Samu 51 - The Keyagana NT and 25 OT books

Neviniʼa Matasimaʼeʼmo kumai kavaʼmo huʼnigeno mago polofeti vekamo Netaniʼmo hosu kavaʼmo huʼnane, huno ha paiʼnigeno huʼniya yokemae

Neviniʼa Matasimaʼeʼmo kumai kavaʼmo huʼnigeno mago Goti gemoaeno hakalo nehiya vekamo Netaniʼmo hosu kavaʼmo huʼnane, huno ha paiʼniya afinaʼmo huʼniya yokemo haneʼniye.

¹ O Gotiyo, huʼna, kahau kayamopafiʼmo kahauʼnigeka hapa neʼmana kava huka kahau huka nato. Lusi kava huka kahau huka neʼapatana kava huka gekamo amagiʼna neʼatalova kavaʼnimo aeka kalo paeka atalo.

² Muki hosu kavaʼnimo alagi aeka kalo paeka atalo. Hosu kavaʼnimo alika ataleteka alika alagepa huka nato.

³ Nagaemo ina hosu kava huʼnove, ina hosu kava huʼnove, huʼna aeʼna hakalo nehuve. Nagaemo hosu kavaʼnimo ageʼnogenoʼaeʼmo muki afinaʼmo ani hosu kavaʼnimoʼmo naulagaleʼmo afole aiʼnigeʼna ageʼnove.

⁴ Kagae kaulagaleʼmo hosu kavakeʼmo huʼna maiʼnove. Nagaemo hosu kavaʼmo huʼnovaʼmofeʼmo kagaemo fatago kavaʼmo huka agotimo huka nateʼnane. Kagaemo nagaefeʼmo fatago gemo hukaeʼmo, hosu kavaʼmo huʼnane, huka huʼnane.

⁵ Vae, huʼna, itaʼnimoʼmo nagae aipaguʼeʼmo aepa faiʼniya afinaʼmo hosu kavapiʼmo maiʼnove. Itaʼnimo aipafiʼmo maiʼneʼnaeʼmo hosu mafaʼnemo maiʼnove.

⁶ Vae, huʼna, lama ge kavaʼmo naipafiʼmo hanesiyafeʼmo kahauʼniyaʼmofeʼmo ageʼna aeto hisuvafeʼmo naipafiʼmo alika naya malegane.

⁷ Aika fuli fuli huka faleka nategeʼnao yaveyave vekamo maino. Sese huka nategeʼnao yaveyave yafakana huʼna yaveyaveʼageʼmo huʼna magoʼe huʼna yaveyave vekamo maino.

⁸ Falu fala gemo huka naha paigeʼnao namogaga aino. Nagupi mafaʼnemo aeka lata paiʼnanaʼmonanafa halate namogaga aiguve.

⁹ Hosu kavaʼnimo oʼageka aika afe leka maiyo. Muki hosu kavaʼnimo aeka kalo paeka atalo.

¹⁰ O Gotiyo, huʼna, yaveyave naipamo alo huka nateteka gekamo afisuvafeʼmo nauneʼnameʼmo alika saufa nauneʼnameʼmo hamaleka ato.

¹¹ Kagaetegatiʼmo alika naha faika oʼnataleka kaote Kaunekameʼmo nagaepatiʼmo oʼaliyo.

¹² Hogoteka nagufamo ago alika katika nateʼnanageʼnaeʼmo namogaga aiʼnovanagi halate namogaga aisuva kavaʼmo alika namiyo. Hatu maeno natesiya Kaunekametetiʼmo natafauka maiyo.

¹³ Ani kava hisanageʼnaeʼmo gekamo amagiʼa neʼatalaya vayaʼaifeʼmo ina kavaʼmo huvo, huka nehana gekamo aliʼna apaya malesugeʼapaeʼmo aiʼa afe leʼa kagaetegamo egae.

¹⁴ O Gotiyo, huʼna, nagaemo mago vekamo kamitimo amagiʼnove. Ani hosu kavaʼnimo alika atalo. Alika atalesanageʼnaeʼmo, nagufamo ago alino katino nateʼniye, huʼna huteʼna yokemo huguve.

¹⁵ Ala kava nene, huʼna, navayamo alika aka huka nategeʼnao kagikaleʼmo aliʼna asaga huʼna kateno.

¹⁶ Nagaemo ofalinimo kamisuvafeʼmo kahauʼniyesinana kamuvesine. Nagaemo afumo amagiʼna atafiʼmo kaeʼna kamisuvana amuse osugane.

¹⁷ Afu ofalinimo kamisuvafeʼmo okahauʼnifa hosu kavaʼnieʼmo naipamo kana hisiyafeʼmo kahauʼniye. O Gotiyo, huʼna, hosu kavaʼnieʼmo naipamo kana huge yulagefa aige hisuva kavafeʼmo kahauʼniye.

¹⁸ Saiyoni kotega vayaʼaifeʼmo kagesamo afiteka hapa mao. Yulusalemu taonifi yafa lafi kegiʼyamo halate hisayafeʼmo hapa mao.

¹⁹ Ani kava hisanageʼapaeʼmo alagepa ofalinimo atafi nekaya ofalinimo kamisageka amuse huka apategane. Ani afinaʼmo ve pulumakamo amagiʼa hiʼyalamuteʼmo atafiʼmo kaeʼa kamigae.