Samu 23 - The Keyagana NT and 25 OT books

Sipisipileʼmo yagaiʼnigeʼa alagepa huʼa maiʼnaya kavafeʼmo huʼniya gemae

¹ Vayaʼmogimo sipisipileʼmo yagaiʼa neʼapataya kava huno Ala kava neʼmoʼa yagaino neʼnateyanageʼna mago yafeʼmo alagi kafu osuguve.

² Agaemo sipisipi anagaʼmogimo muki hegafatalili kahaumo neʼnaya yategamo alino havaeno neʼnate. Uno hogoteteno age noʼaiya ani haigiʼale ani haigiʼaleʼmo navalelino neʼviye.

³ Nagupi mafaʼnemoʼmo halate alino alagepa huno neʼate. Agaemo agiʼalefeʼmo fatago kavaʼmo hisuvafeʼmo alu kate alu kateʼmo navalelino neʼviye.

⁴ He, nagaemo uʼna kagoʼmufilagamo falisuva ulunapiʼmo faleʼna uʼna haiʼna umenitata nehugekaeʼmo nagaeʼeʼmo magokepi lokaeka maiʼnanaʼmofeʼmo muki alu hosu kava alu hosu kavafeʼmo alagi koli osuguve. Kayokaletiʼmo nagufamo alika katika natege aino kalagifa hayopa kayokaletiʼmo yagaika natege nehukaeʼmo naipamo alika falu huka neʼnatane.

⁵ Kagaemo kame vayaʼnimogi apaulagaleʼmo neʼyaʼnimo nesuvafeʼmo naulagaleʼmo hiʼyalamuteʼmo neʼmalane. Kagaemo nagenopafiʼmo uvelimo lakika neʼnatane. Aniʼmo kapuʼnifiʼmo lakiʼnanageno lamino havai teteno aino vali nelamiye.

⁶ Ma mopafiʼmo maime maime neʼvisugenoʼaeʼmo alagepa yaʼmo nakame nakame huno namige namige huno maiteno hau huno nategaiye. Hutesigeʼna Ala kava neʼmo noʼafiʼmo muki afinaʼmo uʼna haiʼna maige maige huʼna maiguve.