Samu 42 - The Keyagana NT and 25 OT books

Yulagefa aiʼniya kavafeʼmo nunumuʼmo huʼniya gemae

¹ Afela afu anagaʼmogimo anifeʼmo nehapaigeʼapaeʼmo anitegamo neʼvaya kava huʼna Gotiyo, huʼna, kagaefeʼmo neʼnahaiye.

² Afaʼa neʼmaina Gotigae, huʼna, anifeʼmo neʼnahaiya kava huno nagupi mafaʼnemoʼmo kagaefeʼmo hauʼniye. Hainu afinaʼmo uʼna kaulagaleʼmo mono huguve.

³ Apakaemo huʼa faipa huʼa nateteʼapaeʼmo Gotikamoʼmo haiyate maiʼniye, huʼa hute hute huʼnageʼnaeʼmo felugaʼe haniʼilagaʼeʼmo neʼyaʼmo oʼneʼna aviʼyaʼmo huge huge huʼna neʼmauve.

⁴ Nagaemo huʼnova kavafeʼmo nagesamo afiteʼna naipafiʼmo haneʼniya kavaʼaʼnimo aeʼna hakalo huʼna kaha nepauve. Hogoteta nagaeʼeʼmo magokepi lokaeta neʼutaeʼmo mono yokemo huge Goti agiʼaleʼmo alita asaga huge hulita Goti mono notegamo uʼnone. Mukiʼamogitamo mono hisunafeʼmo aote afinaʼmo hu maleʼnone.

⁵ Nagupi mafaʼneyo, huʼna, na kava higenoʼaeʼmo kaipamoʼmo kana nehiye. Na kava higekaeʼmo kagesa alaʼamo neʼafine. Nagupi mafaʼneyo, huʼna, Gotiʼa naha maesiyafeʼmo agava maiʼneka kavayagunagu nehugeʼnao halate naha neʼmaeya vekaʼnimo Gotiʼnimo agiʼaleʼmo aliʼna asaga huguve.

^6-7 Naipamoʼmo lusi kava huno kana nehiyaʼmofeʼmo agaefeʼmo halate nagesamo afiguve. Aniʼmo Hemoni avefatiʼe Misa avefatiʼeʼmo emineno alopa Yoneni anipiʼmo lamino haʼyamo asagauno neʼaigenoʼaeʼmo alopa agemo neʼaiya kava huno alopa hanageke yaʼmoʼa nagufaleʼmo nati kaeʼniye.

⁸ Nati kaeʼniyaʼmonanafa Ala kava neʼmoʼa aipamo falu huʼniya kavaʼaʼe hau ayamopafiʼmo hauʼniya kavaʼaʼeʼmo felugamo alino nave lisigeʼnaeʼmo haniʼilagamo yokemo huge afaʼa maisuva yaʼmo namiʼniya Gotifeʼmo nunumuʼmo huge huʼna maiguve.

⁹ Nagaemo Gotiʼa yafaʼnigana vekaeʼmo huʼnaeʼmo, na kava higeka alagi nataleteka nagaefeʼmo kagesamo noʼafine. Na kava higeka kame vayaʼnimo apakeka apataleʼnanageʼa hosu yaʼmo neʼnamigeno nagafu nekiye.

¹⁰ Geʼapiletiʼmo keveletiʼmo neʼnahaya kava huʼa Gotikamoʼmo haiyateʼmo maiʼniye, huʼa huteʼa huʼa faipa huʼa neʼnatae.

¹¹ Nagaemo na kava higeʼnaeʼmo naipamoʼmo kana nehiye. Na kava higeʼnaeʼmo nagesa alaʼamo neʼafuve. Nagupi mafaʼneyo, huʼna, Gotiʼa naha maesiyafeʼmo agava maiʼneka kavayagunagu nehugeʼnao halate naha neʼmaeya vekaʼnimo Gotiʼnimo agiʼaleʼmo aliʼna asaga huguve.