Samu 20 - The Keyagana NT and 25 OT books

Gotifeʼmo nunumuʼmo huʼnigeno ha maeʼnigeno kamemo huno aeno agaseʼniya vekaeʼmo huʼniya gemae

¹ Kagaemo hanageke yaʼmo alisana afinaʼmo Ala kava neʼmoʼa kaha maeteno. Yekopu Gotiʼamoʼmo alagepa huno yagaino kateno.

² Agaemo noʼafiʼmo Saiyoni taonifatiʼmo kaha maeteno lokiya vaino kateno.

³ Agaemo muki kagae ofalinieʼmo agesamo afino. Agaemo muki leno sagaliʼniya ofalinimo amisana ofalinieʼmo haino.

⁴ Agaemo muki kahauʼniya yaʼmo kamino. Kagaemo muki aliguve, huka ago kagesamo afiʼnana aliʼyaʼmo alino afole aino ateno.

⁵ Lagaemo agaemo kagufamo alino katino katesiya kavafeʼmo lamogaga aigune. Lagaemo Goti agiʼalefekeʼmo kalahauʼmeʼmo asai malegaune.

⁶ Hemenimo nagaemo ago afiʼnovana Ala kava neʼmoʼa lekana paino ateteno uvelimo faleno ateʼniya vekamo agufamo alino katino neʼate. Agaemo aote kokuʼnapatiʼmo geʼaleʼmo aeno atagaina hugiye. Agaemo apakufamo alino katino neʼapateya lokiyaʼaletiʼmo geʼaleʼmo aeno atagaina hugiye.

⁷ Mago vayaʼmogimo kame talalaʼapiyeʼmo aliʼa amufa neʼamiye. Mago vayaʼmogimo hosi apiyeʼmo aliʼa amufa neʼamiyaʼmonanafa lagaemo Ala kava neʼmo Gotitimo agiʼalefeʼmo lagesamo afiʼnetaeʼmo alita amufa neʼamune.

⁸ Apakaemo asagauʼa aiteʼa alagi afela heʼnayaʼmonanafa lagaemo he tita lokiya vaita maiʼnone.

⁹ Ala kava nene, huta, Kagaemo lagufamo alika katika lato. Keya aesunageno kini vekamoʼmo getileʼmo aeno atagaina huno hino.