Samu 34 - The Keyagana NT and 25 OT books

Fatago vayaʼmogimo ge nehagenoʼaeʼmo Ala kava neʼmoʼa neʼafiye, huno huʼniya gemae

¹ Nagaemo Ala kava nefekeʼmo muki afinaʼae afinaʼaeʼmo hao ke hegauve. Agiʼaleʼmo aliʼna asaga huge huge huʼna maiguve.

² Agiʼaleʼmo aliʼna asaga huʼna atesugeʼapaeʼmo apakufamo aliʼa afepi neʼataya vayaʼmogi afiteʼapaeʼmo apamogaga aigae.

³ Nagaegiʼeʼmo magokepi hutaeʼmo, Ala kava neʼmo ala agi vekamo maiʼniye, huta higetao. Agiʼaleʼmo magokepi alita asaga higetao.

⁴ Koli huʼna maiʼneʼnaeʼmo naha maesiyafeʼmo kahauya huʼna nunumuʼmo huʼnogeno afitenoʼaeʼmo naha maeʼnigeʼna koli osuʼna afaʼa maiʼnove.

⁵ Vayaʼmogimo ageteʼapaeʼmo amuse huʼnayaʼmofeʼmo ani kava hutapa agegenoʼao lapaipamoʼmo kana osino.

⁶ Nagaemo lokiya vekamo oʼmaiʼnovaʼmofeʼmo agaefekeʼmo keya aeʼna ge huʼnogeno Ala kava neʼmoʼa afiʼniye. Afitenoʼaeʼmo muki hanageke yapatiʼmo nagufamo alino katino nateʼniye.

⁷ Ala kava neʼmo enisole vekaʼamoʼmo Ala kava nefeʼmo koli nehaya vayaʼaiteʼmo yagaino vego huno apateteno apakufamo alino katino neʼapate.

⁸ Ala kava neʼmo kanale vekamo maiʼniye hutapa agesayafeʼmo ageyo. Ala kava nepiʼmo fala kiʼa neʼmaiya vayaʼmo aulena vayaʼmo maiʼnae.

⁹ Lapaote vayaʼmo maiʼnayanagi Ala kava nefeʼmo koli hutetapa akame hiyo. Koli huteʼa akame nehaya vayaʼmogimo kafu osugae.

¹⁰ Laiyoni anaʼaumogi apaka neteyaʼmonanafa Ala kava neʼmo agesayafeʼmo kahauya nehaya vayaʼmogimo muki alagepa yaʼmo aliteʼapaeʼmo kafu nosae.

¹¹ Mafaʼne anagaʼmogitapamo eta geʼnimo afiyo. Ala kava nefekeʼmo koli hutetapa akame hisaya kavaʼmo aliʼna lapaya malegauvanagi eyo.

¹² Alagepa hutapa yatala afinaʼmo maiʼnetapa lapamogaga aisayafeʼmo lapauʼnifiye.

¹³ Inagi lapauʼnisiyana hosu gemo osuge aigofe gemo osuge hisayafeʼmo alagepa huta yagaitapa lapateyo.

¹⁴ Hosu kavategatiʼmo maitapa halove hutapa eta alagepa kavakeʼmo hiyo. Kaveta osutapa alagepa hutapa magokepi lokaeta maisayafeʼmo kahauya huta agetetapa vegala aeyo.

¹⁵ Ala kava neʼmoʼa alagepa kavaʼmo nehaya vayaʼaiteʼmo yagaino apateʼneno aukaya huʼa ge nehaya geʼapimo neʼafiye.

¹⁶ Neʼafiyaʼmonanafa hosu kavaʼmo nehaya vayaʼaifeʼmo kame huno apateʼnigeʼa faliʼnagenoʼaeʼmo ago apake nekaniye.

¹⁷ Fatago vayaʼmogimo keya aeʼa ge nehageno afitenoʼaeʼmo muki hanageke yapatiʼmo apakufamo alino katino neʼapate.

¹⁸ Ala kava neʼmoʼa hosu kavaʼapieʼmo apaipamoʼmo kana nehiya vayaʼai hapaopaleʼmo maiʼnenoʼaeʼmo yulagefa neʼaiya vayaʼai apakufamo alino katino neʼapate.

¹⁹ Alagepa vayaʼmogimo lusi hanageke yaʼmo neʼaliyaʼmonanafa Ala kava neʼmoʼa muki hanageke yapatiʼmo apakufamo alino katino neʼapate.

²⁰ Ala kava neʼmoʼa kanale vekaleʼmo alagepa huno yagaino ateʼnigeno magoke ayamufamo lo oʼaeʼniye.

²¹ Hosu vayaʼmo hosu kavaʼapimoʼmo apamagisigeʼa faligae. Alagepa kavaʼmo nehaya vayaʼaifeʼmo apaini nehaya vayaʼaina kayoʼmo apamigiye.

²² Ala kava neʼmoʼa aliʼyaʼamo neʼaliya vayaʼai apakupi mafaʼnemo miya faino alino katino neʼapate. Agaefeʼmo aliʼa amufa amiʼnaya vayapatiʼmo magoke vekaeʼmo, hosu vekamo maiʼnane, huno huteno alagi alino hafaino oʼatalegaiye.