Samu 7 - The Keyagana NT and 25 OT books

¹ O Ala kava neʼmo Gotiʼnimogae, huʼna, kagaemo apaini huʼa neʼnataya vayaʼai apayapatiʼmo nagufamo alika katika nateteka navalelikeka alagepa koteʼmo nato.

² Fiku yanageʼa laiyonimoʼmo hapaeno katali katalu nehiya kava huʼa mago naha maesiya vekamo oʼmaisiya afinaʼmo nahaeʼa katali hugae.

³ O Ala kava neʼmo Gotiʼnimogae, huʼna, Nagaemo mago vayaʼaitegamo hosu kavaʼmo huge

⁴ nao vekamo alagepa kavaʼamo anonaʼalefeʼmo hosu kavakeʼmo huge kameʼnimoʼmo hosu kavaʼmo osuʼniyaʼmonanafa agaetegamo hosu kavaʼmo huge ani agufa hosu kavaʼmo huge huʼnovesinana

⁵ Kagaemo kame vayaʼnimo afaʼa apakeka apataleʼnisanageʼa navegala aeʼa natafaugae. Apakaemo kamitimo namagisageno nagiʼnimo mopafiʼmo uno lamigiye.

⁶ O Ala kava nene, huʼna, kaipamo leʼninageka he tiyo. Kame vayaʼnimogi apaipa leʼnigeʼa namagisayafeʼmo apayamukiki nehayanagi he tika naha mao. Fatago kavafeʼmo kahauʼniyanagi alika fako huka apato.

⁷ Muki vayaʼmo alika anupa huka apatesana folagapiʼmo uka haika apaka seka maiʼneka yagaika apato.

⁸ Kagaemo muki ma mopafi vayaʼmo alika fako huka neʼapatana vekamo maiʼnane. O Ala kava nene, huʼna, fatago kavaʼnilefeʼmo alika fako huka nato.

⁹ Kagaemo fatago Gotigamo maiʼneka apaipa apakesafiʼmo alika fako nehane. Hosu vayaʼmogi hosu kavaʼapimo alika hano huka atalegeʼa magoʼe huʼa osiyo. Alagepa vayaʼaina alagepa huʼa maisaya yaʼmo apamigeʼa alagepa huʼa maiyo.

¹⁰ Gotiʼa alagepa huno yagaino neʼnate. Agaemo geʼamo akame nehaya vayaʼmo apakufamo alino katino neʼapate.

¹¹ Gotiʼa alagepa huno alino fako nehiya vekamo maiʼniyanageno hosu vayaʼaifeʼmo muki afinaʼmo aipamo leno neʼapate.

¹² Apakaemo apaipamo aliʼa afe olesayana Gotiʼa naipeʼaleʼmo kuʼme kanegaiye. Atiʼamo aeno hakino aliteno yagaiʼniye.

¹³ Agaemo kamitimo hapaesigeʼa falisaya yaʼamo alo huʼniye.

¹⁴ Aʼnemogi mafaʼne aliʼa neʼapataya kava huʼa hanageke yaʼmo apamisayafeʼmo apakesa afifi nehuʼa aigofe kavaʼmo aliʼa afole aiʼa neʼatae.

¹⁵ Apakaemo vayaʼmo visaya kateʼmo keli kafi maleʼnaya kelifiʼmo apakaiʼapigeʼmo uʼa asagauʼa aiʼnae.

¹⁶ Hosu kavaʼapimoʼa aino atagi neno apakaiʼapilegageʼmo eʼniye. Hapaesayafeʼmo nehaya kavaʼapimoʼmo apakaiʼapigeʼmo hapaegaiye.

¹⁷ Ala kava neʼmoʼa fatago kavaʼmo huno alino fako nehiyaʼmofeʼmo haoke hegauve. Nagaemo Ala kava neʼmo magoʼe huno anaga Goti agiʼaleʼmo yokemo huʼna aliʼna asaga huʼna ategauve.