Samu 49 - The Keyagana NT and 25 OT books

Hosu vayaʼmo alagepa huʼa oʼmaisaya kavafeʼmo huʼniya gemae

¹ Muki vayaʼmogitapae, huʼna, afiyo. Muki ma mopafiʼmo maiʼnaya vayaʼmogitapamo mani gemo afiyo.

² Ala apaki vayanagi apaki ohaneʼnisiya vayanagi kagemi yatapiʼe vayanagi kagemi yatapimo ohaneʼniya vayanagi hutapa afiyo.

³ Nagaemo naipafiʼmo nagesa afifi huʼna afiteʼnaeʼmo agegauve. Navayafatiʼmo alagepa gemo lapa paisugetapa afitetapaeʼmo agegae.

⁴ Gotiʼa aeno kalafefa gefatiʼmo hisigeʼna afisuvafeʼmo maiʼneʼna afiguve. Nagaemo ani gemo alino fala ki maleʼniya gemo aeʼna hakalo huʼna lapa paiguve.

⁵ Hosu vayaʼmogimo faiʼa vego huʼa nateʼneʼa namagisayafeʼmo nehisageʼnaeʼmo koli osuguve.

⁶ Apakaemo kagemi yaʼapieʼmo aliʼa amufa amige alopa kagemi yatimo haneʼniye, huʼa huge nehaya vayaʼmogimo

⁷ konagaʼapimo falisaya kavategatiʼmo afaʼa miya faiʼa oʼapategae. Konagaʼapimogimo alagepa huʼa afaʼa maisayafeʼmo Gotiʼa monimo amiteʼa miya faiʼa oʼapategae.

^8-9 Apakupi mafaʼnemo miya faisaya yaʼmo alopa monileʼyaʼmo aeno agaseʼniya yaʼmo haneʼniyaʼmofeʼmae. Apakaemo kelifiʼmo uʼa lamiʼa oʼmaiʼa muki afinaʼmo afaʼa maige maige huʼa maisayafeʼmo afaʼa miya faita apategaune, huʼa hugayana uʼa haiʼa metalegae.

¹⁰ Apakaemo ago apakeʼnayana ageteʼa afiʼnaya vayaʼmo ago nefaliya kava huʼa muki vayaʼmo oʼafiʼnaya vayaʼe negi vayaʼeʼmo faliʼapaeʼmo kagemi yaʼapimo ataleʼa faliʼnageʼapaeʼmo alu vayaʼmogi neʼaliye.

¹¹ Apakaemo apaipafiʼmo, notimo muki afinaʼmo afaʼa hanesigeno neʼmauna kotimo afaʼa hanege hanege huno hanegaiye, huʼa apakesamo neʼafiye. Mopaʼapileʼmo apakiʼapimo neʼatayaʼmonanafa

¹² ala apaki vayaʼmo afu anagaʼmo afaʼa oʼmaiʼa nefaliya agufa afugana huʼa maiʼnae.

¹³ Apakaemo negi nagi apakesamo neʼafigeʼapaeʼmo mafaʼne anagaʼapimogimo alagi lama gegeʼmo nehae, huʼa huteʼa apakame nehae.

¹⁴ Sipisipimo faliʼnaya kava huʼa nefaligeʼa kanolufiʼmo kiʼa neʼapatae. Sipisipileʼmo yagaiʼnaya kava huno falisaya kavaʼmoʼa yagaino apategaiye. Lama ge vayaʼmogimo kotilamisiyapiʼmo yagaiʼa apategae. Kanolufiʼmo koʼapimo haneʼniyanageno alagepa apakufaʼe konali yaʼapiʼeʼmo kasaligiyaʼmonanafa

¹⁵ Gotiʼa kanolumo lokiyaʼafatiʼmo nagupi mafaʼnemo miya faino navalegaiye.

¹⁶ Mago vekamoʼmo alopa kagemi yaʼamo haneʼnisigeʼapaeʼmo afamo anagaʼamogi ala apakimo alisagetapaeʼmo koli osiyo.

¹⁷ Falisiya afinaʼmo kagemi yaʼamo alinino oʼugiye. Muki konali yaʼamoʼmo agaeʼeʼmo magokepi lokaeno uno olamigiye.

¹⁸ Afaʼa maiʼnenoʼaeʼmo agaiʼamo alino auleno neʼate, huno nehiye. He, lapakaitapimo alagepa hutapa lapa maesageʼapaeʼmo vayaʼmogimo ala lapakitapimo lapamigae.

¹⁹ Ani vekamoʼmo aginago vayaʼmo maiʼnaya kotegamo uno lamino hanipiʼmo maiʼnenoʼaeʼmo ha le yaʼmo oʼagegaiye.

²⁰ Ala apakimo aliteʼa alagepa huʼa ageteʼa oʼafiʼnisaya vayaʼmo faliʼnaya agufa afugana huʼa maiʼnae.