Samu 59 - The Keyagana NT and 25 OT books

Kame vayaʼmogimo aliʼa hosu huʼa oʼatesayafeʼmo nunumuʼmo huʼniya gemae

¹ O Gotiʼnimogae, huʼna, kagaemo kame vayaʼnimogi apayapatiʼmo navalo. Kagaemo yagika nateʼnegeʼa aliʼa hosu huʼa oʼnateyo.

² Kagaemo hosu kavaʼmo nehaya vayaʼai apayapatiʼmo hatu maeka nato. Kamitimo neʼapamagiya vayaʼaitegatiʼmo nagufamo alika katika nato.

³ Apakaemo apako fala kiʼa maiʼneʼa kamitimo namagisageʼna falisuvafeʼmo nehae. Apakaemo hosu kame vayaʼmo aliʼa anupa huʼa maiʼneʼa nagaeʼeʼmo kamemo hisayafeʼmo nehae. O Ala kava nene, huʼna, Apakaemo hosu kava anonaʼnilefeʼmo nosafa nagaetegamo fikumo hosu kavaʼmo hisayafeʼmo nehae.

⁴ Nagaemo apakaetegamo hosu kavaʼmo osuʼnovaʼmonanafa nagu nagu huʼa uʼa kamemo hisayafeʼmo alo nehae.

⁵ O Ala kava nene, huʼna, he tika naha mao. Isaleli vayaʼmogi Gotiʼapimogae, huʼna, ani vayaʼaina apako. Kagaemo muki vayaʼai Gotiʼapimogae, huʼna, He tika muki nofi vayaʼe nofi vayaʼeʼmo kayoʼmo apamiyo. Hosu kavaʼmo nehaya vayaʼaifeʼmo kahau huka oʼapato.

⁶ Haniʼilagaʼe haniʼilagaʼeʼmo apakaemo noʼapilegamo aiʼa atagineʼa eʼa taonileʼmo vego huʼa umenitata nehuʼapaeʼmo kala anagagana huʼa keya neʼae.

⁷ Geʼapimoʼmo aveʼmo neʼneya naipegana huno haneʼniye. Apakaemo faipa huʼa apatege apamagigune, huʼa huge nehae. Apakaemo huʼapaeʼmo, Ina lagimo getimo afigae, huʼa nehae.

⁸ Nehayaʼmonanafa Ala kava nene, huʼna, kagaemo kigi huka neʼapatane. Kagaemo, afa gemo nehae, huka nehane.

⁹ Kagaemo lokiyaʼnimae huʼna, Nagaemo kagikaleʼmo aliʼna asaga huʼna yokemo huguve. O Gotiyo, huʼna, kagaemo alagepa huka yagaika natesanageʼna alagepa huʼna maiguve.

¹⁰ Gotiʼnimoʼmo nagaefeʼmo hauʼniyanageno eno naha maegaiye. Gotiʼa kame vayaʼniʼeʼmo kamemo huteno aeno apaka sesiya kavaʼmo alino nave lisigeʼna agegauve.

¹¹ O Ala kava nene, huʼna, kagaemo halegutimo maiʼnane. Kamitimo oʼapamagiyo. Fiku yanageʼa vayaʼnimogi lokiya kavakaeʼmo apake kaniʼa atalegae. Himamukaletiʼmo kame vayakamogi alika hapa faika apatalo.

¹² Apavayaletiʼmo hosu gemo nehayaʼmofeʼmo apakiʼapileʼmo aliʼa asaga hisagekaeʼmo apata fauvo. Lifana gemo huge kasu ge huge nehayaʼmofeʼmae.

¹³ Kagaemo apakaefeʼmo kaipamo leka neʼapatakaeʼmo kamitimo apamagiyo. Alagi alika hano huka apato. Ani kavaʼmo hisanageʼa muki vayaʼmogi agegayana Gotiʼa Isaleli kotegamo yagaino neʼapate, huʼa agegae. Gotiʼa muki mopafi vayaʼaiteʼmo yagaino neʼapate, huʼa agegae.

¹⁴ Haniʼilagaʼe haniʼilagaʼeʼmo apakaemo noʼapilegamo aiʼa atagineʼa eʼa taonileʼmo vego huʼa umenitata nehuʼapaeʼmo kala anagakana huʼa keya neʼae.

¹⁵ Apakaemo neʼyafeʼmo kahauya huliʼa uʼeʼa nehuʼapaeʼmo apamu osuʼnigeʼapaeʼmo kala anagagana huʼa lusi kava huʼa keya neʼae.

¹⁶ Keya neʼaeyaʼmonanafa nagaemo lokiyakalefeʼmo yokemo huguve. Muki neteʼae nateʼaeʼmo alopa gefatiʼmo kagaemo nagaefeʼmo kahauʼniya kavafeʼmo oʼatalesana kavafeʼmo yokemo huguve. Alu kana ya alu kana yaʼmoʼa nagaeteʼmo afole aiʼnigekaeʼmo kagaemo alagepa huka yagaika nateteka lokiya noʼnigana huka maiʼnanageʼna kagaepiʼmo alagepa huʼna maiʼnove.

¹⁷ O lokiyaʼnimae, huʼna, Nagaemo kagikaleʼmo aliʼna asaga huʼna yokemo huguve. Kagaemo alagepa huka yagaika natesanageʼna alagepa huʼna maiguve.