Samu 36 - The Keyagana NT and 25 OT books

Hosu vayaʼmogimo hosu kavaʼmo huʼa maiʼnayaʼmonanafa Ala kava neʼmoʼa vayaʼamo hapa neʼmae, huno huʼniya gemae

¹ Gotiʼa hosu vayaʼai hosu kavaʼapieʼmo apava gemo huno naha paiʼniya gemo naipafiʼmo haneʼniyana apakaemo Gotiʼmo apakameʼyamo amiteʼa koli nosae.

² Ala vayaʼmo maiʼnone, huʼa nehayaʼmofeʼmo Gotiʼa hosu kavatimo oʼagege hosu kavaʼmo nehae, huno osuge nehiye, huʼa apakesamo neʼafiye.

³ Hosu gemo huge aigofe gemo huge huʼa neʼmaiye. Afiteʼa ageʼnaya kavaʼe alagepa kavaʼapiʼeʼmo ataleʼa afaʼa neʼmaiye.

⁴ Hipaʼapileʼmo havaeʼa maiʼneʼapaeʼmo hosu kavaʼmo hisayafekeʼmo apakesamo neʼafiye. Muki nehaya kavaʼapimo hosu kavaʼageʼmo haneʼnigeʼapaeʼmo muki hosu kavaʼapieʼmo, haʼao, alagi oʼnahaiye, huʼa nosae.

⁵ Ala kava nene, huʼna, olataleka lagaefeʼmo kahau huka nelatana kavakamoʼmo lusi yatala yaʼmo kokuʼnapiʼmo uno nehaiya agufa yatala yakana huno haneʼniye. Ani kavaʼmo huguve, huka nehana gekamo alagi amagika oʼataleka akame huka nehana kavakamoʼmo ina kava huno hiyateʼmo uno nehaiya agufa yakana huno haneʼniye.

⁶ Alagepa kavakamoʼmo avegana huno lusi yaʼmo haneʼniye. Alagepa huka alika fako huka neʼapatana kavakamoʼmo solovala aniʼmo vasilonagana huno haneʼniye. Ala kava nene, huʼna, vayatenagi afulenagi yagagafalenagi huka yagaika neʼapatanageʼa afaʼa neʼmaiye.

⁷ O Gotiyo, huʼna, olataleka lagaefeʼmo kahau kayamopafiʼmo kahauʼniya kavakamoʼmo kanale alagepa kavaʼmo haneʼniyaʼmofeʼmo lahauʼniye. Kagaefeʼmo alita amufa kamiʼnonaʼmofeʼmo kahakumo auneʼafiʼmo uta fala kita neʼmaune.

⁸ Lusi neʼyaʼmo lamiʼnanageta neʼnonagenoʼaeʼmo lamu nepae. Lamiʼnanagetaeʼmo lamogaga aisunafeʼmo alopa anipatiʼmo aniʼmo neʼnone.

⁹ Maige maige huta maisuna kavaʼmo aepa vekamo maiʼnane. Ha le yakamoʼmo aeno ha nelegetaeʼmo ha le yakamo ageta alagepa huta neʼagone.

¹⁰ Kageʼnaya vayaʼmo oʼapataleka magoʼe huka kahau kayamopafiʼmo kahaino. Api kavaʼmo nehaya vayaʼaitegamo alagepa kavaʼmo huvo.

¹¹ Himuʼnamuʼmo nehaya vayaʼmo nagaetegamo oʼmesayafeʼmo kateʼmo kaʼmo akani malo. Hosu vayaʼmogimo aliʼa nahafaiʼa oʼnatalesayafeʼmo naha mao.

¹² Ageyo, huʼna, Gotiʼa hosu vayaʼmo apamagiʼnigeʼa mopafiʼmo asagauʼa aiteʼa havaeʼa maiʼnae. Halate he otigae.