Samu 28 - The Keyagana NT and 25 OT books

Nunumuʼmo huʼniya gemo Gotiʼa afiʼnigenoʼaeʼmo amogaga aiʼniya gemae

¹ O, Ala kava nene, huʼna, Alopa yafaʼnimo maiʼnane. Kagaefeʼmo keya aeʼna ge huguve. Kagaemo ge osuka nunumuʼmo hisuva geleʼmo aeka atagaina osisanaʼmoʼmo nagaemo vayaʼmo alopa kelifiʼmo uʼa lamiʼa maiʼnaya vayakana huʼna maiguve.

² Nagaemo kagaefeʼmo keya aeʼna aukaya hisuva gemo afiyo. Nagaemo nunumuʼmo nehuʼnaeʼmo kagae aote mono noʼmo haneʼniya yategamo nayaʼmo aliʼna asaga hisuva afinaʼmo geʼnimo afiyo.

³ Kagaemo hosu vayaʼe hosu kavaʼmo nehaya vayaʼeʼmo hosu kotegamo apavalelika visana afinaʼmo apakaeʼeʼmo magokepiʼmo navalelika oʼuvo. Apakaemo hapaopaleʼmo maiʼnaya vayaʼaifeʼmo huʼapaeʼmo, Magokepiʼmo alagepa huta maigune, huʼa nehayaʼmonanafa hosu kavaʼmo hisaya kavaʼmo apaipafiʼmo havaiteʼniye.

⁴ Ani vayaʼmogimo nehaya hosu kavatefeʼmo apamiyo. Hosu kavaʼmo anonaʼapilefeʼmo apamiyo. Apakaemo nehaya hosu kavatefeʼmo apamiyo. Muki hosu kavaʼapilefeʼmo haiʼmo apamiyo.

⁵ Apakaemo Ala kava neʼmo alopa aliʼyaʼaeʼmo apakesamo oʼafige ayatetiʼmo alopa kavaʼmo nehiya kavafeʼmo ina agufa kavaʼmo nehiye, huʼa huge nehae. Agaemo lokiya vaino oʼapateno alagi alino hano huno apatalegaiye.

⁶ Agaemo aukaya huʼna nunumuʼmo huʼnova geʼnimo afiʼniyaʼmofeʼmo Ala kava neʼmo aliʼna auleʼna ategauve.

⁷ Ala kava neʼmoʼa lokiyaʼnimo maiʼnenoʼaeʼmo halegukana huno aino nati kaeʼnigeʼna alagepa huʼna maiʼnove. Naipamoʼmo agaefeʼmo alino amufa amiʼnigeno naha maeʼniye. Naha maeʼniyaʼmofeʼmo naipafiʼmo namogaga neʼauvanageʼna yokemo huʼnaeʼmo ala agiʼamo amiguve.

⁸ Ala kava neʼmoʼa lokiyaʼapimo maiʼneno uveli lakino ateʼniya Kalaisi vekamo agufamo alino katino ateʼnigenoʼaeʼmo afaʼa maiʼniye.

⁹ Gotiyo, huʼna, Vayakamo apakufamo alika katika apateteka alika auleka apato. Sipisipileʼmo yagaino apateʼniya vekamo sipisipiʼaleʼmo yagaiʼniya kava huka sipisipikaleʼmo yagaika apateteka muki afinaʼmo alagepa huka yagaika apateme apateme uka maiyo.