Samu 22 - The Keyagana NT and 25 OT books

Kalaisiʼa faliʼniya kavafeʼmo huʼniya gemae

¹ Gotiʼnimogae Gotiʼnimogae, huʼna, na kava higekaeʼmo nataleka uʼnane. Naha mao, huʼna keya aeʼna ge nehuvaʼmonanafa na kava higekaeʼmo natalekuka afagiʼaleʼmo maiʼneka naha noʼmane.

² O Gotiʼnimogae, huʼna, felugamo keya aeʼna ge huʼnogekaeʼmo geʼnimo oʼafiʼnane. Haniʼilagaʼeʼmo keya aeʼna ge huʼnogekaeʼmo naha oʼmaeʼnanageʼna maiʼna haga nolove.

³ Kagaefeʼmo ge huʼnovaʼmonanafa kaote vekamo maiʼnane. Kaote vekamo maiʼnanageʼapaeʼmo Isaleli vayaʼmogimo kagikaleʼmo aliʼa asaga huʼa nekatae.

⁴ Laginago vayaʼmogimo kagaefekeʼmo aliʼa amufa kamiʼnagekaeʼmo apakufamo alika katika apateʼnane.

⁵ Kagaefekeʼmo keya aeʼa ge huʼnagekaeʼmo apakufamo alika katika apateʼnane. Kagaefeʼmo aliʼa amufa kamiʼnagekaeʼmo hapa maeʼnanagenoʼaeʼmo apaipamoʼmo kana osuʼniye.

⁶ Huʼnayaʼmonanafa nagaemo vayakana huʼna oʼmaiʼnofa hagifagana huʼna maiʼnogeʼapaeʼmo ina agufa vekamo maiʼniye, huʼa huteʼa apakameʼyamo neʼnamiye.

⁷ Muki vayaʼmogimo nageteʼapaeʼmo huʼa faipa huʼa neʼnatae. Sagani huʼa natege keka huʼa natege huteʼapaeʼmo,

⁸ Ala kava neʼmoʼa ha maesiyafeʼmo alino amufa amiʼniyana na kava higenoʼaeʼmo ha noʼmae. Ala kava neʼmoʼa amuse huno neʼatesiyaʼmoʼmo na kava higenoʼaeʼmo ha noʼmae, huʼa nehae.

⁹ Nehayaʼmonanafa kagaemo itaʼnimoʼmo alagepa huka ha maeʼnanageno alino nateʼniye. Nute mafaʼnemo maiʼnogekaeʼmo alagepa huka yagaika nateʼnanageʼnaeʼmo aliʼna amufa kamiʼnove.

¹⁰ Nagaemo itaʼnimoʼmo alino nateʼniya afinatetiʼmo kagaefekeʼmo nagesamo afiʼna fatago hume hume eʼnove. Itaʼnimoʼmo alino nateʼniya afinatetiʼmo muki afinaʼaeʼmo Gotiʼnimogamo maige maige huka maiʼnane.

¹¹ Nagufaleʼmo hanageke yaʼmo afole neʼaigeʼapaeʼmo naha maesaya vayaʼmo oʼmaiʼnayanagi natalekuka afagiʼaleʼmo oʼmaiyo.

¹² Kame vayaʼnimo Masani kotega afela ve pulumaka anagaʼmogi nehaya kava huʼa faiʼa vego huʼa nateʼnae.

¹³ Laiyoni anagaʼmogi apaka teʼnigeʼapaeʼmo kae kae nehaya kava huʼa nagaetegamo apavayamo aka nehae.

¹⁴ Aniʼmo aliʼa mopafiʼmo lakitalageno uno lamino hano nehiya kava huno lokiyaʼnimo alagi ohaneʼniye. Muki nayamufaʼnimo uno aeno haniʼniya nayamufamo aino hatu maeʼniye. Naipamoʼmo ani hegekana huʼniye.

¹⁵ Hapamo leno hau nehiya kava huno lokiyaʼnimo hau huʼnigeno lokiyaʼnimo alagi ohaneʼniye. Ani kava huno navenafuʼnamo hau huʼnigeno navayafiʼmo aeno kamaeʼniye. Nataleʼnanageʼna falisuvafeʼmo nehuve.

