Samu 31 - The Keyagana NT and 25 OT books

Ala kava neʼmo alino amufa amiʼniya vekamoʼmo nunumuʼmo huʼniya gemae

¹ O Ala kava nene, huʼna, Kagaefekeʼmo aliʼna amufa kamiteʼna maiʼnove. Kagaemo nagaemo mago afinaʼmo navagage hisuvafeʼmo oʼnatalo. Kagaemo nehana fatago kavakaletiʼmo hosu kavategatiʼmo navalelika eno.

² Kagetafo huka afiteka malage huka hosu kavategatiʼmo navalelika eno. Vayaʼmogimo yafa kapiʼmo alagepa huʼa neʼmaiya kava huʼna alopa yafaʼnimo maiʼnegeʼnao kagaepiʼmo alagepa huʼna maiguve.

³ Kagaemo alopa yafaʼnimo maige avaʼe noʼnimo maige huʼnanaʼmofeʼmo kagikalefeʼmo hogoteteka uka navalelika uvo.

⁴ Kagaemo lokiyaʼnimo maiʼnanaʼmofeʼmo fala kiʼa maleʼnaya umenifatiʼmo hatu maeka nato.

⁵ Nagaemo nauneʼnameʼmo aliʼna kayapiʼmo kamiʼnove. O Ala kava neʼmo lama geʼageʼmo nehana Gotiʼnimogae, huʼna, Miya faika nateteka navalelika uʼnane.

⁶ Nagaemo aliʼya noʼaliya gotigi aigofe gotigitefeʼmo mono nehaya vayaʼaifeʼmo naini huʼnovaʼmonanafa kagaefeʼmo aliʼna amufa kamiʼnove.

⁷ Kagaemo muki afinaʼmo oʼnataleka nagaefeʼmo kahau kayamopafiʼmo kahauʼniya kavakalefeʼmo namogagamo neʼauve. Kagaemo aliʼnova kana kavaʼmo ageteka nagaeteʼmo afole aiʼniya hanagekayaʼmo afiteka ageʼnane.

⁸ Kagaemo kame vayaʼnimogi apaiyafiʼmo alika oʼnateʼnananafa navalelika uka alagepa koteʼmo nateʼnane.

⁹ O Ala kava nene, huʼna, Lusi hanagekeyaʼmo aliʼnovaʼmofeʼmo kahau huka nato. Lusi kava huʼna aviʼyaʼmo nehuve. Nagufamo alagepa huno ohaneʼnifa hosu kava huno haneʼniye.

¹⁰ Muki afinaʼmo naipamoʼmo kana nehigeno nainaga nefaiye. Lusi kana yaʼmo aliʼnovaʼmofeʼmo lokiyaʼnimo hano huʼniye.

¹¹ Muki kame vayaʼnimogi apakameʼyamo namiʼnageʼapaeʼmo nahaopaleʼmo maiʼnaya vayaʼmogimo magoʼe huʼa apakameʼyamo namiʼnae. Nao vayaʼmogi aliʼa afepiʼmo neʼnatae. Kateʼmo neʼvaya vayaʼmogi nageteʼa apaune nehae.

¹² Faliʼnaya vayaʼaifeʼmo apake kaniʼniya kava huʼa nagaefeʼmo apakesamo oʼafiʼa apake kaniʼniye. Atupa neʼyakana huʼna maiʼnove.

¹³ Muki vayaʼmogimo huʼa faipa huʼa nateʼnageʼna afiʼnove. Lusi kava huno koli kavaʼmo faino vego huno nateʼniye. Apakaemo kamitimo namagisayafeʼmo vegemo nehae.

¹⁴ O Ala kava nene, huʼna, Nehayaʼmonanafa nagaemo kagaefeʼmo aliʼna amufa nekamuve. Nagaemo huʼnaeʼmo, Gotiʼnimogamo maiʼnane, huʼna nehuve.

¹⁵ Muki afinaʼmo nagaeteʼmo afole neʼaiya kavaʼmo kaiyafiʼmo haneʼniye. Kame vayaʼnimogi apayapatiʼmo navalelika uvo. Nagaefeʼmo apaini huʼa neʼnataya vayaʼai apayapatiʼmo nagufamo alika katika nato.

¹⁶ Kagaemo aliʼyakamo neʼaliya vekamo fikumo ha maeka amiyo. Kagaemo kahau huka neʼnatana kavatetiʼmo nagufamo alika katika nato.

¹⁷ O Ala kava nene, huʼna, Nagaemo kagaefeʼmo keya aeʼnovaʼmofeʼmo navagage hisiyafeʼmo oʼnato. Kagaemo hosu vayaʼmo apatenageno apavagage hino. Kagaemo apatenageʼa kanolufiʼmo afaʼa maiyo.

¹⁸ Fatago vayaʼaifeʼmo aigofe himuʼnamu gemo nehaya geʼapimo alika hano huka apatalo.

¹⁹ Kagaefeʼmo koli nehaya vayaʼaiteʼmo magoʼe magoʼe huka alagepa kavaʼmo nehane. Apamisanafeʼmo alagepa kavaʼmo alika anupa huka neʼatane. Kagaemo vayaʼai apaulagaleʼmo kagaefeʼmo aliʼa amufa nekamiya vayaʼmogi kanale alagepa kavaʼmo apamisanafeʼmo alika alo huka ateʼnane.

²⁰ Vayaʼmogimo apakaetegamo hosu kavaʼmo hisayafeʼmo vege nehayaʼmonanafa oʼageʼnaya kahaopalegamo alika fala kika apategane. Hosu gemoʼmo alino afepiʼmo oʼapatesiyafeʼmo alagepa huka yagaika apategane.

²¹ Ala kava neʼmo aita auletapa ateyo. Kame vayaʼnimogimo faiʼa vego huʼa nateʼnaya afinaʼmo agaemo lusi kava huno nagaefeʼmo hau ayamopafiʼmo hauʼniya kavaʼmo alino naveliʼniye.

²² Nagaemo lusi kava huʼna koli nehuʼnaeʼmo, Ago naha faino nataleʼniye, huʼna huʼnovaʼmonanafa kagaefeʼmo naha mao, naha mao, huʼna keya aeʼnogeka ago afiʼnane.

²³ Lapaote vayaʼamogitapae, huʼna, Ala kava nefeʼmo lapau lapayamopafiʼmo lapaino. Ala kava neʼmoʼa alagepa huʼa akame nehaya vayaʼaiteʼmo yagaino neʼapateyanageʼa alagepa huʼa maige maige huʼa maigae. Agaemo himuʼnamu vayaʼmogi hosu kavaʼmo anonaʼapilefeʼmo apamigiye.

²⁴ Muki Ala kava nefeʼmo lapakesamo afita fatago hutetapa afole aisiya kavafeʼmo lapamogaga neʼaiya vayaʼmogitapae, huʼna, koli osutapa lokiya vaitapa maiyo. Agaemo lokiya vaino lapategaiyanagi.