Samu 55 - The Keyagana NT and 25 OT books

Ao vekamo ataleʼniya vekamoʼmo nunumuʼmo huʼniya gemae

¹ O Gotiyo, huʼna, kagaemo kagetofa huʼneka nunumuʼmo geʼnimo afiyo. Apaka neteya vayaʼmo neʼyafeʼmo aukaya nehaya kava huʼna kagaefeʼmo keya neʼauva geʼnimo afisanafeʼmo fala kika oʼmaiyo.

² Kagaemo nunumuʼmo geʼnimo alagepa huka afiteka nagae geleʼmo aeka atagaina huvo. Aliʼnova kana yaʼmoʼa alino hosu huno nateʼnigeʼna alagepa huʼna oʼmaiʼnove.

³ Kame vayaʼnimogimo lokiya gemo nehayaʼmofeʼmo koli huʼna maiʼnove. Hosu vayaʼmogimo hanageke yaʼmo neʼnamiye. Apakaemo nagaefeʼmo apaini nehagenoʼaeʼmo apaipamo leno neʼnate.

⁴ Nagaemo apakaefeʼmo lusi kava huʼna koli huʼna maiʼneʼna falisuva kavafeʼmo nagesamo afiʼnogenoʼaeʼmo naipamoʼmo kana huʼniye.

⁵ Koli nehugenoʼaeʼmo nagufamoʼmo lusi kava huno atete nehiye. Ani kavaʼmoʼa naipafiʼmo haneʼnigeʼna hosu kava huʼna aliʼna namalagiʼnove.

⁶ Nagaemo mago namamo maiʼnovesinana haleliʼnuʼna mago maiʼna haga leʼna maisuva kofeʼmo kahauya huʼna mauvesine.

⁷ Nagaemo alagi haleliʼnuʼna afagitegamo kaʼmo kotegamo uʼna mauvesine.

⁸ Nagaemo malage huʼna haleliʼnuʼna lokiya yasiʼe alopa koʼeʼmo aisiya afinaʼmo mago fala kiʼna maisuva kofeʼmo kahauya huteʼna fala kiʼna mauvesine.

⁹ Nagaemo vayaʼmogimo taonifiʼmo kame huge kaveta apamagige huʼa nehageʼna apakeʼnove. Alika hosu huka apato. Apatenegeʼa alu apake alu apakemo ika ika hiyo.

¹⁰ Apakaemo felugaʼe haniʼilagaʼeʼmo taonile vego huʼnaya yafa kegiʼyaleʼmo umenitata nehae. Taonifiʼmo alopa hanageke kavaʼe hosu kavaʼapiʼeʼmo afole aiʼniye.

¹¹ Taonifiʼmo muki haopalegamo vayaʼmogimo aigofe gemo huge kumayaʼmo alige aliʼa afepiʼmo apatege kaveta huge huʼa nehae.

¹² Mago kameʼnimo huno faipa huno nateʼniesinana nagaemo kanalene, afaʼa aliguve, huʼna huvesine. Mago vekamo nagaefeʼmo aini huʼniya vekamoʼmo alino afepiʼmo nateʼniesinana nagaemo afaʼa uʼna fala kiʼna maiʼnovesine.

¹³ Haʼao, ani agufa vayaʼmogi nagaetegamo hosu kavaʼmo osuʼnayaʼmonanafa kagaikageʼmae. Hogoteka kagaemo navagi vekamo maige nao vekamo maige nafaluʼnimogamo maige huʼnane.

¹⁴ Hogotetaʼa laʼagaemo magokepi alagepa hutaʼa kege huge asole vayaʼeʼmo magokepi Goti mono noʼafiʼmo uge huʼnoʼae.

¹⁵ Kagaemo kameʼnimogi apatenegeʼa faliyo. Apatenegeʼa malage huʼa faliʼnaya vayaʼaitegamo lamiyo. Hosu kavaʼmo apaipafiʼmo hanege noʼapifiʼmo hanege huʼniyaʼmofeʼmae.

¹⁶ Apakaetegamo ani kavaʼmo afole aigiyaʼmonanafa nagaemo Gotifeʼmo keya aesugeno agaemo Ala kava neʼmoʼa nagufamo alino katino nategaiye.

¹⁷ Netepinagi alopa yegefinagi haniʼilagaʼenagi huʼna nagaemo nunumuʼmo huʼna alopa gefatiʼmo keya aesugeno afigiye.

¹⁸ Asole vayaʼmogimo nagaeʼeʼmo kamemo huʼnayaʼmonanafa kamefatiʼmo nagufamo alino katino natesigeʼna alagepa huʼna afaʼa maiguve.

¹⁹ Gotiʼa muki afinaʼmo kini vekamo maiʼniye. Agaemo akeyaʼvilagatiʼmo yagaime yagaime eno neʼyagaiya Gotiʼmo nunumuʼmo geʼnimo afiteno kame vayaʼnimogi alino hosu huno apategaiye. Apakaemo hosu kavaʼapimo oʼataleʼa maiʼnaya kava huʼapa maiʼneʼa Gotifeʼmo koli nosae.

²⁰ Ani nagae nao vekamoʼmo agaiʼa ao vayaʼeʼmo kamemo huʼniye. Agaemo lagaeʼeʼmo kotalakemo alagepa huta magokepiʼmo lokaeta maisuna polomasi hu maleʼniya gemo amagino ataleʼniye.

²¹ Agaemo avayaletiʼmo haga gemo huʼniyaʼmonanafa aipafiʼmo agesamo afinoʼaeʼmo apakaeʼeʼmo kamemo huguve, huno agesamo afiʼniye. Geʼamoʼmo lagaemo laipamoʼmo falu hisigeta maisuna gemo laha paiʼniyaʼmonanafa ani gemoʼmo lusi kava huno aveʼmo neʼneya naipekana huno laisiyafeʼmo haneʼniye.

²² Kagaemo muki neʼalina kana yaʼmo Ala kava neteʼmo maleʼnegenoʼa agaemo aliteno.

²³ O Gotiyo, huʼna, Kagaemo alika apatalesanageʼa faligae. Kame nehaya vayaʼe aigofe gemo nehaya vayaʼeʼmo aupa afinaʼmo maiteʼa faligae. Faligayaʼmonanafa nagaemo aliʼna amufa kamiguve.