Samu 62 - The Keyagana NT and 25 OT books

Gotiʼa agaiʼageʼmo nagufamo alino katino nategaiye, huno huʼniya gemae

¹ Nagupi mafaʼnemoʼmo ge osuno Gotifekeʼmo agava maiʼniye. Agaiʼageʼmo nagufamo alino katino nategaiye.

² Agaiʼageʼmo yafaʼnimo maiʼneno nagufamo alino katino neʼnateya Gotiʼnimoʼmo maiʼniye. Naha maesigeʼna afaʼa maiguve.

³ Lapakaemo na magi afinaʼmo kame hutapa nategae. Lapakaemo aino aega huʼniya yafa kegiʼyagana hutapa maige uti uti neʼaiya kegiʼyagana hutapa maige huʼnayanagetapa asagauta aitapa faligae.

⁴ Apakaemo aliʼa afepiʼmo yaga auʼa atalesayafeʼmo vege nehae. Aigofe gemo hisayafeʼmo apamogaga neʼaiye. Apakaemo apavayaʼaletikeʼmo aliʼa auleʼa neʼapatayaʼmonanafa apaipafiʼmo lifana huʼa neʼapatae.

⁵ Nagaemo Gotiʼa naha maegaiye, huʼna nagesamo afiʼna fatago nehuvaʼmofeʼmo nagupi mafaʼneyo, huʼna, ge osuka Gotifekeʼmo agava maiyo.

⁶ Agaiʼageʼmo yafaʼnimo maiʼneno nagufamo alino katino neʼnateya Gotiʼnimoʼmo maiʼniye. Naha maesigeʼna afaʼa maiguve.

⁷ Gotiʼa nagufamo alino katino nateteno nagiʼnileʼmo alino asaga huno nategaiye. Gotiʼa lokiya yafaʼnimo maiʼniye. Nagaetegamo hosu kavaʼmo afole neʼaigeʼnaeʼmo agaepiʼmo alagepa huʼna fala kiʼna neʼmauve.

⁸ Vayaʼmogitapae, huʼna, muki afinaʼmo agaefekeʼmo alita amufa amiyo. Lapaipafatiʼmo aniʼmo lakigekana hutapa nunumuʼmo hutapa ha paiyo. Lagaetegamo hosu kavaʼmo afole neʼaigetaeʼmo Gotipiʼmo alagepa huta fala kita neʼmaune.

⁹ Apaki ohaneʼnisiya vayaʼmo afa vayaʼmo maiʼnae. Apaki haneʼnisiya vayaʼmo aigofe vayaʼmo maiʼnae. Sigelileʼmo asaisunagenoʼaeʼmo kanaʼapimo ohanegaiye.

¹⁰ Lapakaemo agoti hutapa apatege kumaya alige hisaya kavafeʼmo alita amufa oʼamiyo lapa oʼmaegayanagi. Monitapimo magoʼe huno hanesigetapaeʼmo, laha maegaiye, huta lapakesamo oʼafiyo.

¹¹ Gotiʼa magoke afinaʼmo ge huʼniye. Nagaemo lole afinaʼmo nagesamo afiʼnovana Goti lokiyaʼamo haneʼniye, huʼna ago afiʼnove.

¹² O Ala kava nene, huʼna, vayakaeʼmo kahau huka neʼapatane, huʼna ago afiʼnove. Kagaemo kavaʼapilefeʼmo apamete apamete huka alika fako huka neʼapamine.