Samu 40 - The Keyagana NT and 25 OT books

Ge huʼniya gemo Ala kava neʼmoʼa afiʼniyaʼmofeʼmo yokemo huʼniya gemae

¹ Nagaemo Ala kava neʼmoʼa naha maesiyafeʼmo keya aeʼna ge huteʼnaeʼmo naipamoʼmo falu huʼnigeʼna agava maiʼnogenoʼaeʼmo ape huno agetafo huʼneno geʼnimo afiʼniye.

² Agaemo alagi hosu ive kelifatiʼmo nayate alino heno navayu hulineno haineno yafateʼmo nateteno alagepa kateʼmo visuvafeʼmo alino lokiya vaino nateʼniye.

³ Saufa yokemo alino naya maleʼnigeʼna Goti agiʼaleʼmo aliʼna asaga huteʼna ani yokemo nehuve. Asole vayaʼmogimo nageteʼapaeʼmo koli huteʼa Ala kava nefeʼmo aliʼa amufa amiteʼapaeʼmo, laha maegaiye, huʼa hugae.

⁴ Ala kava nefekeʼmo aliʼa amufa neʼamiya vayaʼmo aulena vayaʼmo maiʼnae. Apakaemo himuʼnamu kavaʼmo nehaya vayaʼmofi aigofe gotiʼapimogitefeʼmo mono nehaya vayaʼmofi huno ala apakiʼapimo noʼapamiye.

⁵ O Ala kava neʼnimo Gotiʼnimogae, huʼna, lagaetegamo alu kava alu kavaʼmo huka aliʼyaʼmo aliteka laha maeʼnane. Lagaefeʼmo kagesa afifi huka neʼmaine. Lagaemo lekana opaisuna agufa kavaʼmo huka lagaefeʼmo kagesamo neʼafine. Nagaemo muki huʼnana kavakaʼe kagesamo neʼafina kavakaleʼefeʼmo alagi alagepa huʼna aeʼna hakalo huʼna hapa opaiguve.

⁶ Afumo amagiʼa nekamiya kavaʼe ofalinimo nekamiya kavaʼefeʼmo okahauʼniye. Kagaemo, hosu kavatapilefeʼmo afumo amagitapa hiʼyalamuteʼmo atafiʼmo kaeta namiyo, huka osuʼnanaʼmonanafa gekamo afisuva agufa nagesageʼmo namiʼnane.

⁷ Namiʼnanageʼnaeʼmo, Nago, huʼna, nagaemo neʼove. Goti mukufiʼmo nava gemo haneʼniye.

⁸ O Gotiʼnimogae, huʼna, keʼaepa gekamo naipafiʼmo haneʼniye. Kagaemo huvo, huka naha paiʼnana gekamo akame hisuvafeʼmo amuse huteʼna namogaga neʼauve.

⁹ Nagaemo asole vayaʼmo eʼa aliʼa anupa huʼa maiʼnaya yateʼmo fatago kavakaeʼmo alagepa faigoko gekamo aeʼna hakalo huʼna hapa paiʼnove. Ago nageʼnanana afaʼa oʼmaiʼna gekamo aeʼna hakalo huʼna hapa nepauve.

¹⁰ Nagaemo fatago kavakamo naipafiʼmo aeʼna ati kaeʼna oʼmaleʼnofa nagaemo, geʼamo alagi amagino oʼataleno akame huno apakufamo alino katino neʼapate, huʼna aeʼna hakalo huʼna hapa paiʼnove. Nagaemo asole vayaʼmo eʼa aliʼa anupa huʼa maiʼnaya vayaʼaifeʼmo kahau kayamopafiʼmo nekahaiya kavakaʼe alagi lama gekaʼeʼmo aeʼna ati okaeʼna aeʼna hakalo huʼna hapa paiʼnove.

¹¹ Ala kava nene, huʼna, oʼnataleka kahau huka nato. Nagaefeʼmo kahau kayamopafiʼmo kahauʼninageka lama gekamo akame hugeʼnao muki afinaʼmo afaʼa maino.

¹² Lekana opaisuna agufa hanageke yaʼmoʼmo nagufaleʼmo faino vego huno nateʼniye. Hosu kavaʼnimoʼa natafauʼniyanageʼna afaʼa aliʼna maku huʼna okagegauve. Nayokaʼmo asole yaʼmo haneʼniya kava huno hosu kavaʼnimo magoʼe huno haneʼniyaʼmofeʼmo naipamoʼmo lokiya oʼvaiʼnigeno lokiyaʼnimo alagi ohaneʼniye.

¹³ Ala kava nene, huʼna, kahauʼnisigeka nagufamo alika katika nato. Ala kava nene, huʼna, malage huka naha mao.

¹⁴ Kagaemo naha maegeʼapao kamitimo namagisayafeʼmo nehaya vayaʼmo apavagage hisigeʼa negi nagi hiyo. Hosu yaʼmo namisayafeʼmo nehaya vayaʼmo apakamelegatiʼmo asagauʼa aiʼa heleve hisageno apakiʼapimo asagauno aino.

¹⁵ Kigi huʼa nateteʼa nagaefeʼmo, vaehae, vaehae, huʼa nehaya vayaʼmo apavagage yaʼmo alika apamigeʼa hapau aiyo.

¹⁶ Hapau aigayaʼmonanafa kagaefeʼmo kahauya huliʼa neʼaya vayaʼmogimo apamogaga aiteʼa kagaefeʼmo amuse hiyo. Apakufamo alika katika neʼapatana kavafeʼmo hapauʼnisiya vayaʼmogimo, Ala kava neʼmo ala agiʼamo amiyo, huʼa hiyo.

¹⁷ Inagi nagaemo afa vekamo maiʼneʼna kafu huʼna maiʼnovaʼmonanafa Ala kava neʼmoʼa nagaefeʼmo agesamo neʼafiye. O Gotiyo, huʼna, naha maeka nagufamo alika katika neʼnatana vekaʼnimogae, huʼna, afaʼa oʼmaika malage huka naha mao.