Samu 19 - The Keyagana NT and 25 OT books

Gotiʼa muki alo huʼniya yaʼmoʼmo ala agiʼamo neʼamiye, huno huʼniya gemae

¹ Kokuʼnateʼmo haneʼniya yaʼmoʼa Goti ha le konali yaʼaeʼmo aeno hakalo huno hapa nepaiye. Kokuʼnaʼmoʼa Goti alagepa aliʼyaʼamo alino apave neliye.

² Felugaʼae felugaʼaeʼmo ge nehunoʼaeʼmo haniʼilagaʼae haniʼilagaʼaeʼmo ageteʼa afisayafeʼmo alino apave neliye.

³ Muki ma mopafiʼmo maiʼneʼa alu apake alu apakemo neʼaiya vayaʼmogimo kokuʼnateʼmo haneʼniya yaʼmo ava gemo neʼafiye. Ava gemo oʼafiʼnaya vayaʼmo mago oʼmaiʼnae.

⁴ Kokuʼnateʼmo haneʼniya yaʼmo ava gemo muki haopalega mopamo loleʼe loleʼe atupalegamo aino atagu faeno uneno huʼniye. Gotiʼa yegemo noʼamo kokuʼnapiʼmo ki maleʼniye.

⁵ Aʼmo alisayafeʼmo nehaya vayaʼmogi noʼapimo ataleʼa apamogaga aime aime neʼvaya kava huno yegemoʼmo eno haineno uno nelamiye. Apayamufa vayaʼmogimo uʼa aeʼa apakasesayafeʼmo nagu nagu huʼa neʼvaya kava huno yegemoʼmo eno haineno uno nelamiye.

⁶ Yegemoʼa kokuʼnaʼmo aepalegatiʼmo eno haineno atupalegamo uno nelamiye. Yegemo nelegenoʼaeʼmo mago amuko nosiya haopalegamo ohaneʼnifa muki haopalegamo alagi leno amuko nehiye.

⁷ Ala kava neʼmo keʼaepa geʼamo kanale alagepa gemo haneʼneno apakupi mafaʼnemo alino alagepa huno neʼate. Ala kava neʼmo faigoko geʼamoʼmo aino ataginovano nosifa alagepa huno haneʼnenoʼaeʼmo oʼageʼnaya vayaʼmo alino apaya maleʼnigeʼa apakesamo neʼafiye.

⁸ Keʼaepa gemo api gemo haneʼnigeʼa neʼafiya vayaʼmogi apamogaga neʼaiye. Ani kava hiyo, ina kava osiyo, huno huʼniya gemo hosu gemo ohaneʼnifa alagepa geʼageʼmo haneʼneno apaulagamo alino ayakeno apateteno alino alagepa huno neʼapate.

⁹ Ala kava nefekeʼmo koli huteʼa mono nehaya kavaʼmo yaveyave kavaʼmo haneʼneno muki afinaʼmo hanege hanege huno hanegaiye. Ala kava neʼmoʼa alino fako huno neʼapateya gemo alagi lama gemo haneʼneno fatago gemo haneʼniye.

¹⁰ Alopa monieʼmo hapaʼye nehiya kava huʼa geʼamo afisayafeʼmo magoʼe huno hapaʼye hisiya agufa gemo haneʼniye. Magoʼe huno hagaʼage gemo haneʼneno luʼme anumoʼmo nehiya hagaʼamo ago aeno agaseno haneʼniye.

¹¹ Gekamoʼmo, ehekae, huno nehigeʼnaeʼmo aliʼyakamo neʼaluva vekamoʼnamo afiteʼnaeʼmo atete nehuve. Gekamo akame nehaya vayaʼmogimo alopa miyaʼapimo aligae.

¹² Muki vayaʼmogimo muki hosu kavaʼapifatiʼmo faiʼa kasalo nepaya kavaʼapimo alagepa huʼa afaʼa oʼagegae. Ala kava nene, huʼna, hosu kavaʼmo haneʼniye, huʼna oʼageʼna huʼnova hosu kavaʼnimo aeka kalo paeka atalo.

¹³ Hosu kavaʼmo haneʼniye, huʼna ago ageʼnova hosu kavaʼmo halate osisuvafeʼmo natafauka nato fiku yanageno ani hosu kavaʼmoʼa yagaino nategaiyanagi. Ani kava huka naha maesanageʼnaeʼmo vaiʼmo oʼaliʼna hogote hosu kavaʼmo aeno agaseʼniya hosu kavaʼmo osuguve.

¹⁴ Ala kava nene, huʼna, miya faika nateteka himamuʼnimo namiʼnana vekaʼnimo maiʼnane. Navayafatiʼmo nehuva geʼnimo ago afiteka naipafiʼmo nagesamo neʼafuva kavaʼnimo kaulagafatiʼmo ago nagetekaeʼmo, alagepa kavaʼmo huʼnane, huka hisanafekeʼmo neʼnahaiye.