Samu 24 - The Keyagana NT and 25 OT books

Ha le konali kini vekaeʼmo ava gemo huʼniya gemae

¹ Ma mopamo Ala kava neʼmo mopamae. Muki ma mopafiʼmo haneʼniya yaʼmo agaiʼa yaʼageʼmo haneʼniye. Ma mopaʼe ma mopafi vayaʼeʼmo agaiʼa mopamo hanege agaiʼa vayaʼmo maige huʼnae.

² Agaemo ma mopamo solovala aniʼmo agotofuleʼmo alo hu maleʼniye. Aniʼmo agotofuleʼmo faino ateʼniye.

³ Haiya agufa vayaʼmogimo Ala kava neʼmo aveleʼmo afaʼa uʼa haiʼa maigae. Haiya agufa vayaʼmogimo aote mono noʼafiʼmo afaʼa uʼa haiʼa maigae.

⁴ Apayateʼmo oʼaniʼyaʼmo ofaiʼnisiya yaveyave apaipa vayaʼmogimae. Afa yatefeʼmo mono osuge apagoʼyamo ataleteʼa aigofe gemo osuge nehisaya vayaʼmogimae.

⁵ Ala kava neʼmoʼa alino auleno apategaiye. Gotiʼa apakaemo apakufamo alino katino neʼapateya vekamoʼmo fatago kavaʼamo alino apamigiye.

⁶ Alino apamisigeʼa Yekopu Gotiʼamoʼmo agesayafeʼmo kahauya nehae. Kaugosafiʼmo kagesayafeʼmo kahauya nehae.

⁷ Yafa lafi kegiʼya kate kitamo yakitapa ateyo. Hanege hanege huno nehaneya mono note kitamo yakitapa ateyo. Yakitapa atesagenoʼaeʼmo ha le konali kini vekamo eno haineno.

⁸ Ani ha le konali kini vekamo ina laʼae. Ala kava neʼmo himamu lokiyaʼaʼe vekamae. Ala kava neʼmoʼa himamuʼaletiʼmo kame huno neʼapateya vekamae.

⁹ Yafa lafi kegiʼya kate kitamo yakitapa ateyo. Hanege hanege huno nehaneya mono note kitamo yakitapa ateyo. Yakitapa atesagenoʼaeʼmo ha le konali kini vekamo eno haineno.

¹⁰ Ani ha le konali kini vekamo ina laʼae. Asole ami vayaʼaiteʼmo yagaino neʼapateya kini vekamo ha le konali kini vekamo maiʼniye.