Samu 66 - The Keyagana NT and 25 OT books

Samu gemo avoʼmo kaeʼniya vekamoʼmo yokemo nehunoʼaeʼmo Gotifeʼmo hao ke heʼniya gemae

¹ Muki ma mopafi vayaʼmogitapae, huʼna, Lapakaemo lapamogaga aitetapa Gotifeʼmo alopa gefatiʼmo hiyo.

² Yokemo hutapa ala agiʼamo amiyo. Ha le konali agiʼaleʼmo alita asaga hiyo.

³ Lapakaemo Gotifeʼmo hutapaeʼmo, Alopa kavaʼmo nehanagetaeʼmo lahau aiteta kolikamo nehune. Lokiyakamo magoʼe huno alopa yaʼmo haneʼniyaʼmofeʼmo kame vayakamogimo kagaefeʼmo koli huteʼa apaleʼyamo nefaiye.

⁴ Muki ma mopafi vayaʼmogimo kagaetefeʼmo monoʼmo huteʼa yokemo huʼa kagikaleʼmo aliʼa asaga nehae. Yokemo huʼa ala kagikamo nekamiye.

⁵ Lapakaemo eta Gotiʼa huʼniya kavaʼmo ageyo. Agaemo ma mopafi vayaʼmogi folagapiʼmo hapau neʼaiya kavaʼmo nehiye.

⁶ Agaemo yasiletiʼmo solovala aniʼmo alino aino akaka vaeliʼneno folagapiʼmo hau huʼniya mopamo alino hamaleʼniye. Isaleli vayaʼmo solovala aniʼmo folagapiʼmo mopamo hau huʼnigeʼa lokaeʼa uʼnae. Lagaemo ani kotegamo agaefekeʼmo lamogaga aiʼnone.

⁷ Agaemo alopa lokiyaʼaletiʼmo yagaino neʼapateyanageno muki afinaʼmo alagi yagaino apatege apatege huno yagaino apategaiye. Agaemo muki alu nofi vaya alu nofi vayaʼmogimo nehaya kavaʼmo apakeʼniye. Fiku yanageʼa geʼamo oʼafiʼa he tiʼa kame huʼa ategae.

⁸ Muki nofi vayaʼmogitapae, huʼna, Gotitimoʼmo alita auleta ateyo. Agiʼaleʼmo alita asaga higeʼapao muki vayaʼmogimo afiyo.

⁹ Agaemo alagepa huno laha maeʼnigeta ofalita afaʼa maiʼnone. Agaemo lataleʼnigeta laiyamo aeta halu noʼvalone.

¹⁰ O Gotiyo, huʼna, Kagaemo lamalageka huʼnane. Vayaʼmogimo siluva yafaʼmo kagopaʼamo leno kalopaesigeno siluva yafaʼageʼmo hanesiyafeʼmo atafiʼmo nekaeya kava huka lamalageka huʼnanageta alagepa huta hamaleʼnone.

¹¹ Kagaemo latalanageta eʼnonategamo aneʼaifiʼmo heʼnone. Kagaemo kana yaʼmo alika lagotofuleʼmo maleʼnane.

¹² Kagaemo apataleʼnanageʼa kame vayatimogimo kamemo huʼa aeʼa laga seteʼa apaiyaletiʼmo aeʼa latapaiʼnae. Lagaemo atafiʼmo uge aniʼmo neheya yapatiʼmo lakaeta uge huʼnonaʼmonanafa lagufamo alika katika lateʼnanageta alagepa huta maiʼnone.

^13-14 Nagaemo kana yaʼmo aliʼneʼnaeʼmo atafiʼmo leno saga neliya ofalinimo kamiguve, huʼna polomasi gemo huʼnove. Nagaemo ani ofalinimo aliniʼna mono nokafiʼmo uʼna haiguve. Kamiguve, huʼna, Polomasi gemo huʼna kaha paiʼnova gemo akame huʼna miya faiʼna kamiguve.

¹⁵ Nagaemo afayaʼaʼe sipisipimo yafa hiʼyalamuteʼmo kaeʼna ofalinimo kamiguve. Nagaemo ani ve sipisipimo kaesugeka ani ofalinimo alagepa atuʼamo afigane. Nagaemo ve pulumakaʼe memeʼeʼmo kagaetefeʼmo ofalinimo huguve.

¹⁶ Gotifeʼmo koli nehaya vayanagi eta geʼnimo afiyo. Nagaemo nagupi mafaʼnemo alagepa huno naha maeʼniya kavafeʼmo ava gemo aeʼna hakalo huʼna lapa paiguve.

¹⁷ Nagaemo naha maesiyafeʼmo navayafatiʼmo keya aeʼna ge huʼna geʼniletiʼmo agiʼaleʼmo aliʼna asaga huʼnove.

¹⁸ Nagaemo naipafiʼmo haneʼniya hosu kavaʼnimo aliʼna nao yaʼmo hu maleʼnisuvana Ala kava neʼmoʼa geʼnimo oʼafigiye.

¹⁹ Oʼafigiyaʼmonanafa ago afiʼniye. Nagaemo nunumuʼmo huʼnogenoʼaeʼmo aipamo namiʼneno geʼnimo afiʼniye.

²⁰ Agaemo nunumuʼmo huʼnova geʼnileʼmo akameʼyamo oʼnamiʼniyaʼmofeʼmo Gotiʼa aliʼna auleʼna ategauve. Hau huno nateʼniye.