Samu 69 - The Keyagana NT and 25 OT books

Ala kava neʼmoʼa kana yaʼmo aliʼniye, huno huʼniya gemae

¹ O Gotiyo, huʼna, aniʼmoʼa lugoʼnifiʼmo haineʼniyaʼmofeʼmo nagufamo alika katika nato.

² Naiyamo aeʼna maisuva yaʼmo ohaneʼnigeʼna hapafikeʼmo aeʼna lapaneʼnove. Aniʼmo heteno aeno nati kaeʼniye.

³ Keya aeʼna ge huge huge hufʼna maiʼnogenoʼaeʼmo lusi kava huno alagaʼmo nahaeʼniye. Lugoʼnileʼmo hau huʼnigeʼna Gotiʼnimofeʼmo agava maiʼnogeno naulagafatiʼmo nagafu kiʼniye.

⁴ Nayokaʼmo asole yaʼmo haneʼniya kava huʼa kame vayaʼnimo magoʼe huʼa maiʼnae. Apakaetegamo mago agufa hosu kavaʼmo osuʼnovaʼmonanafa nagaefeʼmo fikumo apaini nehae. Afaʼa fikumo nahaesayafeʼmo huʼnaya vayaʼmo lokiya vayaʼmo maiʼnae. Mago yaʼapimo kumaya oʼaliʼnovaʼmonanafa anonaʼnilefeʼmo afaʼa apamiguve.

⁵ O Gotiyo, huʼna, negi kavaʼmo huʼnova kavaʼnimo ago ageʼnane. Hosu kavaʼnimo kaulagaleʼmo fala okiʼnigeka ago ageʼnane.

⁶ O Gotiyo, huʼna asole ami vayaʼaiteʼmo yagaika neʼapatana Ala kava nene, huʼna, fiku yanageʼna hosu kavaʼmo hisuvana kagaefeʼmo kagava neʼmaiya vayaʼmo apavagage hugiye. O Isaleli vayaʼmogita Gotitimogae, huʼna, fiku yanageʼna hosu kavaʼmo hisuvana kagaemo kagesayafeʼmo kahauya nehaya vayaʼmogimo hosu apakimo aligae.

⁷ Kagaetefeʼmo huʼa faipa huʼa nateʼnageno navagage huʼniye.

⁸ Naganaʼnimogimo oʼapakeʼnaya vayaʼaitegamo nehaya agufa kavaʼmo nagaetegamo nehae. Itaʼnimo mafaʼne anagaʼamogimo alu kotega vayaʼaifeʼmo apakesamo noʼafiya kava huʼa nagaefeʼmo apakesamo noʼafiye.

⁹ Kagaemo nokamo alagepa huno hanesiyafeʼmo nayamukiki nehuvaʼmofeʼmo noʼnagae. Huʼa faipa huʼa nekataya gemoʼmo nagaeteʼmo asagauno aiʼniye.

¹⁰ Aviʼyaʼmo huge nagupi mafaʼnemo aliʼna afepi atesuvafeʼmo neʼyaʼmo mo sige huʼna maiʼnogeʼapaeʼmo huʼa faipa huʼa nateʼnae.

¹¹ Hosu kogu kukenamo vaiʼnogeʼapaeʼmo muki vayaʼmogi kigi yokalo gemo huʼa nateʼnae.

¹² Kateʼmo aliʼa anupa huʼa maiʼnaya vayaʼmogi huʼa faipa huʼa nateʼnae. Alopa aniʼmo neteʼa negi nagi gemo nehaya vayaʼmogimo nagaefeʼmo yokemo nehae.

¹³ Nehayaʼmonanafa nagaemo kagaefekeʼmo nunumuʼmo nehuve. O Ala kava nene, O Gotiyo, huʼna, kahauʼnisiya afinaʼmo kahau huka nateteka geʼnimo afaʼa afitekaeʼmo lama gekaletiʼmo nagufamo alika katika nato.

¹⁴ Hapafiʼmo aeʼna olapanesuvafeʼmo hapafatiʼmo nagufamo alika katika nato. Nagaefeʼmo apaini nehaya vayaʼai apayapatiʼmo hapa faleka nato. Aniʼmo neheya yapatiʼmo nagufamo alika katika nato.

¹⁵ Aniʼmo heteno aeno nati kaege alopa anipiʼmo aeʼna lapanege yatala kelifiʼmo avayamo aino akanino natege hisigeʼna maisuvafeʼmo oʼnatalo.

¹⁶ O Ala kava nene, huʼna, kahau kayamopafiʼmo nekahaiya kavakamo alagepa kavaʼmo haneʼniyaʼmofeʼmo geʼnimo afiyo. Magoʼe huka kahau huka neʼapatana kavakaletiʼmo nagaetegamo aika afe leka eno.

¹⁷ Hanageke yaʼmo aliʼnovaʼmofeʼmo aliʼyakamo neʼaluva vekamoʼnamo kaugosafiʼmo okagesuvafeʼmo aika ati okao. Malage huka geʼnimo afiyo.

¹⁸ Eka nahaopaletiʼmo miya faika hatu maeka nato. Kame vayaʼnimogi apayapatiʼmo hatu maeka nato.

