Samu 68 - The Keyagana NT and 25 OT books

Isaleli vayaʼmogimo Gotiʼa hapa neʼmaeya kavafeʼmo apamogaga neʼaiya gemae

¹ Gotiʼa malage huno emineno kame vayaʼamo alino hapa faino apataleno. Apatenegeʼa agaefeʼmo apaini nehaya vayaʼmo apaune heyo.

² Yasimoʼmo halinamo alino ha faitalegeno neʼviya kava huno agaemo alino hapa faino apataleno. Atamoʼmo ketoloʼmo leno amuko nehigeno kalisiʼamoʼmo aniʼmo alino ha maleteno hano huʼniya kava huʼa hosu vayaʼmo Goti aulagaleʼmo alino hano huno apataleno.

³ Apakaemo hano hugayaʼmonanafa apatenegeʼa fatago vayaʼmo apamogaga aiyo. Apatenegeʼao Goti aulagaleʼmo lusi kava huʼa apamogaga aiyo.

⁴ Gotifeʼmo yokemo hutapa agiʼaleʼmo alitapa asaga hiyo. Hiyapiʼmo neʼviya Gotiʼmo visiya kaʼmo valitapa ateyo. Agaemo agiʼamo Ala kava nene. Aulagaleʼmo lapamogaga aiyo.

⁵ Gotiʼa agaiʼa aote mono nopiʼmo maiʼnenoʼaeʼmo megusa mafaʼnemo Gotiʼapimo maige kogu aʼneʼaiteʼmo yagaino apatege huno maiʼniye.

⁶ Agaemo magokeʼatomo neʼmaiya ve aʼnemo alagepa huʼa maisayafeʼmo afamo anagaʼmo neʼapamiye. Agaemo kalavusifiʼmo maiʼnaya vayaʼmo hatu maeno neʼapateyaʼmonanafa ge noʼafiya vayaʼmo kaʼme kotegamo maigae.

⁷ O Gotiyo, huʼna, Kagaemo akeyaʼvilagamo vayakaleʼmo uka hogoteteka apavalelika kaʼme kotegamo eʼnane.

⁸ Ani afinaʼmo Gotiʼmo emineʼniyaʼmofeʼmo ma mopamoʼmo atete huge alopa koʼmo ailino eminege huʼniye. Sainai avemoʼmo lusi kava huno atete huʼniye. Isaleli vayaʼmogi Gotiʼapimoʼmo emineʼniyaʼmofeʼmo lusi kava huʼa atete huʼnae.

⁹ O Gotiyo, huʼna, Kagaemo koʼmo aiyo, huka huʼnanageno alopa koʼmo aiʼnigeno hosu mopakamo halate kanale mopamo hamaleʼniye.

¹⁰ Vayakamogimo ani mopaleʼmo alagepa huʼa alagi maiʼnae. Alagi alagepa Gotigamo maiʼnekaeʼmo kafu huʼnaya vayaʼaina apamiʼnane.

¹¹ Ala kava neʼmoʼa hunoʼaeʼmo, Afole aiʼniya kavafeʼmo ava gemo alinitapa uta hapa paiyo, huno hapa paiʼnigeʼa asole vayaʼmo Saiyoni vayaʼmogimo aliniʼa uʼnae.

¹² Apakaemo huʼapaeʼmo, kini vayaʼe ami vayaʼapiʼeʼmo apaune heʼnae, huʼa hapa paiʼnae. Noʼapilegamo maiʼnaya aʼne anagaʼmogimo kamefatiʼmo aliʼnaya yaʼmo fako huʼnae.

¹³ Hemenimo lapakaemo samo haneʼniya haopalegamo nehavaeyaʼmonanafa alagepa namamogi apakufaletiʼmo siluvagana huno aeno halege hapakumoʼmo goligana huno aeno ha lege nehiya namagana hutapa maigae.

¹⁴ Ayamufaʼage Gotiʼa kini vayaʼmogi alino hapa faino apataleʼnigeʼa uʼeʼa huʼnageno Salimoni aveleʼmo koʼmopa koʼmo ailino emineʼniye.

¹⁵ Goti aveʼamo Saiyoni aveʼmoʼmo Mesani avegana huno haneʼniye. Alagi alopa avemae. Mesani avemo alopa avemo haneʼniya kava huno Goti avemoʼmo alagi alopa avemo haneʼniye.

¹⁶ O alopa avemogae, huʼna, Na kava higekaeʼmo Gotiʼa maisiyafeʼmo lekana pai maleʼniya avemo agetekaeʼmo kaipa kafamo haeʼnane. Ala kava neʼmoʼa Saiyoni aveleʼmo maisiyafeʼmo hauʼniye. Ani aveleʼmo muki afinaʼaeʼmo maige maige huno maigiye.

¹⁷ Goti kame talalaʼamo tauseni tauseniʼamo haneʼniye. Ala kava neʼmoʼa Sainai avefiʼmo emineno maiʼniya kava huno Saiyoni avemo aote aveleʼmo emineno maiʼniye.

