo kaulagaleʼmo he tino maigiye. Haʼao, mago vekamoʼmo afaʼa he tino oʼmaigiye.

^8-9 Kagaemo agoti huka apatesana afinaʼmo kana yaʼmo apamiʼnageʼa maiʼnaya vayaʼai apakufamo alika katika apatesanafeʼmo he tika maiʼnanageʼa agoti gemo kokuʼnapatiʼmo hapa paiʼnana gemo afiteʼa koli huteʼapaeʼmo geʼapimo ohaneʼniye. Apakaemo apavayaleʼmo akaniʼa maiʼnae.

¹⁰ Vayaʼmo apaipamo neleya kavaʼmo afole aiteno kagikaleʼmo alino asaga huno kategaiye. Kagaemo afole oʼaisiya apaipamo neleya kavaʼmo atafauka ategane.

¹¹ Lapakaemo Ala kava neʼmo Gotitapimofeʼmo polomasi gemo hutetapa polomasi getapimo akame hiyo. Muki haopalegamo maiʼnaya vayaʼmogitapae, huʼna, vayaʼmogi koli hisaya Gotina fiku amisaya yaʼmo alinita agaetegamo uta amiyo.

¹² Agaemo neʼyagaiya vayaʼmo alino afepiʼmo neʼapate. Agaemo ma mopafi kini vayaʼaina koli hisaya yaʼmo neʼapamiye.