Samu 64 - The Keyagana NT and 25 OT books

Hosu vayaʼmogi kana yaʼmo amiʼnayaʼmonanafa amogagamo aiʼniya kavafeʼmo huʼniya gemae

¹ O Gotiyo, huʼna, Alopa kana yaʼmo aliʼnovaʼmofeʼmo nagaemo nunumu geʼnimo afiyo. Nagaemo kame vayaʼnieʼmo koli huʼna maiʼnovanagi ofalisuvafeʼmo naha mao.

² Hosu vayaʼmogimo aliʼa anupa huʼa maiʼneʼapaeʼmo aliʼa hosu huʼa natesaya kafeʼmo kahauya nehayanagi naha mao.

³ Apakaemo apavenafuʼnaleʼmo kuʼme kaneʼnageno aveʼmo neʼneya naipegana huno haneʼniye. Hosu geʼapimoʼmo kevegana huno haneʼniye.

⁴ Apakaemo fala kiʼa maiʼneʼa hosu kavaʼapimo anonaʼapimo ohaneʼniya vayaʼmo keveletiʼmo nehapae. Malage huʼa aigofe gemo kevegana huʼa nehayaʼmonanafa koli nosae.

⁵ Apakaemo hosu kavaʼmo hisayafeʼmo apakaiʼapimo aliʼa lokiya vaiʼa neʼapatae. Apakaemo vayaʼmogimo oʼagesayafeʼmo umenimo aiʼa ati kaeteʼapaeʼmo ina laʼmo lagegaiye, huʼa huteʼa kegemo nehae.

⁶ Hosu kavaʼmo hisayafeʼmo apakesamo afiteʼapaeʼmo, Hosu kavaʼmo hisuna kafeʼmo lagesamo afitetaeʼmo ago ageʼnone, huʼa nehae. Vayaʼmogimo apakesamo neʼafiya kavaʼe apaipafiʼeʼmo alagi fala kino haneʼniye.

⁷ Fala kino haneʼniyaʼmonanafa Gotiʼa keveʼaletiʼmo hapaesigeno malage huno uno apakufafiʼmo hanigiye.

⁸ Apakaemo hosu gemo nehayaʼmofeʼmo Gotiʼa alino hano huno apatalegaiye. Vayaʼmogimo apakaetegamo afole aisiya kavaʼmo ageteʼapaeʼmo apakenopaletiʼmo keka hugae.

⁹ Muki vayaʼmogimo ageteʼapaeʼmo koli hugae. Apakaemo Gotiʼa huʼniya kavafeʼmo apakesamo afime afime uʼa afiʼa alagepa huteʼa ageteʼapaeʼmo Gotiʼa aliʼyaʼamo neʼaliya kavafeʼmo ava gemo aeʼa hakalo hugae.

¹⁰ Fatago vayaʼmogimo Ala kava nepiʼmo maiʼneʼapaeʼmo. Ala kava nefeʼmo apamogaga aigae. Apakaemo agaepiʼmo alagepa huʼa fala kiʼa maigae. Muki fatago apaipa vayaʼmogimo Goti ha le konali kavatefeʼmo apamogaga aigae.