Samu 30 - The Keyagana NT and 25 OT books

Mago vekamoʼmo Gotifeʼmo nunumuʼmo huʼnigeno Gotiʼa afiʼniyaʼmofeʼmo haoke heʼniya kavafeʼmo huʼniya gemae

¹ O Ala kava nene, huʼna, Kagaemo nagufamo alika katika nateʼnanaʼmofeʼmo ala kagikamo kamiguve. Kame vayaʼnimogimo aeʼa naga seteʼa apamogaga aiʼsaya kaʼmo alika akani maleʼnane.

² O Ala kava neʼmo Gotiʼnimogae, huʼna, Nagaemo kagaefeʼmo keya aeʼnogeka nahamaeʼnane.

³ O Ala kava nene, huʼna, Kagaemo nagaemo ofalisuvafeʼmo alagi naha maeʼnane. Nagaemo faliʼnaya vayaʼmo uʼa lamiʼnaya kelifiʼmo uʼna olamisuvafeʼmo lokiya vaika nateʼnane.

⁴ Lapaote vayaʼmogitapae, huʼna, Ala kava nefeʼmo yokemo hutapa agiʼaleʼmo alitapa asaga hiyo. Lapakaemo aote agiʼalefeʼmo lapakesamo afiʼnetapaeʼmo lapaoke heyo.

⁵ Agaemo aise aise afinaʼmo aipamo neleyaʼmonanafa fikumo hapa maeno neʼapamiya vayaʼmogi maige maige huʼa maigae. Lagaemo haniʼilagamo aviʼyaʼmo hugunaʼmonanafa neteʼmo lamogaga aigune.

⁶ Nagaemo alagepa huʼna maiʼnova afinaʼmo huʼnaeʼmo, Muki afinaʼmo alagepa huʼna maiguve, huʼna huʼnove.

⁷ O Ala kava nene, huʼna, Fikumo nahamaeka namiʼnanageʼna alagi alagepa huʼna maiʼnovaʼmonanafa kaugosafiʼmo okagesuvafeʼmo aika ati kaeʼnanageno naipamoʼmo kana huʼniye.

⁸ O Ala kava nene, huʼna, Nagaemo kagaefeʼmo keya aeʼnove. Nagaemo huʼnaeʼmo Naha mao, huʼna lokiya gefatiʼmo ge huʼnove.

⁹ Nagaemo faliteʼna kelifiʼmo uʼna lamisuvaʼmoʼmo haiya kava huka kaha maesiya yaʼmo aligane. Kasalisiya nagufamoʼmo kagikaleʼmo alino asaga hisifiye. Faliʼnaya vayaʼmogimo alagepa kavakalefeʼmo aeʼa hakalo huʼa hapa paisafiye.

¹⁰ Ala kava nene, huʼna, Geʼnimo afiyo. Kahau huka nato. Naha mao.

¹¹ Kagaemo naipafatiʼmo kana huʼniya kavaʼmo alika ataleteka namogaga aisuva kavaʼmo namiʼnane. Kogu kukenamo asagika ataleteka namogaga aisuva kukenamo vaika nateʼnane.

¹² Ani kavaʼmo huʼnanaʼmofeʼmo nagaemo afaʼa oʼmaiʼna yokemo huʼna kagikaleʼmo aliʼna asaga huguve. O Ala kava neʼmo Gotiʼnimogae, huʼna, Muki afinaʼmo kahaoke hegauve, huno huʼniye.