Samu 65 - The Keyagana NT and 25 OT books

Apakaemo apamogaga aiteʼa Gotifeʼmo hao ke heʼnaya gemae

¹ O Gotiyo, huʼna, Saiyoni taonifiʼmo uta anonatilefeʼmo kagikaleʼmo alita asaga hugune. Lagaemo kagaefeʼmo polomasi gemo hu maleʼnona kavaʼmo hugune.

² Kagaemo nunumu gemo neʼafinaʼmofeʼmo muki vayaʼmo kagaetegamo ugae.

³ Hosu kavaʼmoʼmo aeno neʼnagase. Hosu kavatilefeʼmo kagaemo aeka kalo paeka atalegane.

⁴ Lekana paika apateʼnana vayaʼmo aulena vayaʼmo maiʼnae. Kagaemo apakaemo kagaetegamo eʼa mono nokafiʼmo maisayafeʼmo apavalelika neʼane. Nokafiʼmo maiʼnetaeʼmo laipamoʼmo alagi kanale hugiye. Lagaemo aote mono nokafiʼmo maisunagekaeʼmo alika auleka lategane.

⁵ O Gotiyo, huʼna, lagufamo alika katika lateʼnana Gotitimogae, huʼna, Nunumuʼmo hisunageka afiteka aeka atagaina hukaeʼmo lokiya kavakaletiʼmo alopa kavaʼmo huteka laha maeʼnane. Muki haopalegamo ma mopafi maiʼnaya vayaʼmogiʼe afagitegamo maiʼnaya vayaʼmogiʼeʼmo aliʼa amufa kamiʼnae.

⁶ Kagaemo kayamufaʼage Gotigamo maiʼnanaʼmofeʼmo lokiyakaletiʼmo avemo alagi lokiya vaino hanesiyafeʼmo alika afole aika ateʼnane.

⁷ Kagaemo solovala aniʼmoʼa alopa gefatiʼmo nehigekaeʼmo vase huka hano huka nehana kava huka vayaʼmogimo kaveta huʼapaeʼmo alopa gemo nehaya geʼapimo alika hano huka neʼatalane.

⁸ Muki ma mopafi vayaʼmogimo oʼageʼnaya kavaʼmo huʼnanageʼa ageteʼapaeʼmo hapau aiʼnae. Yegemo haine neʼeya haopalegaʼe yegemo uno nelamiya haopalegaʼeʼmo maiʼnaya vayaʼmogi kagaemo muki nehana kavaʼmo ageteʼapaeʼmo kagaefeʼmo apamogaga aiʼa keya neʼae.

⁹ Kagaemo ma mopafi vayaʼaifeʼmo kagesamo afitekaeʼmo koʼmo alika atanageno ailino emineʼnigekaeʼmo alika alagepa huka ateʼnanageno lanitani mopafatiʼmo neʼyaʼmo nehage. Kagaemo muki haopalegamo aniʼmo maleʼnanageno nolane.

¹⁰ Kagaemo asole koʼmo alika ateʼnanageno ailino emineno muki hoyafiʼmo aiʼnigeno mopafilagamo aniʼmo haneʼniye. Aniʼmoʼa falu otesiya kavaʼmo nehigeno neʼyaʼmo alagepa huno afole neʼaiye.

¹¹ Kagaemo lusi kava huka lagaeteʼmo alagepa kavaʼmo huka asole neʼyaʼmo afole aisiya kavaʼmo nehane. Haiya haopalegamo neʼvapi ani haopalegamo asole alagepa neʼyaʼmo afole neʼaiye.

¹² Pulumaka anagaʼe sipisipi anagaʼeʼmo muki kotega kahaumo haneʼniya yateʼmo kili nepae. Asole hoyamo aise aveleʼmo haneʼnigeʼa aise avele mopamoʼmo amogaga neʼaiye.

¹³ Lusi kava huʼa asole sipisipi anagaʼmo kahaumo haneʼniya yateʼmo alagi maiʼa kili paeʼnae. Vitimoʼmo kagoʼmu koteʼmo havaiteʼniye. Muki yaʼmogimo apamogaga aiʼa alopa gefatiʼmo nehae.