Samu 5 - The Keyagana NT and 25 OT books

Netepiʼmo nunumuʼmo huʼniya gemae

¹ O, Ala kava nene, huʼna, geʼnimo afika alagepa huka afiyo. Naipafiʼmo nagesa afifi huʼna neʼmauvanagi kaipamo namiyo.

² Ala kini vekaʼnimo Gotiʼnimogae, huʼna, kagaefekeʼmo nunumuʼmo huguvaʼmofeʼmo keya aeʼna ge hisuva geʼnimo afiyo.

³ Nagaemo muki afinaʼmo netepiʼmo ge hisugeka afigane. O, Ala kava nene, huʼna, Netepiʼmo nunumuʼmo hisuva geʼnimoʼmo kevemo haegekana huʼna kahaeteʼna aliʼna maku huʼna kagegauve.

⁴ Kagaemo hosu kavafeʼmo amuse nosana Gotigamo maiʼnane. Hosu kavaʼmo kagae kahaopaleʼmo alagi lokaeno ohanegaiye.

⁵ Apakiʼapileʼmo aliʼa asaga nehaya vayaʼmo kaulagaleʼmo he tiʼa oʼmaigae. Kagaemo muki hosu kavaʼmo nehaya vayaʼaifeʼmo kaini nehane.

⁶ Kagaemo aigofe gemo nehaya vayaʼmo alika apagoʼya lagauka apatalegane. Ala kava neʼmoʼa vayaʼmo nehapaya vayaʼe humi neʼapataya vayaʼefeʼmo avenatuʼnaʼmo heno atalegekana huno neʼmaiye.

⁷ Ani kava huka maiʼnanaʼmonanafa nagaefeʼmo muki kahau huka neʼnatana kavakaletiʼmo nokafiʼmo uʼna haiguve. Kagaefekeʼmo koli huteʼnaeʼmo aote mono nokamo ageteʼna mono huguve.

⁸ O, Ala kava nene, huʼna, kame vayaʼnimo maiʼnayaʼmofeʼmo fatago kavakafiʼmo nayateʼmo alika navalelika uvo. Naulagamo kakalekeʼmo alika api aika nato.

⁹ Lama gemo apavayafiʼmo alagi ohaneʼniye. Apaipafiʼmo hosu kavaʼageʼmo haneʼniye. Lugoʼapimo kano kelimo aliʼa halo neʼaigeno atu neʼaiya kano keligana huno haneʼniye. Apavenafuʼnaletiʼmo hapaisiya agufa gemo nehae.

¹⁰ O Gotiyo, huʼna, Vaiʼmo apamiyo. Alika apatalegeʼapao ani kavaʼmo hugune, huʼa apakesamo neʼafiya kavategatiʼmo ataleʼa asagauʼa aiyo. Kagaetegamo hosu kavaʼmo huteʼa gekamo ago amagiʼa ataleʼnayaʼmofeʼmo asole hosu kavaʼapifiʼmo maiʼnagi alika yaga auka apatalo.

¹¹ Apataleganaʼmonanafa kagaefekeʼmo aliʼa amufa kamiʼnaya vayaʼmogi muki afinaʼmo alopa gefatiʼmo huteʼa apamogaga aiyo, kagaemo alagepa huʼa maisayafeʼmo aika apati kaeʼnanaʼmofeʼmae. Kagikaeʼmo hapau apayamopafiʼmo hapauʼnisiya vayaʼmogimo kagaepiʼmo apamogaga aiyo.

¹² O Ala kava nene, huʼna, kagaemo fatago vayaʼmo hapa maesanageʼa alagepa huʼa maigae. Kagaemo haleguʼapigana huka faika vego huka apategane.