Samu 54 - The Keyagana NT and 25 OT books

Nunumuʼmo huʼnigeno Gotiʼa kame vayaʼai apayapatiʼmo apakufamo alino katino apateʼniya gemae

¹ O Gotiyo, huʼna, himamukaletiʼmo nagufamo alika katika nato. He, lokiyakaletiʼmo hosu vayaʼai apayapatiʼmo nagaemo navalo.

² O Gotiyo, huʼna, nunumu geʼnimo afiyo. Nunumuʼmo nehuvanagi kagetafo huʼneka afiyo.

³ Alu nofi vayaʼmogimo he tiʼa namagigefeʼmo huʼnae. Apakaemo Gotifeʼmo koli osuge apakesamo oʼafige nehae.

⁴ Apakaemo namagigefeʼmo apakesamo neʼafiyaʼmonanafa Gotiʼa naha maegaiye. Ala kava neʼmoʼa naha maesigeʼna alagepa huʼna afaʼa maiguve.

⁵ Agaemo hosu kavaʼapimo anonaʼapilefeʼmo miyaʼapimo apamigiye. O Gotiyo, huʼna, fatago kavaʼmo nehanaʼmofeʼmo alika hano huka apatalo.

⁶ Ala kava nene, huʼna, Nagaemo ofalinimo kamisuvafeʼmo lusi kava huno nahauʼniye. Kagaemo alagepa kavaʼmo nehanaʼmofeʼmo nagaemo alagi kahaoke hegauve.

⁷ Kagaemo muki hanageke kavapatiʼmo nagufamo alika katika nateʼnane. Nagaemo ageʼnovana nahauʼniya kavaʼmo kame vayaʼnilegamo afole aiʼnigeʼna ageʼnove.