Samu 37 - The Keyagana NT and 25 OT books

Ala kava nefeʼmo agava neʼmaiya vayaʼmogimo ma mopamo alisaya kavafeʼmo huʼniya gemae

¹ Hosu vayaʼmogi nehaya kavaʼapieʼmo lapakesa alaʼamo afitetapa lapausoli osiyo. Hosu kavaʼmo nehaya vayaʼaifeʼmo alagepa kavaʼmo huʼa neʼmaiyanageta apakaekana huta maigesune, hutapa osiyo.

² Kahaumo malage huno leno falu neteya kava huʼa malage huʼa falu tegae. Aise yosamo neʼvaiya kava huʼa vaigae.

³ Ala kava nefekeʼmo alita amufa amitetapa alagepa kavaʼmo higenoʼao lapa maesigetapa ma mopafiʼmo alagepa hutapa maigayanagi.

⁴ Ala kava nefekeʼmo amuse hutapa ategenoʼao lapaipafiʼmo lapauʼnisiya yaʼmo lapamino.

⁵ Lapakaemo lapakesamo afitapaeʼmo lagaetegamo na agufa kavaʼmo afole aigifi, hutapa lapakesamo afisaya kavafeʼmo Ala kava nefeʼmo alitapa amufa amigenoʼa lapa maeno.

⁶ Lapa maesigenoʼaeʼmo alagepa kavatapimo yegekana huno aeno ha legaiye. Ani kava huno fatago kavatapimo vayaʼai apaulagaleʼmo alino afole aino ategaiye.

⁷ Ala kava neʼmo aulagaleʼmo afaʼa maiʼnetapaeʼmo agava huta maige maige hutapa maiyo. Hosu kavaʼmo huteʼa alagepa huʼa neʼmaiya kavafeʼmo lapakesa alaʼamo afitetapa lapausoli osiyo.

⁸ Lapaipamo oletapa hosu kavatefeʼmo alagi lapayamukiki osiyo. Lapakaemo hosu kavaʼmo hisayafeʼmo lapakesa alaʼamo afitetapa lapausoli osiyo.

⁹ Hosu kavaʼmo nehaya vayaʼmo kayoʼmo apamisigeʼa faligayaʼmonanafa Ala kava nefeʼmo agava neʼmaiya vayaʼmogimo ma mopamo aligae.

¹⁰ Aise afinaʼmo utesigeʼa hosu vayaʼmo alagi afela hesagetapaeʼmo maiʼnaya kotegamo uta kahauya hutapa oʼapakegae.

¹¹ Oʼapakegayaʼmonanafa falu fala apaipa vayaʼmogimo ma mopamo aliteʼa alagepa huʼa magokepi lokaeʼa maiʼneʼa apamogaga aiʼa maigae.

¹² Hosu vayaʼmogimo fatago vayaʼaitegamo hosu kavaʼmo hisayafeʼmo ina kava hugune, ma kava hugune, huʼa huteʼa maiʼneʼapaeʼmo hosu apaugosamo kaliteʼa maku make huʼa neʼapatae.

¹³ Ala kava neʼmoʼa alino apagoʼya lagauno apatalesiya afinafeʼmo afaʼa apakeno maiʼniyaʼmofeʼmo apakaefeʼmo kigi huno neʼapate.

¹⁴ Hosu vayaʼmogi hosu yaʼmo neʼaliya vayaʼe ina agufa vayaʼeʼmo afaʼa apateʼneʼa api kavaʼmo nehaya vayaʼmo naipeletiʼmo apaisayafeʼmo asagige atiletiʼmo hapaesayafeʼmo atimo alige huʼnae.

¹⁵ Naipeʼapimoʼmo apakaiʼapi apaipafiʼmo aesigenoʼaeʼmo atiʼapimo lo aegaiye.

¹⁶ Mago fatago vekamoʼa aise kagemi yaʼamo haneʼniya yaʼamoʼmo muki hosu vayaʼai alopa kagemi yaʼapimo ago aeno agaseno haneʼniye.

¹⁷ Na kava higenoʼaeʼmo ago aeno agaseʼniye. Ala kava neʼmoʼa hosu vayaʼai himamuʼapimo alino hano huno atalegaiyaʼmonanafa fatago vayaʼaiteʼmo alagepa huno yagaino neʼapateyaʼmofeʼmae.

¹⁸ Ala kava neʼmoʼa fatago vayaʼmo alagepa huʼa maigae, huno apakeʼniye. Hetamaʼapimo afaʼa hanege hanege huno hanegaiye.

¹⁹ Hanageke yaʼmo afole aisiya afinaʼmo hosu hanageke yaʼmo oʼalige kafu hisaya afinaʼmo kafu osuge huteʼa alagepa huʼa maigae.

