Samu 45 - The Keyagana NT and 25 OT books

Ala kava neʼmoʼa aʼmo aliʼniya kavafeʼmo huʼniya gemae

¹ Alagepa gemoʼmo naipafiʼmo havai teteno aino vali nelamigeʼnaeʼmo kini vekaekeʼmo ava gemo nehuve. Alagepa huno avoʼmo nekaeya vekamoʼmo avoʼmo kaesiyafeʼmo avo kayoʼmo aliteno alo huno neʼmaiya kava huʼna navayafatiʼmo gemo hisuvafeʼmo alo huʼna maiʼnove.

² Kagaemo aeto agufa kanale vekamo maiʼneka muki vayaʼmo alagi aeka apakaseka maiʼnane. Gotiʼa fiku hapa maeno neʼapamiya gemo kavayafiʼmo maleʼnigeka ani gemo nehane. Gotiʼa muki afinaʼmo alino auleno neʼateyaʼmofeʼmae.

³ Lokiya vekae, huʼna, kagaemo ha le konali yakaʼe ala kagikaleʼefeʼmo hapau aiteʼa amuse huʼa nekataya vekamo maiʼnananagi naipekamo alika mapalukafiʼmo anoʼafiʼmo faika falu kaeteka uka kamemo huvo.

⁴ Kagaemo ala kagikamo alika apavelitekaeʼmo lama gekamogi yagu yaga kavakamogi fatago kavakamogi huka ha maeka alika afole aika ato. Alika afole aika atesanafeʼmo hosileʼmo fai maiʼneka uka kamemo huka aeka apakaso. Lokiyakaletiʼmo kame huteka hapau aisaya agufa kavaʼmo hugane.

⁵ Kevekamo lusi kava huno akoʼya huʼniya kevemo haneʼniyanageka kame vayakamogi apaipafiʼmo nehapanageʼapaeʼmo kaiyafiʼmo asagauʼa neʼaiye.

⁶ O Gotiyo, huʼna, muki afinaʼmo yagaika apatege apatege huka maigane. Fatago kavaʼmo huka vayakaleʼmo alagepa huka yagaika neʼapatane.

⁷ Kagaemo alagepa kavafeʼmo lusi kava huno kahauʼnigeno hosu kavafeʼmo kaini huʼnane. Ani kavaʼmo nehanaʼmofeʼmo Gotiʼa Gotikamoʼmo uvelimo lakino katetenoʼaeʼmo lekana paino kateʼniyanageka alagepa huka kamogaga aika maisanafeʼmo magoʼe huno kamiʼnigeka kafalukamogimo aeka apakaseka alagepa huka maiʼnane, huno ha paiʼniye.

⁸ Alagepa atumo neʼaiya yaʼmo agiʼamo meyagi alosigi kasiyagi huno kukenakaleʼmo haneʼnigeno alagepa atumo neʼaiye. Alagepa noʼmo kini vekamo nopiʼmo konali aliʼa ateʼnaya nopiʼmo yokemo huʼnagekaeʼmo kamogaga aiteka emikeʼnane.

⁹ Ala apaki aʼne anagakamogiʼeʼmo kini vayaʼai aʼmafaʼneʼapimo maiʼnae. Akamoʼmo hogote goli yafatetiʼmo alo huʼnaya konalimo aliteno lamaga kahaopaleʼmo he tino maiʼniye.

^10-11 Kini vekaleʼmo maisana aʼmafaʼnemogae, huʼna, kagesa afifi huteka kaipamo namiyo. Vayakaeʼmo kagesamo oʼafige afokamo vayaʼaifeʼmo kagesamo oʼafige huteka kage kanika apatalegenoʼao kini vekamoʼmo, aeto agufa kanale aʼnimo maiʼnane, huno huteno amuse huno kateno. Ala kava nekamo maiʼniyaʼmofeʼmo agaefekeʼmo mono huteka aiyafiʼmo maiʼneka geʼamo afiyo.

¹² Taiya taonifiʼmo maiʼnaya vayaʼmo malaga vayaʼmogimo fiku kaha maeʼa kamigae. Kagemi yaʼapiʼe vayaʼmo hapa maesanafeʼmo kagaetegamo ugae.

¹³ Kini vekamo aʼmafaʼneʼamoʼmo agupiʼmo aeto agufa kanale alagepa yaʼmo haneʼnigeno goli nofitetiʼmo alo huʼnaya kukenamo alino vaiʼniye.

¹⁴ Konali kukenamo vaitesigeʼapaeʼmo kini vekalegamo avaleliʼa ugae. Afaluʼamogimo veʼeʼmo magokepi lokaeʼa ohavaeʼnaya aʼmafaʼne anagaʼmogi akame huʼa visageʼa kagaetegamo apavaleliʼa ugae.

¹⁵ Uʼapaeʼmo apamogaga aiteʼa kini vekamo noʼafiʼmo apavaleliʼa uʼa haigae.

¹⁶ Kagaemo asole mafaʼnemo alika apatesanageʼa kaginago vayaʼai apaimuʼyaleʼmo maigae. Kagaemo muki ma mopafi vayaʼaiteʼmo yagaiʼa apatesaya vayaʼmo lekana paika apategane.

¹⁷ Nagaemo ala kagikamo kamisugeʼa henagaʼamo afole aisaya vayaʼmogimo kagaefeʼmo apake okaniʼa ala kagikamo kamigae. Muki vayaʼmogimo muki afinaʼaeʼmo kagikaleʼmo aliʼa asaga huge huge huʼa maigae.