Samu 38 - The Keyagana NT and 25 OT books

Hosu kavaʼmo huʼnigeno Ala kava neʼmoʼa kayoʼmo amiʼniya gemae

¹ Ala kava nene, huʼna, kaipamo leka natetekaeʼmo ge oʼnahauvo. Kaipamo leka natetekaeʼmo oʼnamagiyo.

² Kevekaletiʼmo nahaeʼnanageno eno nagufafiʼmo haniʼnigekaeʼmo kayatetiʼmo namagiʼnane.

³ Kaipamo leka nateʼnanaʼmofeʼmo nagufamoʼmo alagi kanale nosiye. Hosu kavaʼmo huʼnovaʼmofeʼmo nayamufamoʼmo alagi lokiya noʼvaiye.

⁴ Hosu kavaʼnimoʼmo anikana huno nagenopaleʼmo aeno nati kaeʼnigeʼnaeʼmo lusi kana yaʼmo aliʼnovaʼmofeʼmo aeno nagaseʼniye.

⁵ Negi kavaʼmo huʼnovaʼmofeʼmo namuʼmo naleteno kolaʼe oʼeʼmo huʼnigeno atu neʼaiye.

⁶ Nagufamoʼmo kanaʼageʼmo nahauʼnigeʼna muki afinaʼmo ape huʼnageʼmo maiʼneʼnaeʼmo yulagefa aiʼna neʼmauve.

⁷ Amukomo nahauʼnigeʼna faligefeʼmo nehuve.

⁸ Lusi kava huno alagaʼmo nahaeʼnigeno lokiyaʼnimo alagi ohaneʼniye. Naipamoʼmo kanale osuʼnigeʼna kagegage nehuve.

⁹ Ala kava nene, huʼna, na agufa naipamo nekalufi huka ago nageʼnanageʼnaeʼmo kagegage nehuʼna yulagefa neʼaugeka afiʼnane.

¹⁰ Lutunopaʼnifatiʼmo fako pako nehigenoʼaeʼmo lokiyaʼnimo alagi ohaneʼniye. Naulagafatiʼmo haniʼageʼmo huʼniye.

¹¹ Lusi kaitaʼmo nahauʼnigeʼapaeʼmo nao vayaʼe nafaluʼnimogiʼeʼmo nagaetegamo oʼmeʼnae. Afamo anagaʼnimogiʼeʼmo nataleʼuʼa afagiʼaleʼmo maiʼnae.

¹² Namagisayafeʼmo nehaya vayaʼmogimo aneʼaimo hanagi maleʼnae. Namagisayafeʼmo nehaya vayaʼmogimo nagaetegamo hisaya kavafeʼmo muki afinaʼmo apakesa afifi huʼa maiʼneʼa namagisaya kafeʼmo kahauya huʼa agesayafeʼmo nehae.

¹³ Nehayaʼmonanafa agesamo akaniʼnigeno gemo noʼafiya vekagana huʼna maiʼneʼna gemo noʼafuve. Negi vekamoʼmo age noʼaiya vekagana huʼna neʼmauve.

¹⁴ He, gemo nehaya gemo noʼafiya vekagana huʼna maiʼneʼnaeʼmo gemo nohapauve.

¹⁵ Ala kava nene, huʼna, kagava neʼmauve. Ala kava neʼnimo Gotiʼnimogae, huʼna, geʼnimo afiteka naha maegane.

¹⁶ Hanageke yaʼmo aliʼnova kavafeʼmo fiku yanageʼa apamogaga aigae. Aeʼna halu vale lamiʼna asagauʼna aisugeʼapaeʼmo fiku yanageʼa ago aeta agaseʼnone, huʼa hugae.

¹⁷ Asagauʼna aigefeʼmo nehugenoʼaeʼmo muki afinaʼmo nagafu nekiye.

¹⁸ Hosu kavaʼnieʼmo nahau huteʼnaeʼmo aeʼna hakalo nehuve.

¹⁹ Apakaetegamo hosu kavaʼmo osuʼnogeʼa afaʼa neʼmaiya kame vayaʼnimogiʼeʼmo lokiya vayaʼageʼmo maiʼnae. Asole vayaʼmogimo nagaefeʼmo fikumo apaini nehae.

²⁰ Nagaemo alagepa kateʼmo visuvafeʼmo nehuvaʼmofeʼmo kame huʼa nateteʼa alagepa kavaʼnimo anonaʼnilefeʼmo nagaetegamo hosu kavaʼmo nehae.

²¹ Ala kava nene, huʼna, nataleka oʼuvo. O Gotiʼnimogae, huʼna, uka afagiʼaleʼmo oʼmaika eka nahaopaʼalekeʼmo maiyo.

²² Ala kava neʼnimogae, huʼna, nagufamo alika katika neʼnatana vekaʼnimogamae, huʼna, malage hukeka naha mao.