²⁰ Maigayaʼmonanafa hosu vayaʼmo faligae. Kahaumo ausegana huʼa maige halinagana huʼa maige huʼnayaʼmofeʼmo alagi afela hegae.

²¹ Hosu vayaʼmogimo fiku aliteʼapaeʼmo anonaʼapilefeʼmo noʼapamiyaʼmonanafa fatago vayaʼmogimo hapau huʼa apateteʼa fiku neʼapamiye.

²² Ala kava neʼmoʼa alino auleno neʼapateya vayaʼmogimo ma mopamo alitesagenoʼaeʼmo lifana huno neʼapateya vayaʼmo alagi afela hegae.

²³ Ala kava neʼmoʼa alagepa vayaʼmogi hisaya kavaʼmo aepa vekamo maiʼnenoʼaeʼmo ani kavaʼmo ago hu maleʼniye. Ani kava huno nehaya kavaʼapimo agetenoʼaeʼmo amuse huno neʼapate.

²⁴ Apakaemo asagauʼa neʼaigenoʼaeʼmo Ala kava neʼmoʼa apayateʼmo alino he tino neʼapateyaʼmofeʼmo alagi asagauʼa oʼaigae.

²⁵ Nagaemo yatala afinaʼmo maime maime eʼna hemenimo ago kosuna leʼnovaʼmonanafa Ala kava neʼmoʼa fatago vayaʼamo apataleno uʼniya kavaʼamo oʼagege mafaʼneʼapimogi neʼyafeʼmo aukaya huʼnaya kavaʼmo oʼagege huʼnove.

²⁶ Fatago vayaʼmogimo muki afinaʼmo hapau huʼa apateteʼa magoʼe yaʼmo apamiteʼa anonaʼapilefeʼmo neʼapamiye. Ala kava neʼmoʼa mafaʼneʼapimo fiku hapa maeno neʼapamiye.

²⁷ Hosu kavaʼmo ataletetapa alagepa kavakeʼmo hiyo alagi maige maige hutapa maigayanagi.

²⁸ Ala kava neʼmoʼa alagepa kavafekeʼmo hauʼniyanageno aote vayaʼamo alagi apataleno oʼugiye. Yagaino apatesigeʼa hano osuʼa maige maige huʼa maigayaʼmonanafa hosu vayaʼai mafaʼneʼapimo alino hapa faino apatalegaiye.

²⁹ Fatago vayaʼmo mago mopamo apamisigeʼa aliteʼa ani mopaleʼmo maige maige huʼa alagi maigae.

³⁰ Fatago vayaʼmogimo ageteʼa afiʼnaya gemo huge gemo alagepa huʼa aliʼa fako huʼa afiteʼa ge huge nehae.

³¹ Goti keʼaepa geʼamo apaipafiʼmo haneʼniyanageʼa afaʼa aeʼa halu oʼvalegae.

³² Hosu vayaʼmogimo fatago vayaʼmo apamagisayafeʼmo aulu hapaeʼa neʼapakae.

³³ Ala kava neʼmoʼa hosu vayaʼai apayapiʼmo apavaleno oʼapamino hapa maesigeʼa hosu vayaʼmogimo agoti huʼa apateteʼapaeʼmo hosu vayane, huʼa osugae.

³⁴ Ala kava nefekeʼmo agava maiʼnetapa geʼamo afigenoʼao lapakitapileʼmo alino asaga huno lapateteno mopamo lapamino. Agaemo hosu vayaʼmo alino hapa faitalesigeʼa visagetapa apakegae.

³⁵ Ageʼnovana hosu vekamoʼa lokiya vaino yagaino apateno maiʼnenoʼaeʼmo mago yatala yosagana huno haino apakaseno maiʼniye.

³⁶ Maiʼniyaʼmonanafa henagaʼamo uʼna ageʼnovana oʼmaiʼnigeʼna ageʼnove. Kahauya huʼnovana oʼageʼnove.

³⁷ Lapakaemo alagepa vayaʼmo aulu hapaetapa apaketetapaeʼmo fatago vayaʼmo apaketapa maiyo. Kanaʼapimo hano hisigeʼapaeʼmo alagepa huʼa maigayaʼmonanafa

³⁸ gemo amagiʼa neʼatalaya vayaʼmo alagi alino hano huno apatalegaiye.

³⁹ Ala kava neʼmoʼa fatago vayaʼai apakufamo alino katino neʼapateya kavaʼmo aepa vekamo maiʼniye. Hanageke yaʼmo afole neʼaiya afinaʼmo himamuʼaletiʼmo hapa neʼmae.

⁴⁰ Apakaemo Ala kava nefekeʼmo aliʼa amufa neʼamiyaʼmofeʼmo hatu maeno apateteno hosu vayaʼai apayapatiʼmo apavalelineno apakufamo alino katino neʼapate.