Samu 48 - The Keyagana NT and 25 OT books

Gotiʼa alagepa taoniʼamo haneʼniye huno huʼniya gemae

¹ Ala kava neʼmoʼa ala agiʼamo aliʼniye. Lagaemo alino aote maleʼniya aveleʼmo eta haiteta Gotitimo taoniʼafiʼmo uta haita agiʼaleʼmo alita asaga huta ategetao.

² Ani avemo Saiyoni avemo kanale yatala avemo haneʼniye. Muki ma mopafi maiʼnaya vayaʼmogimo ani aveeʼmo apamogaga neʼaiye. Hoga haopalega haneʼnigeno Ala kini vekamo taoniʼamo ani aveleʼmo haneʼniye.

³ Gotiʼa ani taonifiʼmo maiʼneno taonifiʼmo neʼmaiya vayaʼmo hapa neʼmae.

⁴ Afiyo, huʼna, kini vayaʼmogimo Saiyoni taonifiʼmo kame hisayafeʼmo aliʼa anupa huʼa maiʼneʼa taoni haopaleʼmo eʼnae.

⁵ Apakaemo ageteʼapaeʼmo hapau aiʼnae. Apakaemo koli huteʼa malage huʼa ataleʼa uʼnae.

⁶ Eʼa apamoʼya aiʼa maiʼnae. Aʼnemogimo mafaʼnemo aliʼa apatesayafeʼmo apakafu nekiya kava huno apakafu kiʼniye.

⁷ Kagaemo yegemo haine neʼeya kotegatiʼmo alopa yasimo aliyo, huka huʼnanageno aliteno Tasisi vayaʼai alopa sipiʼapimo aeno atagiʼniye.

⁸ Gotiʼa akeyaʼvilagamo ani agufa kavaʼmo huʼniya ava gemo afiteta Gotitimoʼmo taoniʼafiʼmo ageʼnone. Ala kava neʼmoʼa asole vayaʼaiteʼmo yagaino neʼapateya vekamoʼmo taoniʼafiʼmo lokiya kavaʼamo huʼnigeta ageʼnone. Gotiʼa taoniʼamo alino lokiya vaino atesigeno muki afinaʼmo afaʼa hanege hanege huno hanegaiye.

⁹ O Gotiyo, huta, Lagaemo mono nokafiʼmo maiʼnetaeʼmo lagaefeʼmo kahau kayamopafiʼmo kahauge kahauge huno neʼmaiya kavafeʼmo lagesamo afiʼnone.

¹⁰ O Gotiyo, huta, Ala kagikamo haneʼniyaʼmofeʼmo muki ma mopafi vayaʼmogimo ala kagikamo nekamiye. Lamaga kayatetiʼmo fatago kavaʼmo nehane.

¹¹ Kagaemo alagepa huka alika fako nehanaʼmofeʼmo Saiyoni aveleʼmo maiʼnaya vayanagi Yuta nofi vayaʼai aʼmafaʼne anagaʼapigi huʼa apamogaga aigae.

¹² Saiyoni avefiʼmo umenitata nehutapa taonile yafa lafi kegiʼyaleʼmo faita vego huʼnetapa kegiʼyaleʼmo haneʼniya yatala nofeʼmo lekana paiyo.

¹³ Lapakaemo afole aisaya vayaʼaifeʼmo hapa paisayafeʼmo taonileʼmo lokiya yafa lafi kegiʼyaeʼmo lapakesamo afiyo. Lapakaemo taonifiʼmo lokiya nofeʼmo lapakesa afifi hutapa maiyo.

¹⁴ Ani Gotiʼa muki afinaʼaeʼmo Gotitimoʼmo maige maige huno maigiye. Agaemo uno hogoteteno visuna kaʼmo alino lave lime lime neʼvisigeta faligune.