Samu 72 - The Keyagana NT and 25 OT books

Ala kini vekaeʼmo huʼniya gemae

^1-2 O Gotiyo, huʼna, kagaemo kini vekamo alagepa aipa agesamo amiʼnegenoʼao vayakaleʼmo alagepa huno yagaino apateno. Fatago kavakamo kini vekamo mafaʼneʼamo amiʼnegenoʼao kagemi yaʼapimo ohaneʼnisiya vayaʼaiteʼmo alagepa huno yagaino apateno.

³ Fatago kavaʼaletiʼmo yagaino apateʼninageʼa aise aveleʼe alopa aveleʼeʼmo maiʼnaya vayaʼmo alagepa huʼa maisageno hoyaʼapifatiʼmo alagepa neʼyaʼmo afole aigiye.

⁴ Kini vekamoʼmo kagemi yaʼapimo ohaneʼnisiya vayaʼmo hapa maege kafu hisaya vayaʼmo hapa maege huteno apakaetegamo hosu kavaʼmo nehaya vayaʼmo apamagiteno alino afepiʼmo apategaiye.

⁵ Yegemo lege kaimo lege nehisigeʼapaeʼmo muki afinaʼmo kagaefekeʼmo mono hugae.

⁶ Koʼmo aiʼnigenoʼaeʼmo hoyamoʼe mopamoʼeʼmo alagepa huno nehaneya agufa kavaʼmo huno hapa maesigeʼa alagepa huʼa maigae.

⁷ Maige maige huno maiʼnisigeʼapaeʼmo fatago vayaʼmo magoʼe huʼa alagepa huʼa maigae. Muki afinaʼmo kaimo nelesigeʼapaeʼmo alagepa huʼa magokepi lokaeʼa maigae.

⁸ Solovala aniʼmo aluga aluga atupaleʼmo yagaino apategaiye. Alopa aniʼmo uno nelamiya aniteʼe mugagayaga faligaʼeʼmo muki vayaʼaiteʼmo yagaino apategaiye.

⁹ Kaʼme kotega maiʼnaya vayaʼmogimo agaeteʼmo ape huʼa maisageʼapaeʼmo kame vayaʼamogimo agaefeʼmo atete huteʼa apagoʼya faigae.

¹⁰ Sipeni koteʼmo yagaiʼnaya vayaʼmogiʼe muki solovala ani haigifiʼmo yagaiʼnaya vayaʼmogiʼeʼmo muki yaʼmo fiku alini eʼa amigae. Alepiya koteʼmo yagaiʼnaya vayaʼmogiʼe Itiyopiya koteʼmo yagaiʼnaya vayaʼmogiʼeʼmo ofalinimo fiku amigae.

¹¹ Muki kini vayaʼamogimo agaeteʼmo ape huʼa maisageʼapaeʼmo muki alu nofi vaya alu nofi vayaʼmogimo geʼamo afiteʼa akame hugae.

¹² Kagemi yaʼapimo ohaneʼnisiya vayaʼmogimo agaefeʼmo keya aeʼa ge nehisagenoʼaeʼmo apakufamo alino katino apategaiye. Kafu nehaya vayaʼmo hapa maege hapa noʼmaya vayaʼmo hapa maege hugiye.

¹³ Agaemo lokiyaʼapimo nohaneya vayaʼe kafu nehaya vayaʼefeʼmo hau huno apategaiye. Kafu nehaya vayaʼai apakufamo alino katino apategaiye.

¹⁴ Hosu vayaʼmogimo humi apatege apakufamo aliʼa afepi apatege huteʼa apamagisagenoʼaeʼmo miya faino hatu maeno apategaiye. Agaemo kolaʼapimo alopa monileʼyaʼmo aeno agaseʼniya yaʼmo haneʼniye, huno agesamo neʼafiye.

¹⁵ Agaemo ofalino afaʼa maigiye. Alepiya kotegatiʼmo monimo aliniʼeʼa amigae. Muki afinaʼmo nunumuʼmo huʼa ategae. Muki afinaʼae afinaʼaeʼmo ala agiʼamo amigae.

¹⁶ Avina yaʼmo apayapiʼmo neʼaliya agufa kava huno ma mopafiʼmo mago anaga aveleʼmo hakalegaiye. Hagetenoʼaeʼmo asole neʼyaʼmo aesigenoʼaeʼmo Lemani avefatiʼmo alopa yosamoʼmo uti uti neʼaiya agufa kavaʼmo hugiye. Asole kahaumo alagepa huno nelagiya kava huʼa taonifiʼmo maiʼnaya vayaʼmo lusi kava huʼa asole vayaʼmo afole aigae.

¹⁷ Yegemo haneʼnigenoʼaeʼmo muki afinaʼmo agiʼamo hanege hanege huno haneʼnisigeʼa agiʼaleʼmo aliʼa asaga huge huge huʼa maigae. Vayaʼmogimo agaepiʼmo aulena vayaʼmo maigae. Muki alu nofi vaya alu nofi vayaʼmogimo aulena Gotiʼae, huʼa hugae.

¹⁸ Agaiʼageʼmo hapau neʼaiya agufa alagepa kavaʼmo nehiyaʼmofeʼmo Ala kava neʼmo Isaleli vayaʼai Gotiʼapimo aulena Gotiʼae, huʼa agiʼaleʼmo aliʼa asaga huʼa ateyo.

¹⁹ Ha le konali agiʼaleʼmo muki afinaʼmo aliʼa asaga hiyo. Ala agiʼamoʼmo muki ma mopafiʼmo aino atagu faeno uneno hisigeʼa muki vayaʼmogimo agiʼaleʼmo aliʼa asaga hiyo. He, lama ge, lama ge.

²⁰ Neviniʼmo Yesi mafaʼnemoʼmo muki alu ge alu gemo huno nunumuʼmo huge huge huno maiʼniya nunumuʼmo alagi huno hano huʼniye.