Samu 32 - The Keyagana NT and 25 OT books

Hosu kavaʼaeʼmo aeno hakalo huno ha paiʼniya gemae

¹ Gotiʼa keʼaepa geʼamo amagiʼa ataleʼnaya kavaʼapimo alino atalege hosu kavaʼapimo aeno ati kaeno atalege huʼnisiya vayaʼmogimo aulena vayaʼmo maiʼnae.

² Gotiʼa hosu kavaʼapimo haneʼniye, huno nosigeʼa humi nami kavaʼmo osuʼnaya vayaʼmo aulena vayaʼmo maiʼnae.

³ Nagaemo hosu kavaʼnieʼmo aeʼna hakalo osuʼneʼnaeʼmo aviʼyaʼmo huge huge huʼna maiʼnogeno lokiyaʼnimo ago hano huʼniye.

⁴ Ani kava huʼna maiʼnogekaeʼmo felugaʼe haniʼilagaʼeʼmo kana yaʼmo alika namiʼnanagenoʼaeʼmo amuko nehiya afinaʼmo aniʼmo leno nelaneya kava huno lokiyaʼnimo ago hano huʼniye.

⁵ Ani afinaʼmo hosu kavaʼnieʼmo aeʼna hakalo huʼna kaha paiʼnova afinaʼmo hosu kavaʼnimo aeʼna ati okaeʼnove. Nagaemo, keʼaepa gekamo ago amagiʼna ataleʼnova kavaʼnieʼmo Ala kava neʼmogaeʼmo aeʼna hakalo huʼna kaha paiguve, huʼna huʼnogekaeʼmo hosu kavaʼnimo ago alika ataleʼnane.

⁶ Ani kavaʼmo nehanaʼmofeʼmo muki kakame nehaya vayaʼmogimo kahauya huʼa kagesaya afinaʼmo nunumuʼmo hiyo. Aniʼmo henoʼaeʼmo hapaopaleʼmo oʼmegaiye.

⁷ Kagaepiʼmo eʼna fala kiʼnisugekaeʼmo hanageke yaʼmo oʼalisuvafeʼmo yagaika nategane. Kagaemo nagufamo alika katika natesana yokemo nehisugekaeʼmo faika vego huka yagaika nategane.

⁸ Gotiʼa hunoʼaeʼmo, nagaemo visana kaʼmo alagepa huʼna aliʼna kaya maleteʼnaeʼmo kave liguve, huno huʼniye. Naulagaletiʼmo visana kaʼmo kave liguve.

⁹ Hosimogi apakesamo oʼafiʼnageʼa vayaʼmogigeʼmo geʼapimo afisayafeʼmo apavayafiʼmo aenimo ateteʼa nofi aeteʼa yagaiʼa apateʼneʼa aliʼa api aiʼa neʼapatae. Hosigana hutapa oʼmaiyo.

¹⁰ Hosu vayaʼmo lusi kava huʼa kana yaʼmo aligayaʼmonanafa Ala kava nefeʼmo aliʼa amufa amiʼnaya vayaʼaifeʼmo hau huno neʼapateya kavaʼamoʼmo yagaino vego huno apategaiye.

¹¹ Alagepa vayaʼmogitapae, huʼna, Ala kava nefekeʼmo lapamogaga aitetapa amuse hiyo. Geʼamo akame nehaya vayaʼmogitapae, huʼna, lapamogaga aitetapa alopa gefatiʼmo hiyo.