Samu 2 - The Keyagana NT and 25 OT books

Gotiʼa kini vekamo lekana paino ateʼniya yokemae

¹ Na kavaʼmo hisayafeʼmo malaga vayaʼmogi apavamusa valeteʼa apano neʼae. Vayaʼmogimo, mani kavaʼmo hugune, huʼa apakesamo neʼafiyaʼmonanafa afaʼa osugae.

^2-3 Ma mopafi kava vayaʼe kini vayaʼapimogiʼeʼmo Ala kava netegaʼe lekana paino ateteno uvelimo lakino faleno ateʼniya vekalegaʼeʼmo kame huʼana anatesayafeʼmo aliʼa anupa huʼa maiʼneʼa vegemo huʼapaeʼmo, yagaiʼana latesaʼagetaeʼmo anaiyafiʼmo oʼmaigune, huʼa nehae.

⁴ Kokuʼnapiʼmo fai maiʼniya vekamoʼmo kigi huno apategaiye. Ala kava neʼmoʼa, afa gemo nehae, huno nehiye.

⁵ Aipamo leno apatetenoʼaeʼmo lokiya gefatiʼmo nehigeʼapaeʼmo atete nehae.

⁶ Agaemo hunoʼaeʼmo, ani kavaʼmo nehayaʼmonanafa nagaemo Saiyoni kotega naote aveleʼmo lekana paiʼna ateʼnova kini vekamoʼmo yagaino apatesiyafeʼmo lekana paiʼna ateʼnove, huno hapa paiʼniye.

⁷ Kini vekamoʼmo hunoʼaeʼmo, Ala kava neʼmoʼa hu maleʼniya gemo aeʼna hakalo huʼna lapa paiguve, huno huʼniye. Agaemo, Hemeni afinaʼmo mafaʼneʼnimo aliʼna kateʼnogeka maiʼnane, huno naha paiʼniye.

⁸ Ge huka nafi gegeʼnao muki alu nofi vaya alu nofi vayaʼmo apavaleʼna kayapiʼmo apatesugeno muki mani mopamo kagaika mopamo haneno.

⁹ Kalipa mopaletiʼmo alo nehaya samomo kayotetiʼmo amagiʼnageno aino atagino aise aise nehiya kava huka aeni kayotetiʼmo apamagigane, huno naha paiʼniye.

¹⁰ Ani ge huʼniyaʼmofeʼmo kini vayaʼmogitapae, huʼna, alagepa hutapa afiyo. Ma mopafiʼmo yagaiʼnaya vayaʼmogitapae, huʼna, ehetapiye.

¹¹ Lapakaemo koli nehutapaekeʼmo Ala kava neʼmo aliʼyaʼamo aliyo. Atete nehutapaekeʼmo lapamogaga aiyo.

¹² Mafaʼneʼamo haetapa neyo. Fiku yanageno aipamo aiseʼamo leno lapateteno lapamagisigetapa kateʼmo asagautapa aigayanagi. Agaefeʼmo aliʼa amufa amiʼnaya vayaʼmo aulena vayaʼmo maiʼnae.