Samu 56 - The Keyagana NT and 25 OT books

Neviniʼmo Gotifeʼmo alino amufa amiʼniya gemae. Filisatini kame vayaʼmogi Neviniʼa kalavusi huʼa ateʼnageno Neviniʼa avoʼmo kaeʼniya gemae

¹ O Gotiyo, huʼna, Vayaʼmogimo aliʼa hano huʼa natalesayafeʼmo huʼnayaʼmofeʼmo kahau huka nato. Kame vayaʼnimogimo aliʼa hosu huʼa natesayafeʼmo muki afinaʼmo kame huʼa neʼnatae.

² O hogote anaga Gotiyo, huʼna, Asole vayaʼmogimo kame huʼa neʼnatae. Netepatiʼmo uno haniʼilagamo aliʼa hosu huʼa nategae.

³ Nagaemo haiya kanaleʼmo koli nehufi kagaefekeʼmo naha maegane, huʼna aliʼna amufa kamiguve.

⁴ Nagaemo Gotiʼa hunoʼaeʼmo, lapa maegauve, huno huʼniya Gotifeʼmo ala agimo amiguve. Nagaemo Gotifeʼmo naha maegaiye, huʼna ago huʼnovanageʼna koli osuguve. Vayalafaʼmogimo nagaetegamo na agufa kavaʼmo afaʼa hugae.

⁵ Muki afinaʼaeʼmo apakaemo geʼnimo aiʼa aliʼa afe leʼa aliʼa hosu huʼa neʼatalae. Hosu kavaʼmo nagaetegamo afole aisiyafeʼmo apakesamo afige afige huʼa maiʼnae.

⁶ Apakaemo magokepi aliʼa anupa huteʼa fala kiʼa maiʼneʼapaeʼmo muki nehuva kavaʼnileʼmo yagaiʼa maiʼnae. Kamitimo namagisayafeʼmo fala kiʼa maiʼnae.

⁷ Hosu kavaʼmo nehaya kavatetiʼmo faiʼa kasalo paesafiye. O Gotiyo, huʼna, kaipamo leka apatetekaeʼmo alika afepiʼmo yaga auka apatalo.

⁸ Na magi afinaʼmo kana yaʼmo aliʼnofi huka lekana nepaine. Naunumo alika ani kekafiʼmo lakiyo. Mukukafiʼmo avoʼmo okaeʼnapiye. He, avoʼmo ago kae maleʼnane.

⁹ Nagaemo kagaefeʼmo keya aeʼna ge hisuva afinaʼmo kame vayaʼnimo apaune hegae. Gotiʼa nagae aupaligamo maiʼniye, huʼna ago afiʼnove.

¹⁰ Nagaemo Gotiʼa hunoʼaeʼmo, Kaha maegauve, huno huʼniya Gotina ala agiʼamo amiguve. Nagaemo Ala kava neʼmo polomasi geʼaeʼmo nagesamo afitenaʼaeʼmo agiʼaleʼmo aliʼna asaga huguve.

¹¹ Nagaemo Gotife aliʼna amufa amiʼnovaʼmofeʼmo koli osuguve. Vayalafaʼmogimo na agufa kavaʼmo hugae.

^12-13 O Gotiyo, huʼna, Nagupi mafaʼnemo falisiya kavategatiʼmo alika katika ateʼnanaʼmofeʼmo nagaemo huguve, huʼna polomasi gemo huʼna kaha paiʼnova gemo nagaemo akame hino. Akame huteʼna ala kagikamo kamiguve. Nagaemo Goti aulagaleʼmo afaʼa maiʼnaya vayaʼmo ha le yategamo umenitata hisuvafeʼmo kagaemo lokiya vaika nateʼnanageʼnaeʼmo asagauʼna oʼaiʼnove.