Samu 46 - The Keyagana NT and 25 OT books

Gotiʼa lagaeʼeʼmo magokepi lokaeno maiʼniye, huno huʼniya gemae

¹ Uta fala kita neʼmauna kotimo Gotiʼmae. Lokiyatimo Gotiʼmae. Hanageke yaʼmo afole neʼaisigenoʼaeʼmo laha maesiyafeʼmo lahaopaleʼmo alo huno maiʼniye.

^2-3 Ani kava huno maiʼniyaʼmofeʼmo imima alige avemo aino nakupaeno emineno solovala anipiʼmo asagauno aisigeno solovala aniʼmo aino holakau holakau hisigeno alopa agemo aige avemoʼa kanage huge nehisigetaeʼmo koli osugune.

⁴ Gotiʼa Ala kava neʼmo aeno apakaseʼniya vekamo maiʼniya aote taonifiʼmo maiʼnaya vayaʼmogimo mago aniʼmo uno nelamisigeʼapaeʼmo apamogaga aigae.

⁵ Gotiʼa ani taonifiʼmo maiʼniyanageno ani taonimo afaʼa hanegaiye. Gotiʼa kotilamisiyapiʼmo eno taonifiʼmo maiʼnisaya vayaʼmo hapa maegaiye.

⁶ Alu nofi vayaʼe alu nofi vayaʼeʼmo apayamukiki huʼa kame huteʼapaeʼmo yagaiʼa neʼapataya vayaʼe vayaʼapiʼeʼmo alagi asagauʼa aiʼnae. Gotiʼa alopa gefatiʼmo ge nehigenoʼaeʼmo lokiyaʼapimo alagi hano huʼniye.

⁷ Ala kava neʼmoʼa asole vayaʼaiteʼmo yagaino neʼapateya vekamoʼmo lagaeʼeʼmo magokepi lokaeno maiʼniye. Yekopu Gotiʼamoʼmo uta fala kita neʼmauna kotigana huno maiʼniye.

⁸ Eta Ala kava neʼmo aliʼyaʼamo ageyo. Mopafiʼmo nokoʼmo aeno halagape vaiʼniye.

⁹ Agaemo muki ma mopafiʼmo kamemo nehaya kavaʼmo alino hano huno neʼatale. Agaemo ati keveʼapimo alino lo aeno ataleteno alini uʼa kame nehaya talalaʼapimo alino atafiʼmo nekae.

¹⁰ Gotiʼa hunoʼaeʼmo, muki kavaʼamo ataletapa afaʼa maiʼnetapaeʼmo, Gotigamo maiʼnane, hutapa nageyo, huno nehiye. Nagaemo muki alu nofi vaya alu nofi vayaʼaitegatiʼmo ala nagiʼnimo aliguve. Muki ma mopafiʼmo maiʼnaya vayaʼaitegatiʼmo ala nagiʼnimo aliguve, huno huʼniye.

¹¹ Ala kava neʼmoʼa asole vayaʼaiteʼmo yagaino neʼapateya vekamoʼmo lagaeʼeʼmo magokepi lokaeno maiʼniye. Yekopu Gotiʼamoʼmo afaʼa uta fala kita neʼmauna kotigana huno maiʼniye.