Samu 29 - The Keyagana NT and 25 OT books

Ala kava neʼmo agaemae, huno huʼniya gemae

¹ O lokiyatapiʼe vayaʼmogitapae, huʼna, Ala kava neʼmo agiʼaleʼmo alita asaga hiyo. Ala kava neʼmo lokiyaʼaʼe vekamo ha le konali vekamo maiʼniye, hutapa hiyo.

² Anonaʼalefeʼmo Ala kava neʼmo agiʼaleʼmo ha le konali agiʼaleʼmo alita asaga hiyo. Ala kava neʼmoʼa alagepa aulagamo neʼageya kavaʼmo aote alagepa kavaʼmo alita vaigekana hutetapa Ala kava nefekeʼmo mono hiyo.

³ Ala kava neʼmoʼa ge nehigenoʼaeʼmo agemoʼmo solovala aniʼmo agotofuleʼmo aino atagu nefae. Ha le konali Goti agemoʼmo hakalu hakalu huge muki solovala haopalegamo hakalu hakalu huge nehiye.

⁴ Ala kava neʼmo agemo lokiyaʼageʼmo neʼaiye. Ala kava neʼmo agemoʼmo alagi hogote kini vekamo agegana huno haneʼniye.

⁵ Ala kava neʼmoʼa agemo neʼaigenoʼaeʼmo Lemanoni kotega Sita yosamo U yosagana huno aeno apalo neʼatiye.

⁶ Gotiʼa Lemanoni avemoʼmo pulumakamogi apanaʼaumogimo aeʼa hailo hailo nehaya agufa kavaʼmo hisiyafeʼmo alino he tino neʼate. Agaemo Hemoni avemoʼmo ve pulumaka aikelimogimo aeʼa hailo nehaya agufa kavaʼmo hisiyafeʼmo alino he tino neʼate.

⁷ Ala kava neʼmoʼa agemo neʼaigenoʼaeʼmo hiyapatiʼmo aeno ha nele.

⁸ Agemo neʼaigenoʼaeʼmo kaʼme kotegamo alino atete huno neʼate. Ala kava neʼmoʼa Kenesi koʼmo alino atete huno neʼate.

⁹ Ala kava neʼmoʼa agemo neʼaigenoʼaeʼmo afela afu anagaʼmo apanaʼaumo alino ha maleno neʼapate. Agemo neʼaigenoʼaeʼmo muki yosamo haitaʼamo alino hakeno neʼatale. Muki vayaʼmo Ala kava neʼmo alopa mono nopiʼmo maiʼnaya vayaʼmogimo huʼapaeʼmo, Ha le konali Gotiʼae, huʼa agiʼaleʼmo aliʼa asaga nehae.

¹⁰ Ala kava neʼmoʼa vayaʼaiteʼmo yagaino neʼapateya siyaʼaleʼmo fai maiʼneno aniʼmo neheya kavateʼmo yagaiʼniye. Ala kava neʼmo kini vekamogeno fai maiʼneno yagaino hano osuno yagaige yagaige huno maigiye.

¹¹ Ala kava neʼmoʼa vayaʼamo lokiyaʼamo apamino. Ala kava neʼmoʼa vayaʼamo alino auleno apateno.