Samu 50 - The Keyagana NT and 25 OT books

Gotiʼa agoti huno apatesiya kavafeʼmo huʼniya gemae

¹ Gotiʼa Ala kava neʼmo lokiyaʼaʼe vekamoʼmo ge huʼniye. Agaemo yegemo haine neʼeya kotegamo maiʼnaya vayaʼe yegemo uno lamino nefaleya kotegamo maiʼnaya vayaʼefeʼmo keya aeno ge huʼniye. Muki ma mopafi vayaʼaifeʼmo keya aeno ge huʼniye.

² Gotiʼa Saiyoni taonimo hogote konali taonifatiʼmo aeno ha legaiye.

³ Gotitimoʼa eminenoʼaeʼmo ge osuno afaʼa oʼmaigiye. Atamo lelino uno hogotetesigeno eminegaiye. Alopa yasimo alige ko aige hulino haopaʼaleʼmo egaiye.

⁴ Agaemo vayaʼageʼmo alino fako huno apatesiyafeʼmo kokuʼnapi vayaʼe ma mopafi vayaʼefeʼmo ge hugiye.

⁵ Ina ge huno hapa paigiye. Lapakaemo uta naote vayaʼnimo apavaleliteta nagaeteʼmo alita anupa huta apateyo. Sipisipimo amagiʼa ofalinimo namiʼnaya kavatetiʼmo nagaeʼeʼmo kotalakemo hu maleʼnaya vayaʼnimo apavaleta alita anupa huta apateyo.

⁶ Kokuʼnapiʼmo maiʼnaya vayaʼmogimo huʼapaeʼmo, alagi fatago vekamo maiʼniye. Agaiʼageʼmo alino fako huno apategaiye, huʼa hugae.

⁷ O vayaʼnimogitapae, huʼna, afiyo. Nagaemo gemo hugesuve. O Isaleli vayaʼmogitapae, huʼna, Nagaemo agoti huʼna lapategauve. Nagaiʼnigeʼmo alagi Gotiʼnamo maiʼnove. Gotitapimoʼnamo maiʼnove.

⁸ Lapakaemo muki afinaʼmo naulagaleʼmo afumo amagitapa ofalinimo namige atafiʼmo kaege nehaya kavatapilefeʼmo agoti huʼna olapategauve.

⁹ Nagaemo notapifiʼmo maiʼnaya pulumakamo apavaleliʼna oʼuguve. Kegiʼyafatiʼmo memetapimo apavaleliʼna oʼuguve.

¹⁰ Haʼao, muki yahaofilaga maiʼnaya afu anagaʼmo nagaiʼni afumo maige tauseniʼa aveleʼmo maiʼnaya pulumaka anagaʼmo nagaiʼni pulumakamo maige huʼnayaʼmofeʼmae.

¹¹ Muki aveʼaleʼmo maiʼnaya nama anagaʼe muki kotega maiʼnaya afela afu anagaʼeʼmo nagaiʼni nama anagaʼe afu anagaʼeʼmo maiʼnae.

¹² Ma mopaʼe muki ma mopafi vayaʼe yaʼeʼmo nagaiʼni vayaʼmo maige yaʼmo hanege huʼniyaʼmofeʼmo naga tesigeʼnaeʼmo lapa opaiguve.

¹³ Nagaemo pulumakamo ameʼamo nesufiye. Mememo kolaʼamo nesufiye.

¹⁴ Gotifekeʼmo hao ke hesaya agufa ofalinimo amiyo. Lapakaemo ani kavaʼmo hugune, hutapa ha paiʼnaya gemo akame hutapa ani agufa ofalinimo hogote vekamo anaga vekamo amiyo.

¹⁵ Hanageke yaʼmo alisaya afinaʼmo nagaefekeʼmo ge higeʼnao alagepa huʼna lapa maesugetapa ala nagiʼnimo namigae.

¹⁶ Gotiʼa ani gemo huʼniyaʼmonanafa hosu vayaʼaifeʼmo, Na kava higetapaeʼmo avoʼmo kae maleʼnaya keʼaepa geʼnimo aeta hakalo hutapa hapa paiʼnae. Na kava higetapaeʼmo kotalake geʼnimo nehae.

¹⁷ Lapakaemo aliʼna lapaya malesuvafeʼmo alagi olapauʼniye. Geʼnimo alita lapakamelegamo yaga auta neʼatalae.

¹⁸ Lapakaemo kumaya neʼaliya vayaʼmo apaketetapaeʼmo magoke lapaipa lapakesamo aliʼnae. Kumai kavaʼmo nehaya vayaʼai apafaluʼapimogitapamo maiʼnae.

¹⁹ Muki afinaʼmo hosu gemo huge aigofe gemo huge hutapa maiʼnae.

²⁰ Itopaleʼmo maiʼnetapaeʼmo konagatapimogifeʼmo apakamelega gemo nehae. Lapakaemo itatapimogi mafaʼneʼapieʼmo huta faipa hutapa neʼapatae.

²¹ Ani agufa kavaʼmo huʼnageʼnaeʼmo ge osuʼna afaʼa maiʼnove. Lapakaemo nagaefeʼmo, lagaekana huno maiʼniye, hutapa lapakesamo afiʼnayaʼmonanafa hosu kavaʼmo huʼnae, huʼna lapa paiguve. Nagaemo hosu kavatapimo lapaulagaleʼmo aliʼna kale kaeʼna lapave liguve.

²² Gotifeʼmo lapake kaniʼnisiya vayaʼmogitapae, huʼna, geʼnieʼmo lapakesa afifi hutapa maiyo. Fiku yanageʼna lahapaeʼna katali katalu hisugeʼapaeʼmo lapa maesaya vayaʼmo oʼmaigae.

²³ Nagaefeʼmo, alagepa kavaʼmo huʼniye, huʼa nehaya vayaʼmogimo ala nagiʼnimo neʼnamiye. Nehaya kavaʼapilefeʼmo apakesa afifi huʼa maiʼnisaya vayaʼmo Gotiʼa apakufamo alino katino neʼapateya kavaʼamo aliʼna apave liguve.