¹⁶ Afela kalamogi afumo hapaesayafeʼmo faiʼa vego huʼa neʼapataya kava huʼa hosu vayaʼmogimo faiʼa vego huʼa neʼnatae. Nayapiʼmo nili aige naiyafiʼmo nili aige huʼnae.

¹⁷ Muki nayamufaʼnimo afole aiʼnigeʼna ageʼnove. Kame vayaʼnimogimo nageteʼapaeʼmo apamogaga neʼaiye.

¹⁸ Muki kukena yaʼnimo aliʼa fako huʼa aliteʼa yatala kukena yaʼnileʼmo yokalo leteʼapaeʼmo aeno apakaseʼniya vekamoʼmo aliʼniye.

¹⁹ Ala kava nene, huʼna, afagiʼaleʼmo uka oʼmaiʼneka naha neʼmana vekaʼnimogae, huʼna, malage huka eka naha mao.

²⁰ Nagupi mafaʼnemo afela osesiyafeʼmo naha maeteka afela kalagana agufa vayaʼai apayapatiʼmo nagufamo alika katika nato.

²¹ Alopa afela laiyonimo avayafatiʼmo nagufamo alika katika nato. Afela ve pulumaka anagaʼmogimo oʼnahaesayafeʼmo nagufamo alika katika nato. Keya aeʼna ge nehugekaeʼmo geʼnileʼmo aeka atagaina huʼnane.

²² Naganaʼnimogifeʼmo kagaemo naha maeʼnana kavafeʼmo nava gemo aeʼna hakalo huʼna hapa paiguve. Aliʼa anupa huʼa neʼmaiya vayaʼai folagapatiʼmo kagikaleʼmo aliʼna asaga huguve.

²³ Ala kava nefekeʼmo koli hutetapa mono nehaya vayaʼmogitapamo ala agiʼamo amiyo. Yekopu nofi vayaʼmogitapamo agiʼaleʼmo alita asaga hiyo. Isaleli nofi vayaʼmogitapamo agaefekeʼmo mono hiyo.

²⁴ Hanageke yaʼmo neʼaliya vayaʼmo apataleno aino afe leno akameʼyamo noʼapamifa keya aeʼa ge nehagenoʼaeʼmo geʼapimo afiteno hapa neʼmae.

²⁵ Asole vayaʼmo aliʼa anupa huʼa neʼmaiya folagapatiʼmo kagikaleʼmo aliʼna asaga huguve. Kagaefeʼmo mono nehaya vayaʼai apaulagaleʼmo kagaefeʼmo ani kavaʼmo huguve, huʼna kaha paiʼnova kavaʼmo huguve.

²⁶ Ala apakiʼapimo oʼaliʼa yagu yaga huʼa neʼmaiya vayaʼmogi neʼyaʼmo neʼa apamu hugae. Agaefeʼmo kahauya huʼa agesayafeʼmo neʼaya vayaʼmogi Ala kava neʼmo agiʼaleʼmo aliʼa asaga hugae. Muki afinaʼmo yuʼilaga vekatapimo alagepa huno maigiye.

²⁷ Muki ma mopamo loleʼe loleʼe atupaleʼmo maiʼnaya vayaʼmogimo Ala kava nefekeʼmo apakesamo afiteʼa aiʼa atagi neʼa agaetegamo egae. Muki alu nofi vaya alu nofi vayaʼmogimo agaefekeʼmo mono hugae.

²⁸ Ala kava neʼmo kini vekamo maiʼnenoʼaeʼmo muki alu nofi vaya alu nofi vayaʼaiteʼmo yagaino neʼapate.

²⁹ Ma mopafiʼmo alagepa huʼa neʼmaiya vayaʼmogimo neʼyaʼmo neteʼa agaefeʼmo mono hugae. Muki vayaʼmogimo apakaiʼapimo afaʼa hapa oʼmaeʼa faligefeʼmo huʼnisaya vayaʼmogi apaleʼyamo faiteʼa ape huʼa maigae.

^30-31 Afole aisaya vayaʼmogimo aliʼyaʼamo aligae. Vayaʼmogi aliʼa oʼapateʼnayanageʼa henagaʼamo afole aisaya vayaʼaifeʼmo Ala kava nefeʼmo ava gemo huge lagufamo alino katino lateʼniye huʼa huge hugae.