Samu 26 - The Keyagana NT and 25 OT books

Fatago vekamoʼmo nunumuʼmo huʼniya gemae

¹ Apakaemo nagaepikeʼmo aliʼa faiʼa nateʼnae. O Ala kava nene, huʼna, Alagepa kavaʼmo huʼnovaʼmofeʼmo kagaemo hukaeʼmo, Haʼao, alagepa kavaʼmo huʼniye, huka hapa paiyo. Nagaemo Ala kava nefeʼmo aliʼna amufa neʼamuvaʼmofeʼmo aeʼna halu oʼvalegauve.

² O Ala kava nene, huʼna, Namalageka huvo. Nagesamo neʼafuva kavaʼe naipafiʼmo nahauʼniya kavaʼniʼeʼmo alika fako huvo. Hosu kavaʼmo nehufi nosufi huka kavaʼnimo alika fako huvo.

³ Naulagaleʼmo nagaefeʼmo kahau kayamopafi nekahaiya kavaʼmo haneʼnigeʼna ageʼnove. Nagaemo lama gekamo akame nehuve.

⁴ Nagaemo aigofe vayaʼeʼmo lokaeʼna oʼmaiʼnove. Lole apaipaʼe vayaʼeʼmo fai noʼmauve.

⁵ Hosu kavaʼmo nehaya vayaʼeʼmo maisuvafeʼmo naini huʼnove. Apakaeʼeʼmo magokepiʼmo lokaeʼna oʼmaiguve.

⁶ Nagaemo hosu kavaʼmo nosuvaʼmofeʼmo aliʼna apave lisuvafeʼmo nayatalaʼmo sese huguve. O Ala kava nene, huʼna, Vayakaʼeʼmo mono nokafiʼmo mono huguve.

⁷ Nagaemo Samu yokemo huʼna kahaoke hegauve. Nagaemo alopa kanale alagepa kavaʼmo nehana kavakalefeʼmo aeʼna hakalo huʼna hapa paiguve.

⁸ Ala kava nene, huʼna, Nagaemo mono nokaeʼmo nahau nayamopafiʼmo nahauʼniye. He, ha le konali yakamo kagae nopiʼmo haneʼnigeno neʼnahaiye.

⁹ Kagaemo hosu kavaʼmo nehaya vayaʼeʼmo alika hosu huka oʼnato. Kagaemo kamitimo apamagiʼnaya vayaʼmogimo alisaya kayoʼmo nagaemo oʼnamiyo.

¹⁰ Apakaemo alu hosu kava alu hosu kavaʼmo hisayafeʼmo alo huʼnae. Kutulu monimo alisayafeʼmo apamogaga neʼaiye.

¹¹ Hosu kavaʼmo nehayaʼmonanafa nagaemo fatago kavaʼmo nehuvanagi kahau huka nateteka nagufamo alika katika nato.

¹² Nagaemo alagepa kateʼmo neʼuve. Goti vayaʼamogi aliʼa anupa huʼa neʼmaiya yategamo uʼna Ala kava neʼmo agiʼaleʼmo aliʼna asaga huguve.