Samu 57 - The Keyagana NT and 25 OT books

Neviniʼa Solotegatiʼmo ataleno aune heʼniya afinaʼmo Gotiʼmo ha maesiyafeʼmo nunumuʼmo huʼniya gemae (1 Sam 24)

¹ O Gotiyo, huʼna, kahau huka nato. Nagupi mafaʼnemoʼa kagaefeʼmo alino amufa nekamiye. Nagaemo kahakumo ulunapiʼmo alagepa huʼna fala kiʼna maime maime neʼvisugenoʼaeʼmo mani hanageke yaʼmoʼmo aeno naga seno nataleno ugiye.

² Nagaemo hogote anaga Gotiʼa naha maesiyafeʼmo muki kavaʼmo nehiya Gotifeʼmo keya aeʼna ge nehuve.

³ Agaemo kokuʼnapatiʼmo alino atesigeno emineno nagufamo alino katino nategaiye. Agaemo aliʼa afepiʼmo neʼnataya vayaʼmo alino afepiʼmo apategaiye. Gotiʼa hau huno natege geʼamo akame huge nehiya kavaʼamo alino nave ligiye.

⁴ Nagupi mafaʼnemoʼmo laiyoni anagaʼmogi folagapiʼmo maiʼniye. Nagaemo ma mopafi vayaʼmo atagana huʼa maiʼnaya vayaʼai folagapiʼmo maiʼnove. Apaveʼmoʼa hayo kana huno hanege kevegana huno hanege huʼniye. Apavenafuʼnamo aveʼmo neʼneya naipegana huno haneʼniye.

⁵ O Gotiyo, huʼna, vayaʼmogimo kagikaleʼmo aliʼa asaga hisageno alagi anagagemo uno haino. Ma mopafi muki haopalegamo ha le konali yakamoʼa aino atagu faino.

⁶ Natafausayafeʼmo aneʼaimo hanagi maleʼnae. Lusi kana yaʼmo aliʼnove. Apakaemo nagaemo cvisuva kateʼmo kafi maleʼnaya kelifiʼmo apakaiʼapimo asagauʼa aiʼnae.

⁷ O Gotiyo, huʼna, Nagaemo naipamo lokiya vaino he tino haneʼniye. Nagupi mafaʼnemoʼmo yokemo huno kagikaleʼmo alino asaga hugiye.

⁸ Nagaemo yegemo auʼmo kaleʼniyapatiʼmo aliʼna he tiʼna ateteʼna gita amagige kuleleʼmo amagige huguve.

⁹ O Ala kava nene, huʼna, alu nofi vaya alu nofi vayaʼmogi folagapatiʼmo kagaefeʼmo mono huguve. Nagaemo muki vayaʼmogi folagapatiʼmo yokemo huʼna kagikaleʼmo aliʼna asaga huguve.

¹⁰ Kahau huka nelatana kavaʼmo atupaʼamoʼmo kokuʼnapiʼmo uno haino aeno aga seʼniye. Muki afinaʼmo gekamo akame nehana kavaʼmoʼa hiyateʼmo uno haiʼniye.

¹¹ O Gotiyo, huʼna, vayaʼmogimo kagikaleʼmo aliʼa asaga hisageno alagi anagagemo uno haino. Ma mopafi muki haopalegamo ha le konali yakamoʼmo aino atagu faino.