Samu 25 - The Keyagana NT and 25 OT books

Hosu kavaʼaeʼmo agesamo afitenoʼaeʼmo nunumuʼmo huʼniya gemae

¹ O Ala kava nene, huʼna, kagaefekeʼmo nunumuʼmo nehuʼnaeʼmo nagupi mafaʼnemo aliʼna asaga nehuve.

² O Gotiʼnimogae, huʼna, aliʼna amufa kamiʼnovaʼmofeʼmo fiku yanageʼa kame vayaʼnimogimo aeʼa nagasesageno navagage hugiyanagi oʼnatalo.

³ He, muki vayaʼmogimo kagava neʼmaiya vayaʼmo hapa maegenoʼao apavagage osino. Apakaetegamo mago hosu kavaʼmo osuʼnayaʼmonanafa fiku hosu kavaʼmo nehaya vayaʼmo hapa oʼmaeka afaʼa apatalegenoʼao apavagage hino.

⁴ O Ala kava nene, huʼna, kahauʼninageka visuva kaʼmo nave liyo. Ani kateʼmo visuvafeʼmo alika naya malo.

⁵ Nagufamo alika katika neʼnatana Gotigamo maiʼnanaʼmofeʼmo lama gekamo akame hisuvafeʼmo alika naya malo. Muki afinaʼaeʼmo kagava neʼmauve.

⁶ O Ala kava nene, huʼna, akeyaʼvilagamo alagepa huka kahau huka apatege kahau kayamopafiʼmo kahauge huka maiʼnana kavafeʼmo kagesamo afiyo.

⁷ Neya vekamo maiʼneʼnaeʼmo hosu kavaʼmo huge gekamo ago amagiʼna atalege huʼnova kavafeʼmo kagesamo oʼafiyo. O Ala kava nene, huʼna, kahau huka apatege alagepa huka hapa maege nehukaeʼmo nagaefeʼmo kagesamo afiyo.

⁸ Ala kava neʼmo alagepa fatago vekamo maiʼniyaʼmofeʼmo hosu vayaʼmogi alagepa kateʼmo visayafeʼmo alino apaya malegaiye.

⁹ Agaemo fatago kavaʼaletiʼmo yagu yaga kavaʼmo nehaya vayaʼmo alino ho huno neʼapate. Agaemo yagu yaga kavaʼmo nehaya vayaʼmo kaʼamo apave ligiye.

¹⁰ Agaemo kotalakemo hu maleʼniya geʼamo akame huge avayafatiʼmo huʼniya geʼamo afige huʼa maiʼnaya vayaʼmo hau huno neʼapateya kateʼe geʼamo akame nehiya kateʼeʼmo apavalelino neʼviye.

¹¹ O Ala kava nene, huʼna, ala kagikalefeʼmo hosu kavaʼnimo alika atalo. Asole hosu kavaʼmo huʼnovaʼmofeʼmo alika atalo.

¹² Ala kava nefekeʼmo koli nehaya vayaʼmo ina lagimo maiʼnae. Ala kava neʼmoʼa afaʼa alino apaya malesigeʼa alagepa kateʼmo ugae.

¹³ Apakaemo alagepa huʼa maisageʼa apakinago vayaʼmogi ma mopamo aligae.

¹⁴ Ala kava neʼmoʼa agaefeʼmo koli nehaya vayaʼmo alino fala ki maleʼniya geʼamo hapa paigiye. Hapa paiteno kotalakemo hu maleʼniya gemo aepaʼamo alino apave ligiye.

¹⁵ Agaemo natafauʼniya umenifatiʼmo hatu maeno nategaiyaʼmofeʼmo Ala kava nefekeʼmo aulu heʼna neʼagove.

¹⁶ Nagaemo nagaiʼnigeʼmo magokeʼageʼmo maiʼneʼna kana yaʼmo aliʼnovaʼmofeʼmo aika afe leka nagaemo nageteka kahau huka nato.

¹⁷ Naipafiʼmo haneʼniya kana yaʼnimoʼa magoʼe huno kositeno afole aiʼniyanagi hanageke yapatiʼmo nagufamo alika katika nato.

¹⁸ Kana yaʼmo alige nagafu kige huʼna maiʼnisugeka nagetekaeʼmo muki hosu kavaʼnimo alika atalo.

¹⁹ Kame vayaʼnimo asole vayaʼmo maiʼnayaʼmofeʼmo apakaefeʼmo kagesamo afiyo. Apakaemo nagaefeʼmo apaini huʼnae.

²⁰ Nagupi mafaʼneleʼmo yagaika ateʼneka hosu kavategatiʼmo navalelikuka naote nato. Nagaemo kagaefekeʼmo aliʼna amufa kamiʼnovaʼmofeʼmo navagage osino.

²¹ Nagaemo kagava maiʼnovaʼmofeʼmo naha maegeʼnao lama ge huʼna fatago kavakamo akame huteʼna alagepa kavaʼmo huʼna maiguve.

²² O Gotiyo, huʼna kagaemo Isaleli vayaʼmo hanageke yapiʼmo maiʼnagi miya faika hatu maeka apato.