Samu 60 - The Keyagana NT and 25 OT books

¹ O Gotiyo, huʼna, kagaemo lataleka uʼnane. Lokiyatimo alika lo aeteka kaipamo leka lateʼnane. O Gotiyo, huʼna, halate alika alagepa huka lato.

² Imimaʼmo neʼaliya kava huka mopaleʼmo alika atete huka ateʼnanageno mopamo aeno apalotiʼniye. Mopamoʼmo atete nehisigenoʼaeʼmo asagauno aigiyanagi alika lokiya vaika ato.

³ Kagaemo vayakamo lusi kana yaʼmo apamiʼnane. Lokiya aniʼmo lamiʼnanageta neteta lakutaka nehune.

⁴ Kagaemo lama gelefeʼmo aliʼa hetiʼa atesayafeʼmo kagaefeʼmo koli nehaya vayaʼaina kalahauʼmeʼmo alika apamiʼnane.

⁵ Kahau kayamopafiʼmo kahauʼniya vayaʼmogita hosu kavapatiʼmo lagufamo alika katika latesanafeʼmo nunumu geʼnimo afitekaeʼmo lamaga kayatetiʼmo lahau vaiyo.

⁶ Gotiʼa aote geʼaletiʼmo hunoʼaeʼmo, Nagaemo kamemo ago huʼna aeʼna apaka seteʼna namogaga aiteʼna Sekemi mopaʼe Sukoti kagoʼmu koʼeʼmo vayaʼnimo aliʼna fako huʼna apamiguve.

⁷ Giliyati mopale maiʼnaya vayaʼmo vayaʼnimo maiʼnae. Manasa nofi vayaʼeʼmo vayaʼnimo maiʼnae. Ifalemu nofi vayaʼmo kame hisuva kapa kakolitaʼnigana huʼa maiʼnageʼna kini vekamoʼnamo vayaʼaiteʼmo yagaiʼna apatesuvafeʼmo Yuta nofi vayaʼmo hayopa kayoʼnigana huʼa maiʼnae.

⁸ Maiʼnayaʼmonanafa Movapu nofi vayaʼmogimo yuvapafiʼmo naiyamo sese hisuva yuvapagana huʼa maiʼnae. Iʼnomu nofi vayaʼmogimo naiyafiʼmo maigae. Nagaemo Filisitiya nofi vayaʼeʼmo kamemo huʼna aeʼna apaka segauve.

⁹ Ina laʼmo nagaemo ani lokiya yafa kegiʼyamo haneʼniya taonifiʼmo navalelino ugiye. Ina laʼmo Iʼnomu kotega kaʼmo alino ho huno nategaiye.

¹⁰ O Gotiyo, huʼna, Ani kavaʼmo hisana vekageʼmo maiʼnanaʼmonanafa kagaemo ago kakameʼyamo lamiʼnane. Kagaekeʼmo maiʼnanaʼmonanafa lagae ami vayaʼmo hapa oʼmaeʼnane.

¹¹ Vayaʼmogimo hapa neʼmaya kavaʼmo ina agufa kavaʼmo haneʼniyaʼmofeʼmo hanageke kavatilefeʼmo laha mao.

¹² Gotiʼa kame vayatimo alino afepiʼmo apategaiyaʼmofeʼmo koli osuta himamuʼaletiʼmo kamemo huta aeta apaka segaune.