Samu 63 - The Keyagana NT and 25 OT books

Gotifekeʼmo neʼnahaiye, huno huʼniya gemae

¹ O Gotiyo, huʼna, Gotiʼnimogamo maiʼnane. Kagesuvafeʼmo kotilamisiyapiʼmo kahauya huguve. Nauneʼnameʼmoʼa kagaefeʼmo nehaiye. Aniʼmo ohaneʼniya koteʼmo maiʼneʼnaeʼmo vayaʼmogimo anifeʼmo nehapaiya kava huno kagaefeʼmo neʼnahaiye.

² Hogoteʼna kaote mono nokafiʼmo maiʼneʼna lokiyakaʼe ha le konali yakaʼeʼmo ageʼnova kava huʼna hemeniʼeʼmo agesuvafeʼmo huve.

³ Ofaliʼna afaʼa neʼmauva kavaʼmo kanale kavaʼmo haneʼniyaʼmonanafa oʼnataleka kahau kayamopafiʼmo kahauʼnigeka naha neʼmana kavaʼmo aeno agaseʼniya kavaʼmo haneʼniyaʼmofeʼmo kagikaleʼmo aliʼna asaga huʼna kategauve.

⁴ Muki afinaʼmo afaʼa maiʼneʼnaeʼmo aliʼna auleʼna kategauve. Nayaʼmo aliʼna asaga huliʼneʼnaeʼmo kagaefekeʼmo nunumuʼmo huguve.

⁵ Afumo afayaʼaʼe atuʼaʼeʼmo neʼa apamu nehaya kava huno nagupi mafaʼnemoʼmo neno amu hugiye. Nagaemo namogaga aiteʼna navayafatiʼmo yokemo huʼna kagikaleʼmo aliʼna asaga huʼna kategauve.

⁶ Hipaʼnileʼmo havaesuvafeʼmo nehuʼnaeʼmo kagaefekeʼmo nagesamo afiteʼna muki haniʼilagaʼamo kagaefekeʼmo nagesa afifi nehuve.

⁷ Naha maeʼnanaʼmofeʼmo kahakufiʼmo maiʼneʼnaeʼmo namogaga aiguve.

⁸ Nagupi mafaʼnemoʼmo magokepi lokaeno maisiyafeʼmo kakame nehigeka nayapiʼmo natafauka alika lokiya vaika neʼnatane.

⁹ Nehanaʼmonanafa kahauya huʼa nageʼa nahaesayafeʼmo nehaya vayaʼmo mopamo afepilaga faliʼnaya vayaʼmo uʼa lamiʼa neʼmaiya kotegamo uʼa lamigae.

¹⁰ Kame vayaʼapimogimo hapaesageʼa afela kalamogi apakufaʼamo negae.

¹¹ Negayaʼmonanafa kini vekamoʼmo Gotifeʼmo amogaga aigiye. Agiʼalefeʼmo ani kavaʼmo nehaya vayaʼmogimo ha le konali yaʼapimo aligayaʼmonanafa aigofe gemo nehaya vayaʼai apavayaleʼmo alino akanigiye.