¹⁸ O Ala kava nene, huʼna, Kagaemo muga anagamo uka haiʼnane. Kagaemo apatafauka kalavusi huka apateʼnana vayaʼmo apavalelika uka haiʼnane. Gotiʼa ma mopafi vayaʼaina apamisanafeʼmo fikumo kamiʼniye. Gekamo oʼafiʼnaya vayaʼeʼmo alisayafeʼmo kamiʼniye. Gotiʼmo Ala kava neʼmoʼa apakaeʼeʼmo magokepiʼmo lokaeno maisiyafeʼmae.

¹⁹ Ala kava nefeʼmo alita auleta ateyo. Agaemo lagufamo alino katino nelateya Gotitimoʼmo muki afinaʼae afinaʼaeʼmo lagae kana yaʼmo neʼaliye.

²⁰ Lagaemo Gotitimoʼmo apakufamo alino katino neʼapate. Agaemo falisuna kavategatiʼmo lagufamo alino katino lateʼniye.

²¹ Lagufamo alino katino lateʼniyaʼmonanafa kame vayaʼamogi apakenopamo alino hosu huno apatalegaiye. Agaemo hosu kavaʼapimo oʼataleʼnaya vayaʼo apayokamo aeʼniya apakenopaleʼmo apamagigiye.

²² Ala kava neʼmoʼa hunoʼaeʼmo, Kame vayatapimo Mesani kotegatiʼmo halate apavaleliʼna egauve. Solovala aniʼmo afepilagamo maiʼnisayana halate apavaleliʼna egauve, huno huʼniye.

²³ Lapakaemo lapaiyamo kolaʼapifiʼmo aetapa kasaligae. Lapakaemo kalatapimogi kolaʼapimo sagani sagani huʼa negae.

²⁴ O Gotiyo, kini vekaʼnimogae, huʼna, Vayaʼmogimo kageʼnayana kamemo huka aeka apaka seka kamogaga ailika eka aote mono nokafiʼmo uka haiʼnanageʼa kageʼnae.

²⁵ Yokemo nehaya vayaʼmogi uʼa hogotetageʼa alagepa agemo neʼaiya yapiʼmo fu huge alagepa agemo neʼaiya yateʼmo amagige huʼnaya vayaʼmo apakame huʼa uʼnageʼa aise yaveʼyamo aiʼnaya aʼmafaʼne anagaʼmo folagapiʼmo uʼnae.

²⁶ Apakaemo ina ge huʼa yokemo huʼapaeʼmo, Alita anupa hutapa maiʼnaya vayaʼmogitapae, huʼa, Gotifeʼmo alitapa auleta ateyo. Isaleli aginagomogitapae, huʼna, Ala kava nefeʼmo alita auleta ateyo, huʼa huʼnae.

²⁷ Apakaemo aise Menisameni nofi vayaʼmo uʼa hogoteʼnae. Yuta nofi vayaʼaiteʼmo neʼyagaiya vayaʼe vayaʼapiʼeʼmo uʼnae. Semulani vayatama vayaʼe Nafatali vayatama vayaʼeʼmo uʼnae.

²⁸ O Gotiyo, huʼna, lokiyakamo alika laveliyo. Laha maeʼnana lokiyakamo halate alika laveliyo. Yulusalemu taonifiʼmo mono nokafatiʼmo lokiyakamo alika laveliyo.

²⁹ Kini vayaʼmogimo mani mono nokaleʼmo eʼa fikumo neʼapamiya yaʼmo aliniʼeʼa nekamiye.

³⁰ Kagaemo Isipi ati vayaʼmo alika afepiʼmo apatenageʼa kaiyafiʼmo maiʼneʼa siluva yafaʼmo kamiyo. Kame kavafeʼmo lusi kava huno hapauʼnisiya vayaʼmo hapa faitalegeʼa apaune heyo.

³¹ Isipi kini vekamoʼmo alino apatesigeʼa uʼa kagae gemo afigae. Itiyopiya vayaʼmogimo malage huʼa eʼa apavalesanafeʼmo apayaʼmo aliʼa asagauteʼa maigae.

³² Alu nofi vaya alu nofi vayaʼmogitapamo Gotifeʼmo yokemo hutapa Ala kava neʼmo agiʼaleʼmo alita asaga hiyo.

³³ Agaemo hiyaleʼmo umenitata nehiye. Akeyaʼvilagamo kokuʼnapiʼmo haneʼniya hiyaleʼmo umenitata nehiye. Agaemo magoʼe huno alopa gefatiʼmo keya neʼaeyanagi afiyo.

³⁴ Lapakaemo Gotiʼa ayamufaʼalefeʼmo aetapa hakalo hiyo. Agaemo muki Isaleli vayaʼmogi kini vekaʼapimo maiʼneno yagaino neʼapate. Agaemo kokuʼnapiʼmo himamuʼaletiʼmo neʼyagaiye.

³⁵ Gotiʼa aote mono noʼafiʼmo maiʼnenoʼaeʼmo ageʼneʼaigeʼapaeʼmo hapau neʼaiya Gotiʼmo maiʼniye, huʼa nehae. Agaemo agaiʼa vayaʼaina himamuʼaʼe lokiyaʼaʼeʼmo alino neʼapamiye.