Samu 73 - The Keyagana NT and 25 OT books

Esafiʼa hosu kavafeʼmo haʼye huʼnigeno Gotiʼa alino api aino ateʼniya gemae

¹ Ina ge huʼa alagi lama gemo huʼnae. Gotiʼa Isaleli vayaʼmo yaveyave apaipa vayaʼalegamo alagepa kavaʼmo huno hapa neʼmae. Yaveyave apaipa vayaʼalegamo alagepa kavaʼmo nehiye.

² Alagepa kavaʼmo nehiyaʼmonanafa nagaemo alagi ago hogoʼamo asagauʼna aisuva agufa kavaʼmo huʼnove. Alagi hogoʼamo lole nagesamo afiteʼna aeʼna halu vale lamiʼna asagauʼna aisuva agufa kavaʼmo huʼnove.

³ Apakeʼnovana himuʼnamu kavaʼmo huteʼa hosu kavaʼmo nehaya vayaʼmogi alagepa huʼa maiʼnageʼna apaketeʼnaeʼmo maiʼnaya agufa kavaʼmo huʼna maiguve, huʼna huʼnogenoʼaeʼmo nahaʼye huʼniye.

⁴ Falisayafeʼmo huʼnagenoʼaeʼmo apakufamoʼmo lokiya vaiteno apakafu nokiye.

⁵ Muki vayaʼmogimo hanageke yaʼmo neʼaliyaʼmonanafa noʼaliye. Muki vayaʼmogimo hosu yaʼmo neʼaliyaʼmonanafa noʼaliye.

⁶ Himuʼnamu kavaʼmo nehaya kavaʼapimoʼmo ha le konali yaʼapigana huno haneʼniye. Kame nehaya kavaʼapimoʼmo kukena yaʼapigana huno haneʼniye.

⁷ Apafayaʼe vayaʼmo maiʼnageno apakufamo ko nesiye. Hosu kavaʼapimoʼmo apaipafiʼmo havai teteno aino vali nelamiye.

⁸ Huʼa faipa huʼa apatege apaini huʼa apatege nehae. Himuʼnamu gemo huteʼapaeʼmo alita afepi lapategaune, huʼa nehae.

⁹ Kokuʼnapi maiʼniya Gotifeʼmo huʼa faipa huʼa neʼatae. Hosu geʼapimoʼmo aino atagu faeno uneno huʼniye.

¹⁰ Ani kavaʼmo nehayaʼmofeʼmo Goti vayaʼamo halate aiʼa atagineʼa manileʼmo neʼae. Apakaemo kapufiʼmo aniʼmo havai teʼnigeʼa aliʼa neʼnae.

¹¹ Apakaemo huʼapaeʼmo, Haiya kava huno Gotiʼa afigiye, huʼa nehae. Anaga vekamo aeno apakaseʼniya vekamoʼmo lageʼnifiye, huʼa nehae.

¹² Apako, huʼna, ani vayaʼmogi Gotifeʼmo mono nosaya vayaʼmogimo muki afinaʼmo maiʼa haga leʼneʼapaeʼmo magoʼe magoʼe huʼa kagemi yaʼmo afaʼa neʼaliye.

¹³ Nagaemo naipafatiʼmo hosu kavaʼnimo aeʼna kalo paeteʼna nayaʼmo sese huʼnovaʼmonanafa aliʼyaʼnimo afole oʼaiʼniye.

¹⁴ Netepiʼmo kaitaʼmo nahautenoʼaeʼmo nahaulinuno unetiʼniye. Muki neteʼae neteʼaeʼmo kayoʼmo neʼnamine.

¹⁵ Nagaemo, ani kavafeʼmo ava gemo huʼna hapa paiguve, huʼna huʼnovesinana mafaʼnekalegamo hosu kavaʼmo huʼnogeʼa asagauʼa aiʼnaesine.

¹⁶ Ani kavaʼmo aepaʼamo agesuvafeʼmo lusi kava huno alagaʼmo nahaeʼniye.

¹⁷ Alagaʼmo nahaeʼnigeʼna oʼageʼna maime maime neʼeʼnaeʼmo Gotitegamo neʼuʼnaeʼmo hano hisiya afinaʼmo ageʼnove.

¹⁸ Alagi lama gemo nehuve. Kagaemo halu valeʼniya katekeʼmo alika apateʼnane. Kagaemo alika yaga auka apataleʼnanageʼapaeʼmo alagi uʼa lamiʼa hano nehae.

¹⁹ Lusi hosu yaʼmo apaminageʼapaeʼmo malage huʼa uʼa lamiʼa hano nehae. Lusi kava huʼa apamoʼyamo neʼaiya kavaʼmoʼa atafi kaegekana huʼa aliʼa hano huʼa neʼapatalae.

²⁰ Haniʼilagamo alagamuna ageteʼapaeʼmo apaupatiʼmo he netigenoʼaeʼmo ani alagamunamo ago apake kaniya kava huʼa malage huʼa hano hugae. Ala kava nene, huʼna, ani kavaʼmo huka kaupatiʼmo he tika apauneʼageʼmo apaketekaeʼmo alagi okahaugiye.

²¹ Naipamoʼmo kana huʼnigenoʼaeʼmo naipafatiʼmo atu nahaeʼniye.

²² Negi nagi kavaʼmo huteʼna oʼagege oʼafige huteʼna kaulagaleʼmo maiʼneʼnaeʼmo afela afugana huʼna maiʼnove.

²³ Ani kavakeʼmo huʼna maiʼnovaʼmonanafa nagaemo muki afinaʼmo kagaeʼeʼmo magokepi lokaeʼna maiʼnogeka nayapiʼmo natafauka maiʼnane.

²⁴ Hemenimo kagaemo gekaletiʼmo alika ho huka nateteka henagaʼamo ha le konali koteʼmo navalelika uka haigane.

²⁵ Kokuʼnapiʼmo mago naha maesiya vekamo oʼmaiʼniyaʼmonanafa kagaekeʼmo maiʼnane. Ma mopafi vekaeʼmo nahaʼye hisiya vekamo mago oʼmaiʼniyaʼmonanafa kagaekeʼmo maiʼnane.

²⁶ Nagufaʼe naipa nagesaʼeʼmo hano hugiyaʼmonanafa naipamo alika lokiya vaika nateteka muki afinaʼmo hetamaʼnimo kagaekeʼmo maiʼnane.

²⁷ Kahaopaleʼmo eʼa oʼmaiʼa afagiʼaleʼmo maiʼnaya vayaʼmo alagi afela hegae. Kagaemo kataleʼa neʼvaya vayaʼmo alika apagoʼya nelaganaʼmonanafa

²⁸ kahaopaleʼmo uʼna maisuva kavaʼmo kanale kavane. Nagaemo muki nehana kavafeʼmo ava gemo aeʼna hakalo huʼna hapa paisuvafeʼmo Ala kava neʼmo Gotiʼnimofeʼmo aliʼna amufa amiʼnove.