Samu 58 - The Keyagana NT and 25 OT books

Neviniʼa nunumuʼmo hunoʼaeʼmo, O Gotiyo, huno, hosu vayaʼmo agoti huka apato, huno huʼniya gemae

¹ Lapakaemo vayatama vayane, huʼna, Lapakaemo agotileʼmo fatago gemo nehafiye. Lapakaemo muki vayaʼmogi geʼapimo alagepa hutapa alita fako nehafiye.

² Haʼao, lapakaemo hosu kavakeʼmo hisayafeʼmo lapakesamo neʼafiye. Lapakaemo ma mopafi vayaʼmo alita hosu hutapa apatesayafeʼmo aliʼyaʼmo neʼaliye.

³ Hosu vayaʼmogimo itaʼapimogi aliʼa apateʼnaya afinatetiʼmo alagepa kaʼmo ago ataleʼa hosu katekeʼmo neʼvae. Apakaemo itaʼapimogi aliʼa apateʼnaya afinatetiʼmo hosu kavakeʼmo huteʼa aigofe gemo nehae.

⁴ Apakaemo geʼapimo ina kava huno nagaloʼyavemo hosu malasinigana huno haneʼniye. Apakaemo nagaloʼyavemoʼmo agesamo akaniʼnigeno gemo oʼafisaya agufa kava huʼa apakesaleʼmo aliʼa neʼakaniye.

⁵ Mago ageteno afiʼniya vekamoʼmo feliyopa hisiyana ani nagaloʼyavemo alino he tino atesiyana yokemo oʼafigiye.

⁶ O Gotiyo, huʼna, Laiyoni afumoʼmo lusi kava huno kamemo nehiya agufa kava huʼa maiʼnayanagi apaveʼmo aika atafaika alagi aika akaika atalo.

⁷ Aniʼmo nagu nagu huno uno lamino mopafiʼmo hano nehiya kava huʼa afela hesayafeʼmo alika apatalo. Apakaemo atiʼapimo yagaiteʼa haeʼa hatagaiyo.

⁸ Apakaemo ina kava huʼa akapaluʼmo mopafiʼmo faliteno atumo neʼaiya kava huʼa hosugae. Apakaemo mafaʼnemo itaʼapimogi apaipafilagamo nefaliya agufa kava huʼa faliteʼa yegemo oʼagegae.

⁹ Aufe nofiʼmo ata kaesigenoʼaeʼmo ataleʼmo haneʼniya samomo amuko osisiya afinaʼmo hogoteno lusi kava huno alopa yasimoʼmo malage huno muki yaʼmo alinino neʼviya kava huno Gotiʼa aipamo leno apatesiya kavatetiʼmo hosu vayaʼmo apavalelino ugiye.

¹⁰ Gotiʼa hosu kavaʼmo anonaʼapilefeʼmo kayoʼmo apamisigeʼa fatago vayaʼmogi apaketeʼapaeʼmo apamogaga aigae. Apakaemo hosu vayaʼmogi kolaʼapiletiʼmo apaiyaleʼmo falegae.

¹¹ Vayaʼmogimo ina ge huʼapaeʼmo, Fatago vayaʼmogimo alagepa miyaʼapimo alagikeʼmo aligae. Gotiʼa ma mopafi vayaʼmo alagikeʼmo alino fako nehiye, huʼa hugae.