Samu 41 - The Keyagana NT and 25 OT books

Kaitaʼmo hauʼniya vekamoʼmo nunumuʼmo huʼniya gemae

¹ Kagemi yaʼapimo ohaneʼniya vayaʼaifeʼmo apakesamo neʼafiya vayaʼmo aulena vayaʼmo maiʼnae. Ala kava neʼmoʼa hanageke yapatiʼmo apakufamo alino katino apategaiye.

² Ala kava neʼmoʼa hapa maesigeʼapaeʼmo ofaliʼa afaʼa maigae. Ma mopafiʼmo maiʼneʼapaeʼmo aulena vayaʼmo maigae. Ala kava neʼmoʼa kame vayaʼai apayapiʼmo apavaleno oʼapamigiye.

³ Ala kava neʼmoʼa kaita hapaisigenoʼaeʼmo lokiya vaino apateteno alino hapageno apategaiye.

⁴ Nagaemo ina gemo huʼnaeʼmo, Ala kava nene, huʼna, kahau huka nato Nagaemo kagategamo hosu kavaʼmo huʼnovaʼmofeʼmo nagupi mafaʼnemo alika hageka ato.

⁵ Kame vayaʼnimogimo nagaefeʼmo hosu apaipamo kaliʼa nateteʼa nagaemo falisugeʼa vayaʼmogi nagaefeʼmo apake kaniʼa atalesayafeʼmo hapauʼnigeʼapaeʼmo, Hainu afinaʼmo falisigeno agiʼamo hano hisigeʼa agaefeʼmo alagi apake kanigiye, huʼa nehae.

⁶ Apakaemo nagesayafeʼmo eʼnisayaʼmoʼmo apaipafatiʼmo ge osuʼa apavayaʼaletikeʼmo ge nehae. Huʼa faipa huʼa natesaya gemo apaipafiʼmo aliʼa anupa hu maleʼnae. Apakaemo nataleʼuʼa muki vayaʼaifeʼmo hapa nepaiye.

⁷ Apakaemo nagaefeʼmo apaini huteʼa kaitaʼnieʼmo sumi gefatiʼmo hapa paite hapa paite huʼnae. Aliʼa hosu huʼa natesayafeʼmo huʼapaeʼmo, “Ani kavaʼmo hugune, huʼa apakesamo neʼafiye.”

⁸ Apakaemo ina gemo huʼapaeʼmo, Falisiya hosu kaitaʼmo hauʼniyanageno halate he otigiye, huʼa nehae.

⁹ Mago nao vekaeʼmo aliʼna amufa amiʼnova vekamoʼeʼmo kame vekaʼnimo hamaleʼniye. Magokepiʼmo lokaeno neʼyaʼmo neʼnoʼaʼmonanafa aigofe nao vekamo hamaleʼniye.

¹⁰ Ala kava nene, huʼna, ani kavaʼmo huʼniyaʼmonanafa kagaemo kahau huka nateteka alika he tika nategeʼna ani vayaʼmogi kavaʼapimo anonaʼapilefeʼmo nagaemo aeʼna atagaina huʼna hino.

¹¹ Kame vayaʼnimogi aeʼa oʼnagaseʼnayaʼmofeʼmo ago ageʼnovana kagaemo amuse huka neʼnatane.

¹² Nagaiʼnieʼmo huʼnaeʼmo, Nagaemo lama ge kavaʼmo nehuvaʼmofeʼmo kagaemo natafauʼnanageʼna asagauʼna oʼaiʼnove. Kagaemo nagaemo kagaeʼeʼmo magokepi lokaeʼna maisuvafeʼmo navaleʼnane.

¹³ Ala kava neʼmo Isaleli vayaʼai Gotiʼapimoʼmo akeyaʼvilagamo maige hemenimo maige muki afinaʼaeʼmo maige huno aulena Gotiʼa maino.