Samu 21 - The Keyagana NT and 25 OT books

Ala kava neʼmoʼa kini vekamo ha maeʼnigeno agiʼaleʼmo alino asaga huno ateʼniya gemae

¹ O Ala kava nene, huʼna, Kini vekamoʼmo lokiyakalefeʼmo amogaga aigiye. Agaemo agufamo alika katika ateʼnana kavafeʼmo lusi kava huno amogaga aigiye.

² Kagaemo aipafiʼmo hauʼniya yaʼmo amiʼnane. Agaemo kagaefeʼmo ge huno kafigeʼniya yaʼmo amiʼnane.

³ Kagaemo agaeʼeʼmo fotu hisanafeʼmo eka alika auleka ateʼnana yaʼmo amiʼnane. Kagaemo goli yafaʼmo haneʼniya kini kakolitamo agenopaleʼmo maleka ateʼnane.

⁴ Agaemo kagaefeʼmo afaʼa maisiya yafeʼmo ge huno kafigeʼnigekaeʼmo ago amiʼnane. He, kagaemo maige maige huno maino hano osuno maisiya yaʼmo ago amiʼnane.

⁵ Kagaemo agufamo alika katika ateʼnana kavatetiʼmo agaemo ha le konali yaʼmo aliʼniye. Kagaemo ala agiʼagi lokiyaʼagi huka amiʼnane.

⁶ Kagaemo alagi alika auleka atetekaeʼmo aulena vekamo maige maige huno maigiye, huka huʼnane. Agaeʼeʼmo lokaeka maiʼnanaʼmofeʼmo lusi kava huno amogaga neʼaiye.

⁷ Kini vekamoʼmo Ala kava nefeʼmo alino amufa neʼamiye. Agaemo muki vayaʼaina aeno apaka seʼniya Gotiʼa hau huno ateʼniye kavatetiʼmo he tino lokiya vaigiye.

⁸ O Kini vekae, huʼna, kagaemo muki kame vayakamo kahauya huka apakeka apatafaugane. Kagaefeʼmo apaini nehaya vayaʼmo kalavusi huka apategane.

⁹ Kagaemo afole yateʼmo afole aisana afinaʼmo ina kava huka alopa atamoʼmo muki yaʼmo neleya kava huka kaipamo leno katesigeka kame vayakamo alika hano huka apatalegane. Ala kava neʼmoʼa aipamo lesigenoʼaeʼmo atamoʼmo apalegaiye.

¹⁰ Kagaemo muki mafaʼne anagaʼapimo kamitimo apamagigane. Apakinago vayaʼmo ma mopafi vayapatiʼmo alika hano huka apatalegane.

¹¹ Apakaemo aliʼa hosu huʼa katesayafeʼmo apakesamo afiʼnayaʼmonanafa afaʼa osugae. Vegemo huʼnayaʼmonanafa hisaya himamuʼapimo ohane.

¹² Agaemo keveʼaletiʼmo apakaemo hapaesigeʼa apaune hegae.

¹³ O Ala kava nene, huʼna, Kagaemo lokiyakaletiʼmo ala kagi aliyo. Lagaemo yokemo nehutaeʼmo kagikaleʼmo alita asaga hugune.