Samu 27 - The Keyagana NT and 25 OT books

Ala kava neʼmoʼa naha maesigeʼna aeʼna apakasegauve, huno huʼniya gemae

¹ Ala kava neʼmo ha le yaʼnimo aepa vekamo maiʼneno nagufamo alino katino neʼnateya vekamo maiʼniyaʼmofeʼmo ina lagifeʼmo koli huguve. Ala kava neʼmo himamuʼnimo aepa vekamo maiʼniyaʼmofeʼmo ina lagifeʼmo atete huguve.

² Hosu vayaʼmo kame vayaʼnimogi nagaetegamo hosu kavaʼmo nehaya vayaʼmogimo namagiʼa nagufamo nesayafeʼmo nagaetegamo eʼapaeʼmo apagoʼyamo faiʼa asagauʼa aiʼnae.

³ Asole vayaʼmogimo kame huʼa natesayafeʼmo eʼa maiʼnisageʼnaeʼmo naipamoʼmo atete osugiye. Kame huʼa natesayana naipamoʼmo lokiya vaigiye.

⁴ Nagaemo Gotiʼa magoke yaʼmo namisiyafeʼmo nahauʼniyanageʼna ani yaʼmo alisuvafekeʼmo kahauya huguve. Nagaemo Ala kava neʼmo nopiʼmo muki afaʼa maisuva afinaʼmo maiʼneʼna Ala kava neʼmo konali yaʼamo aulu heʼna ageteʼnaeʼmo alopa mono noʼafiʼmo maiʼneʼna ge huʼna afi gegauve.

⁵ Hanageke yaʼmo afole aisiya afinaʼmo alino fala kino natege alopa mono noʼafiʼmo alino fala kino natege huteno yatala yafateʼmo nasagauno faino nategaiye.

⁶ Nagaemo kame vayaʼnimo aeʼna apakaseteʼna alopa mono noʼafiʼmo ofalinimo amiteʼna alopa gefatiʼmo ge huʼna namogaga aiguve. Ala kava nefekeʼmo alopa gefatiʼmo yokemo huteʼna agiʼaleʼmo aliʼna asaga huguve.

⁷ Ala kava nene, huʼna, kagaefeʼmo keya aeʼna ge hisugekaeʼmo geʼnimo afiyo. Kahau huka nateteka geʼnileʼmo aeka atagaina huka naha paiyo.

⁸ Kagaemo nagaefeʼmo hukaeʼmo nagaefeʼmo kahauya hulika eno huka nehanageʼnaeʼmo kagaefeʼmo nagaemo kahauya huliʼna uguve, huʼna nehuve.

⁹ Kaugosamo alika fala kiliʼneka kaipamo leka nateteka aliʼyakamo neʼaluva vekamo naha faika oʼnatalo. O Gotiyo, huʼna, naha maeʼnananagi kakameʼyamo namiteka nataleka oʼuvo.

¹⁰ Itaʼni afoʼnilaʼmoganimo anakameʼyamo namisaʼana Ala kava neʼmoʼa yagaino nategaiye.

¹¹ Kame vayaʼnimo maiʼnayanagi kagae kaʼmo nave ligeʼna agetesugeka ani kateʼmo navalelika uvo.

¹² Kame vayaʼnimogi aigofe gemo huge kamagigune huʼa huge nehayanagi navaleka apayapiʼmo oʼapamiyo.

¹³ Nagaemo ofaliʼna afaʼa maiʼnisugeno Ala kava neʼmoʼa alagepa yaʼamo namigiye, huʼna nagesamo afiʼna fatago nehuve.

¹⁴ Ala kava nefekeʼmo agava maiyo. Lokiya vaita maiʼnigenoʼao lokiya vaino lapateno. Ala kava nefekeʼmo agava maiyo, huʼna nehuve.