Samu 4 - The Keyagana NT and 25 OT books

¹ O Gotiyo, huʼna, Fatago kavaʼnilefeʼmo Gotiʼnimogamo maiʼnane. Keya aeʼna ge hisuva afinaʼmo geʼnimo afiyo. Hanageke yaʼmo aliʼnogekaeʼmo naha maeʼnane. Nunumuʼmo nehuva gemo afiteka kahau huka nato.

² Vayaʼmogitapae, huʼna, na magi afinaʼmo nagiʼnileʼmo alita afepi nategae. Na magi afinaʼmo afa kavafeʼmo lapausigetapa humi apatesiyafeʼmo aliʼyaʼmo aligae.

³ Lapakaemo ani kavaʼmo nehayaʼmonanafa afigae. Ala kava neʼmoʼa agaetefeʼmo alagepa kavaʼmo nehisaya vayaʼmo agaiʼalefeʼmo alino apaote apateʼniye. Nagaemo agaefeʼmo keya aeʼna ge hisugeno Ala kava neʼmoʼa afigiye.

⁴ Lapaipamo lesiya afinaʼmo hosu kavaʼmo osiyo. Hipaleʼmo havae netapaeʼmo lapaipafiʼmo lapakesa afifi hutetapa ge osiyo.

⁵ Alagepa hutapa ofalinimo amiyo. Ala kava nefekeʼmo alita amufa amiyo.

⁶ Mukiʼamogi huʼapaeʼmo, alagepa huta maigesune, huʼa nehae. O Ala kava nene, huʼna, kigi nehuka lagaetegamo alagepa kavaʼmo huvo.

⁷ Apakaemo hoyaʼapifatiʼmo alopa neʼyaʼmo neʼaliʼapaeʼmo apamogaga neʼaiyaʼmonanafa kagaemo namiʼnana namogaga kavaʼmoʼa apakaemo apamogaga neʼaiya kavaʼmo ago aeno aga seʼniye.

⁸ O Ala kava nene, huʼna, Kagaekeʼmo yagaika neʼnatananageno mago yaʼmoʼa afaʼa oʼnahaegaiye. Naipamoʼmo falu huʼninageʼna maiteʼna havaeteʼna huguve.