¹⁹ Ago apakeʼnanageʼapaeʼmo huʼa faipa huʼa natege navagage yaʼmo aliʼa namige nagiʼnileʼmo aliʼa afepi atege nehageka apakeʼnane. Kame vayaʼnimo kaulagaleʼmo maiʼnae.

²⁰ Huʼa faipa huʼa nateʼnageʼna lusi kana yaʼmo aliʼnogeno kanamo nahauʼniye. Hau huno natesiya vekamo agesuvafeʼmo kahauya huʼnovaʼmonanafa magoke vekamo alagi oʼmaiʼniye. Mago vayaʼmogi naipamo aliʼa lokiya vaiʼa natesageno naipamoʼmo falu hisiyafeʼmo nagesamo afiʼnovaʼmonanafa alagi oʼmaiʼnae.

²¹ Nesuvafeʼmo atu neheya fipikana agufa yaʼmo namiʼnae. Anifeʼmo nahauʼnigeʼapaeʼmo atu neheya aniʼmo namiʼnae.

²² Hapa oʼmaegenoʼao hosu kavaʼapimo anonaʼapilefeʼmo magokepiʼmo alopa neʼyaʼmo neʼnesagenoʼaeʼmo apaneʼmumo aegekana huno aeno. Alagepa huʼa neʼmaiya kavaʼapimoʼmo aneʼaifiʼmo hegekana huno haneno.

²³ Magoʼe huʼa oʼagesayafeʼmo apaulagafatiʼmo haniʼageʼmo hino. Alopa kana yaʼmo alika apamigeʼapao aliteʼa muki afinaʼmo ape hulitata huʼa maiyo.

²⁴ Kaipamo neleya kavakamo apakaeteʼmo aniʼmo lakigekana huka apamiyo. Kaipamo leʼninageka apatafauvo.

²⁵ Koʼapimo no atufaʼageʼmo hanegaiye. Fiku yanageʼa mago alu vayaʼmogi seli noʼapifiʼmo maigae.

²⁶ Na kava nehayaʼmofeʼmae. Apakaemo amagiʼnana vekaeʼmo apaini huʼa neʼatae. Apakaemo apamagiʼnana vayaʼaifeʼmo huʼa faipa huʼa apateteʼa kana yaʼmo aliʼa neʼapamiye.

²⁷ Alu hosu kava alu hosu kavaʼapilefeʼmo agoti huka apato. Apakaemo fatago kavakamo oʼalisageka naulagaleʼmo fatago vayaʼmo maiʼnae, huka hapa opaiyo.

²⁸ Maige maige huʼa maisaya vayaʼai apakiʼapimo haneʼniya mukufatiʼmo apakiʼapimo aeka kalo paeka atalo. Fatago vayaʼai apakiʼapimo haneʼniya mukufiʼmo apakiʼapimo avoʼmo kaeka oʼmalo.

²⁹ Huʼa maiʼnayaʼmonanafa nagaemo muki yaʼnimo ohaneʼniya vekamo maiʼneʼna kana yaʼmo aliʼnove. O Gotiyo, huʼna, nagufamo alika katika nateteka alika asaga huka nato.

³⁰ Nagaemo yokemo huʼna Gotiʼmo ala agiʼamo amiguve. Hao ke heʼnaeʼmo agiʼaleʼmo aliʼna asaga huʼna ategauve.

³¹ Ala kava neʼmoʼa ani hisuva kavafeʼmo lusi kava huno amuse hugiye. Pulumakamo amagiʼna amisugenoʼaeʼmo amuse osugiye.

³² Ala vayaʼmo maiʼnone, huʼa apakesamo noʼafiya vayaʼmogi ani kavaʼmo ageteʼapaeʼmo apamogaga aigae. Lapakaemo Gotiʼmo agesayafeʼmo kahauya nehaya vayaʼmogitapamo lapaipamo alagepa huno hanesigeta maige maige hutapa maigae.

³³ Ala kava neʼmoʼa muki yaʼapimo ohaneʼniya vayaʼai geʼapimo neʼafiye. Agaemo agaiʼa vayaʼamo kalavusi huʼnaya vayaʼaifeʼmo, afa vayaʼmo maiʼnae, huno agesamo noʼafifa apakaefeʼmo alagepa huno agesamo neʼafiye.

³⁴ Kokuʼnaʼmoʼagi ma mopamoʼagi solovala aniʼmoʼagi muki noyame anagaʼmogimogi solovala anipiʼmo maiʼnaya yaʼmogimogi huʼa ala agiʼamo amiyo.

³⁵ Na agufa kavatefeʼmo ala agiʼamo amigae. Gotiʼa Saiyoni kotega vayaʼamogi apakufamo alino katino apategaiye. Apakaemo Yuta kotega muki taoniʼafi taoniʼafiʼmo maiʼneʼa ani hetamaʼapimo alisayafeʼmo Gotiʼa muki taoniʼamo kigiye.

³⁶ Aliʼyakamo neʼaliya vayaʼai apakinago vayaʼmogi ani mopamo alisageno Gotifeʼmo hapauʼnisiya vayaʼmogi ani mopaleʼmo maige maige huʼa alagi maigae.